مەلكەموت

نزار محمد سعید

ئەوەی مەلكەموتی گۆهێن خوە دیار كرین، ژ نوی ئەزێ ژماڵ دەردكەڤم.
خولكێ مرنێ یێ بباژێری دا هاتی، نە چیدی وەكو جاران دەنگێ خواندنا بلبلان دهێت، نەخولخولا ئاڤێ، نە ژی ئاوازێ خەمگینێ هەڕۆ سپێدێ و ئێڤاری پیرەمێرێ هەڤسوویێ من دژەنی، بلورا وی تم دگری، من نەنزانی بۆ چ دگری، بۆ كێ دگری.
نەگەهەشتە مرازێ رەبەنی، ئەڤرۆ جەندەكێ وی سۆتن، پێ نەوەستان بلورا وی دگەل ڤەشێرن.
گۆهێن من تونێن دەنگێ ئەمبوڵانسا یێن ژبەر كرین، دكەم و ناكەم ژێ دەرناكەڤن، ب تایبەتی دەما كو سەرێ خوە ددانمە سەر بالیفكێ.
ل ڤان رۆژێن بەروڤاژی هەمی رۆژان پەیاران، جەهدە وكۆچ و كۆلانان بێهنا خوە ڤەددان، ئەو
ژی گونەهن پڕ وەستیان.
چ رادیۆوا دبەمە سەر ریكلامن، نانێ خوە ب ئافكا كۆرۆنایێ دخۆن، ژ پاران تێر نابن، تەڤی كو تەڤایا خەلكی ئەڤرۆ پتر پێدڤی كەنیێ نە، پێكەنۆكێ، خوە ژ بیرڤەكرنێ، دیوارێ ترسێ بشكێنن، قنیاتا دلێ خوە بینن، بارێ دلتەنگییێ، هەست ب دابڕانێ و ژێك ڤەقەتیانێ سڤك بكن هلوەشینن.
ئاڤاهیێن بلند ل هەر چەند ئالییان خوە داینە تاڤەكا تەزی، من هەست پێ دكر یێ زێمارێ دكن، قەلەرەشك و كۆترێن ل هنداڤ دزڤرن، لێ ڤەدگێرن، زەنگلا كنیشتێ ژی یا بهێز لێ ددەت، بایێ خەم و پەژارەییان بۆ ناڤەندا باژێری ڤەدگۆهێزت.
لێدانا دلێ من نەوەكی هەمی رۆژانە، دێ بێژی قەی دلێ خورتەكییە، یێ ترۆمبێلێ ل نیڤا باژێرێ، بێ دەستویری دهاژوت، خوزیا من ناچیتە خوار، هێژ ئەز یێ قاچكێ هن هزرێن رەش ڤەدجویم، هەتا نیڤا باژێری چووم، ئەڤ جەهدە هەمی من بڕین یێ ب تنێ بوم، من پەنجەر پیچەكێ ئینا خوار، جار دی بلەز برە سەری.
ترۆمبێلێ دێ چەند سەد مێترەكان دویری پارێزگەهێ راگرم، قەمی چەندەكێ ب پییان دچم، هەیامەكا درێژە دكونا خانیڤە، چ نەمایە رێڤەچوونێ ژبیر كم.
دێ چمە پارێزگەهێ، چەند رۆژەكێن ماین دەمێ دەستویریا من یا ترۆمبێل هاژۆتنێ دێ ب دویماهی هێت، چاوان بت د چ رەوش دا بت، یاسا یاسایە دڤێت نوی بكم، مە نان ژی نەمایە و چەند كەل و پەلەكێن پێدڤی، دێ وان ژی د رێیا خوە دا ئینم.
بایەكێ وەها پاقژ ڤ بەر كەپییا من نەكەتیە، چاڤێ من یێ ل كاشییێن پەیارەی، هندەك ژ وان بلندترن ژ یێن دی، دترسم لێ هلنگڤم دڤان حەیس و بەیسان دا بسەتمم و كەس خوە ل من نەكەتە خودان، نەوێرت نێزیكی من بت.

