ڤەڕێژ
ناجی تاها بەرواری
1- كویڤی:
دەمێ كویڤی
بێ ژێدەر و بێ خوێبەر ماین
بێ لاڤەلاڤ
دجهوڕەكێ ڤالا دا
خۆ كویساند و هەلفڕنجین
بەرەڤ كەنالەكێ بارانی
دەست داهێلان
سەرئەڤراز و ژێهەل فڕین
ل ڤێ شەرگەهێ
میری سەرێن كەهی بڕین
هەمی گوڤ و هەمی كوتان
د هەڤڕكیەكا ستەوردا
ماچی كر خوین.
2- كانی:
د چللەیێ هاڤینەكا
ڤولكانی دا
گەرم د كەلی و
د رویباراندا ئاڤ دقەرسی
د رێبارا پەروەریێ دا
هەمی ئەو پێلێن
چیا سمتین
مانە برسی
نان ژ تێریێ
داكەت و
چاڤێن گەرۆك
قوشان قوشان
داڕژیان
هێلان كورسی.
3- دەم:
د خێڤەییێ دا
من و دەمی هەڤدو د شكاند
من خەیالێن پاشڤەڕۆ
بلند دكرن
رەوشەنێ
ل دەرازینكا بەهیێ
ب بەژنا خویل
سەر بۆ نشیڤیێ چەماند
هەڤبەری من
بێ دەستویری
دەم ئەرنی و
دادگەهێ
تاریگەها كولەتیێ
هەمبێز كر و
پەیڤا بریارێ راگەهاند .
4- گول:
سورە گولێ
پشكوژا خۆ راڤە بكە و
ژێ وەرە دەر
ژبوونا تە
مە گوڕستان
ب هەستیان ئاڤاكرن
ژ خوینێ ڕا
نودراندن
دەریایێن سور
گۆَلێن بێ دەر
ژفرینێ داوەشیاین
خوازوكیێ
تەڤنەكێ زیز
راچاند و
ئاستەنگ هێلان
بێ لنگ و پەڕ.
5- رێزان:
ئەز تێهنیێ تاڤیەكێ مە
بلا ژ راڤێن
رەشە عەورەكێ
تێر برویسی و خورت
بباریت
تۆ گرتیا كڤانەكێ
سنگە پێ یی و
نەڕكدایە و دكوكا خۆ دا
نا لڤلڤیت
ئەز و تۆ
د ڕۆگەها هشیێ دا
هەڤپشكین
ژ نیڤا رێ ئەم ڤەگەڕین
خوها مە دێ ڤەژیتەڤە و
رێڤنگێ خۆسەریێ
دێ توخیبێن گیرۆ بڕیت
پەیاما بهارەكا رەنگین
دمەژیەكێ خورستی دا
دێ هەلێت و یەكسەر گەهیت
دهۆك
2022
