زمانێ ئاخێ

مهاباد حەمید

سترانەكێ بۆ من بێژە

تێرا ژییێ من..

عەشق تێدا هەبیت

گولدانەكم ژ سترانان..

وەرزەكم ژ پەیڤان

هندی من ل بیرە.. دنڤیسم

ڤێ نڤیسینا من بكە ستران

بلا ل سەر كاغەزان نەمینیت

بێ خوەدی و خواندن نەمینیت

بێژە..

هندی تە دەنگ هەیی

ب بێ هۆشی

ب سەرخۆشی

تێدا گازی بارانێ بكەت

جەستەیێن مە رویس بكەت و

ببین ڕاستییا ئاسمانی لسەر ئەردی

ئەڤە ژییەكە خۆ فێری سەمایێ دكەم

پێدڤییا من ب دەنگێ تە

بارانێ و..

جادەكێ هەیە

دا مافێ بارانێ بدەینێ..

ئەم ژی گیا و دار و گولین

ئەم ژی ئاخین..

لێ نزانم دێ بینە ئاخ!؟

ب سترانان گازی من بكە

تژی ڤان كۆلانێن بێدەنگ

 مۆزیك بكە

فێری زمانان نەبوویمە

كەنگی ئاخێ زمانەك هەیە!؟

سەمایێ ب دیناتی بكەین

ڤەگەرین بۆ نەژادێ خۆ،

بارانێ دگەل عەشقێ ڤەخووین

خۆ ژ هەمی گونەهان بشووین

بێدەنگ نەبە.. هیڤیدارم

مە ڕێكێن مرۆڤان نەڤێن

مە پەیڤ و نامە و دەست نەڤێن

ب ڕوحێ دئاخڤین

ب بێهنێ..

ب ئێكو دوو دكەڤین

تژی شیشەكا گولاڤێ تووی

هەمی سحارییان..

چەند دلۆپەكێن تە ل خۆ دكەم

هەست ب ژنبوونا خۆ دكەم..

دەنگێ تە هات!

ئەو كیژ سترانە؟

سەرێ خۆ پێ بلند دكەم و

ب ڕێكا ژییێ خۆ دچم

سەربلندم

جودا ژ هەمی ژنان

ب نڤیسینێ دگەهمە تە

ئەوان.. دئاخفت

گازندە دكرن.. دگریان

و من..دنڤیسی

ژ نڤیسینێ تێهنی مە

ژ كەرەما خۆ

پێكەكی ژ گۆتنان بدە من..