• دەستكێ دەرێ ترۆمبێلێ باش پاقژ كە.
• بلا.
• نەوەبت دەستێ خوە بكەیە سەروچاڤێت خوە.
• ئەز ناكمێ.
• ژماڵ بۆ پارێزگەهێ و ژپارێزگەهێ ئێكسەر بۆ ماڵ.
• ما دێ كیڤە چم، كافێ و پرتوكخانە دڤەكری نینن.
• یێ كەتە رێكا تە سێ چار گاڤا خوە ژێ بدە ئالەكی.
• دێ وە كم ئەز دزانم.
• دەڤێ خوە ژی ڤەنەكە، بێهنا خوە چك بكە، هەتا ژ وان دبۆری.
• دەڤێ من هەرێ گرتییە، ما كەنگی ئەز ڤەدكم.
  گەها دەیكێ چۆ، یا كچێ هات:
• باب هشیار بە نەكوخە.
• باشە كچا جان.
• نەبێهنژە ها.
• دێ دەستمالێ دەمە بەر دەڤێ خوە.
• دێ هۆسا ژ بنی خراب كی، پاشی شولا تە ب رێڤە ناچت!
• چما ب رێڤە ناچت؟
• یان دێ تە دەرئێخن، یان ژی هەمی دێ رەڤن، ئاڤاهییێ پارێزگەهێ بۆ تە هێلن.
• ئەڤە تە چ لێ كر، هێژ وەلێ نەهاتیە.
• تو یێ ل مال ما تو چ دزانی، ئەز یا د ناڤ دا، ژ نێزیك هەر تشتی دبینم، لێ ناخوازم وە ب ترسینم.
  چاوا كو گەهەشتم بازاڕێ باژاڕی، كت و ماتێن مرۆڤان ببەر چاڤ كەتن، هەر كەسی دەستێ وی یێ ب كۆمێ وی ڤە، خوە ژ مەلكەموتی دپارێزن.. بلەز دكڕن.. بلەز دخۆن.. بلەز ڤەدخۆن.. كت كت ژێك ڤەدەر دهێن.. دچن، ترسێ، شەپڵین و شەپرزەبونێ، دێ د گاڤێن وان دا بینی، ب ساناهی دچاڤێن وان دا خوینی.
  بای ل روو و دێمێن وان یێن بەهتی ددا، گاڤێن خوە سڤك دهاڤێتن، دێ بێژی قەی عەفریتەك دێ
  ژ بن عەردی دەركەڤیت و هێرشێ كتێ، یان مەلكەموت دێ ژوردا ژعەسمانا هێتە خوار د پاتكا وان ڕا گرت.
  دەنگێن بەری هەیڤەكێ ژ ڤان دران دهاتن چیدی ناهێن، گەڕییا گۆرستانێ یە.
  د ڤان كێلیكان دا ژ نشكاڤە ئەز ب ڤێ پرسیارێ ڤە مژویل بوم، گەلۆ ئەڤ خەلكە ڤێ ترسێ هەمیێ ژ كیڤە دئینت؟ هەر كەسێ ل راستی من دهات ژ دویرڤە خوە ددا ئالەكی، ژ من دویر دكەت.
  بازار دگرتینە، چڤیك ژی ددیارن دبێزارن، ب تنێ یێ ل ناڤ بازاڕی پاسەوانیێ ل داروباری، ل گۆل گۆلزار و دوكانان دكن و ناڤبەر ناڤبەر هەر كەسێ دبینن ب رەف قەست دكنێ، دەورانا ل هنداڤ سەری ڤەددن و ل بەر لنگان دهێن و دچن داوا خوارنێ دكن.
