بەهەشتا ڤییەنا یا بچویك

بەهەشتا ڤییەنا یا بچویك

باغچەیێ یابانی ل ڤییەنا… گەڕیانەك ل گەل داروبار و ئاڤ و دابونەریتێن یابانی….  

 بدل رەڤو

 ڤییەنا

سیتاگایا ئێك ژ دەڤەرێن باژێڕێ توكیویە كو ئەو بخۆ ٢٣ دەڤەرن و ئەو دووەم مەزنترین دەڤەرا پایتەختیە. ئاكنجیێن پایتەختی ٩٠٠ هزار كەسن. ئەڤ دەڤەرە ل سالا ١٩٧٤ ێ هاتیە چێكرن، ل بەرامبەر ڤییەنا ژی بۆ ٢٣ دەڤەران هاتیە پارڤەكرن. ئەڤان دەڤەران مافێ گرێبەستێن هەڤالینی و رەوشەنبیری ل گەل  دەڤەرێن دی هەیە. هەر ژبەر ڤێ چەندێ دەڤەرا سیتاگایا پەیمانەكا هەڤالینی یا رەوشەنبیری و هونەری ل گەل دەڤەرا دوبلینگ ل ڤییەنا چێكر. هۆسا دەڤەرا سیتاگایا دەستپێشخەربوو و رابوو شوین تبلێن خۆ ل دەڤەرا ژمارە ١٩ ل ڤییەنا هێلان.

هەر ژ سالا ١٩٨٤ێ هەردوو دەڤەر بووینە هەڤال جێمك و نەخشەیەكێ باش بۆ هەردوو باغچەیا هاتیە دانان. باهرا پترا دانعمر دەمێن خۆ ل وێرێ دبورینن. ب راستی ئەو دەڤەر تیشكەكا ئارامی و ئاشتی و گونجاندنێیە ل گەل رحێ و یێ بەرامبەر.

ئەڤ دەڤەرە دكەڤیتە ئارامترین دەڤەرێن ڤییەنا ل سەر رێیا چیایێ كالهین و دارستانێن باژێڕی بۆ دویركەفتنێ ژ وەستیانا رۆژێ. روبەرێ باغچەی چوارهزار مەترێن چوار گۆشەنە و ل سالا 1992 ێ كارێ وی ب دویماهی هاتیه.

كین ناكاجیما ئەڤ باغچەیە دیزاین كریە پشتی چەندین سالێن هەڤالینیێ ناڤبەرا هەردوو دەڤەران كو ل سەر دیزاینەكا یابانی هاتیە چێكرن و كوپیەكە ژ باغچەیێن یابانی وەكی پرا داری و بەرێن دەگمەن و سویلاڤەك و هندەك داروبارێن یابانی و جوانیا ڤی باغچەی دگەهیتە هەمی وەرزێن سالێ نە ب تنێ بهارێ.

بەری بچیە دژورڤە ل سەر بەرەكی هاتیە نڤیسین: چوونا ژوور بۆ بەحەشتێ. چنكو ل دویڤ دابونەریتێن یابانی ئەو تشتێن تێدا چەڤەنگێن بۆ بەحەشتێ.

هەر د ڤی باغچەی دا رێكێن تایبەت بۆ خودان پێتڤیێن تایبەت هەنە. هەر ل دەسپێكی دێ گەشتیار ژوورا چایێ و بركا ئاڤێ و ژوورا كلاسیكیا یابانی بینیت. دیسا هاتیە نڤیسین كو نابیت سە و خوارن بهێنە د ناڤ باغچەی دا. د ژوورا چایێڤە دێ رێورەسمێن یابانیان یێن چا ڤەخوارنێ زانی، نەمساوی ژی حەز ژ دابونەریتێن سەیر یێن بیانیان دكەن.

ئەڤ باغچەیە سەعەت ٧ ی سپێدێ حەتا تاری دهێت دەرێن خۆ ڤەد كەت. هندەك هزردكەن كو دیتنا ڤی باغچەی یا ب زەحمەتە، بەلێ براستی یا ب ساناهیە ب تایبەتی ئەوێ ل جوانیێ دگەڕیێت. بەری بچیە دژۆرڤە كەڤالەكێ مەزن یێ هەی هەمی لایەنێن باغچەی یێن تێدا ل گەل پێزانینێن پێتڤی ل سەر هەڤالینیا هەردوو باژێڕان و مێژوویا ڤی باغچەی.

براستی باغچەیەكێ بچویكە، بەلێ ب جوانیا خۆ وەختی ژ مرۆڤی دبەت، چنكو جوانیا وی گیانێ مرۆڤی داگیردكەت. د بركا وی دا ماسیێن رەنگین دەلیڤەكا زێرینێن بۆ خێزانان دا جیهانەكا نوی ببینن. ئەوێ ژ رۆژهەلاتی خەریب ببیت بلا بهێتە ڤی باغچەی بلا چەند دەمژمێرەكا بهێتە ڤی باغچەی كو چوونا ژوور بێ بەرامبەرە.

ناڤودەنگێ باغچەیێن یابانی ل هەمی جیهانێ بەربەلاڤن و ئەڤ باغچەیە تنێ نموونەیەك بوو و ب راستی ژی باغچەیێ سیتاگایا بەحەشتەكا نایابە.