  پێنج خولەك یێن بۆ ژڤانێ ماین، دێ شێم جگارەكێ كێشم.. نەكوخە باب.. نەبێهنژە ها.. من
  جگارا خوە هاڤێت.. بۆ پاسەوانێ ئێكانە یێ ل بەر دەرێ پارێزگەهێ گڕنژیم.. ئەو ژی بۆ من
  گڕنژی.. ل پرسگەهێ ل ڤی ئالێ خیچا سۆر راوەستام:
• ناڤرۆژك باش.
• ناڤرۆژك باش. ژ دەنگێ وێ دیار بی، ئەو ژن بی یا من ئەڤ ژڤانە بەری چەند رۆژەكان دگەل چێكری، بەری چێكت ب پرسیان ڕا چۆ: تا ناهێتە تە، كوخك ل تە نینە، گەوریا تە ناسوژیت…
• ئەز دشێم چ بۆ تە بكم.
• من دەستویرییەكا هاژۆتنێ یا نوی دڤێت.
• ناڤێ تە.. رۆژبوونا تە؟
  تەنێ وێ زڕە هۆڵێ دو كارمەند ل جهێ خوە بین، ئەم ژی دو كەس بین، نمرا من ل شاشێ لێدا.
  ل هەمبەر ژنكا ل پشت جامێ روینشتم و من كارێ خوە بۆ گۆت، دەستویرییا كەڤن و وێنەك ژ من خواستن، من تێ ئینا دەر یا خوە ژ من دویر دكت، هندی دشیان دا بت زوی من ب دتە رێ، وێنێ من، دەستویریا كەڤن، ئامیرێ من تلا خوە لێدای دەما پارە داین، تەڤ ب سپرێ یەكێ پاقژ كرن پاشی دەستێن خوە ژی.
• بۆ وەرگرتنێ پشتی سێ رۆژا دڤێت ژڤانەكێ نوی چێكی.
• باشە، سوپاس، رۆژ باش.
  د رێ دا ل پاركەكێ روینشتم، هەمبەر دیمەنەكێ قەشەنگێ دلڤەكەر، باغەكێ دارێن حولیك و كێرسان خوە ب كولیلكێن بەفرێ خەملاندینە، كراسێ بویكینێ ل خوە كرینە، لسەر گرەكی دنیڤا گۆلەكا ئاڤێ دا، ل ژێر تاڤەكا تەزی دبرسقین، بیرا چیایێن كوردستانێ ئینا بیرا من دەما بەفر دادپۆشت، بای چقێن وان چەپ راست راكرینە رەقس و سەمایێ، سیڤاندۆك بێ دەنگ لسەر دلەیزین، مێشێن هنگڤینی لسەر شیلاڤا كولیلكان ڤەدنشین.
  قیزو خورتەكێن مینا نافكا نێرگزێ، دیمەن ب رەوشتر ئێخست، دەستێن وان تێكدا بین راستی من هاتن:
• بەرێز، تە دڤێت وێنەكی بۆ مە بگری؟ قیزكێ كەنیەكا سپی لسەر رویكێن خوە یێن هناری چێ كر، دەستێ خوە درێژ كر، موبایلا خوە دا ڤ من.
• ب دلخوەشی دێ بۆ وە گرم، بەلێ دەستویری هەیە پرسیارەكێ بكم؟
• ئەرێ، فەرموو.
• ئەز ترسێ ب وەڤە نابینم؟
• ترس! ئەو نەبەحسێ مەیە، دڤێت هندەكێن دی ژ خوە بترسن! خورت ل قیزكێ نێڕی گڕنژی و گۆت.
  قیزێ دپەی ڕا چاڤێن گرێن ژ رەنگێ عەسمانێ ئەڤرۆ، خستنە چاڤكێت من و پۆرێ بەفرین، لێڤێن گەوەز لڤلڤاندن، گوهارێن بازنەیی ڤەلەقاندن گۆت:
• هەر تشتێ دبت، ژیان دێ یا بەردەوام بت بەرێز، ئان تو ژی وە نابێژی؟