زاڕۆك و سینەما
ئەلند مزووری
زارۆك بەختەوەری و فیقیێ مالانە؛ و شەنگستە و پاشەرۆژا ئاڤاكرنا جڤاكانە، ئاڤابوون و پێشڤەچوونا جڤاكی ب ئاڤاكرن و رەوشەنبیركرنا زارۆكانڤە گرێدایە، واتە گەر ئەم شیاین زارۆكی ئاڤاكەین ئەڤە ئەم شیاین جڤاكەك پێگەهشتی و ئاڤاكەین، گرنگیپێدان بڤێ تەخا نازك و مافێن وان ئێك ژ مژارین هەرە گەرمە دهەمی دەم و جهان دا دناڤا جڤاكاندا، وەك یا ئاشكەرا دخەبات و بزاڤا رزگاریخوازییا گەلێ كورد دا بدرێژاهیا سالان گەلێ كورد گەلەك قوربانی داینە دهەمی مژارێن ژیانێ دا و بتایبەت د ئاڤەكرن و گەشەكرنا كەسایەتیا مرۆڤان دا دقوناغێن دەستپێكی دا، و بتایبەت تەخا هەرە گرنگ دجڤاكی دا كو ئەو ژی زارۆكە، چۆنكە هەردەم د بارەكێ نالەبار و نەئارام دا دەرباز بوویە ژ ئەگەرێ بەرپابوونا شۆرەشێن ئێك لدویف ئێكێ دژی وێ زلم و زۆرداریا وان رژێمێن و دەستهەلاتێن وان دەولەتێن كورد دگەلدا دژیان، و هیج دەمەكێ رەوشا كوردستانێ سەقامگیر نەبوویە، و تەخا هەرا قوربانی و زیاندار تەخا نازك و بێ گۆنەها زارۆكان بوویە، كو ژبجۆكترین مافێن خۆ یێن رەوا بێ بەهربوویە، دا كو بشێن خزمەتا ڤێ تەخێ بكەین دڤێت هشیاربوونەكا رەوشەنبیری و جڤاكی دناڤ هەمی تەخێن جڤاكێ كوردی دا بەلاڤ بكەین، لێ گەر لڤێ چەندێ بنێرین دێ بینین كو دڤان سالێن داویێ دا هێدی هێدی هشیاری و گرنگی پێدان بڤێ تەخێ دهێتە دان ل ناڤا جڤاكێ مە دا، ژلایێ سازیێن حكومەتێ و رێكخراوێن جڤاكێ سڤیل یێن تایبەتمەند ب زارۆكان ڤە و گرنگی دایە بیاڤێن جوداجوداو پێشڤەبرن و گەشەكرنا شیانێن وان یێن هزری و رەوشەنبیری و هونەری و هەر وەسا گرنگی دایە بنەمایێن مافێ زارۆكان و پاراستنا وان، لێ دسەر ڤێ چەندێ ژی وەك پێدڤی ئەم نەشیاینە هەمی حەز و ئارەزویێن وی بجهبینین، سینەما ئەو هونەرێ هاتیە نیاسین ب هونەرێ حەفتێ و دهێتە هژمارتن ژ هونەرێن پێشكەفتی و سەردەم لسەر ئاستێ هەموو جیهانێ، گەر ئەم ل سینەمایێ بگشتی بنێرین و بتایبەت سینەما كوردی كو گەلەك گرنگی پێ هاتیە دان برێكا فلمەفێستیڤاڵین دهۆك و سلێمانیێ و بتایبەت فلمە فێستیڤاڵا دهۆك دگەرێن خۆ یێن ئێك لدویڤ ئێكێ، و پەشداریا زارۆكان دگەلەك فلمێن كوردی دا دبینین كو پەشداریەكا كاریگەرە مل ب ملێ ئەكتەرێن خودان شیان، و شیایە رۆلێن گرنگ تێدا بگێریت. ئەڤرۆكە ژ سینەماكارێن كورد دهێتە خواستن خۆە ل ڤێ جیهانێ بكەنە خودان كۆ دڤێستیڤاڵێن دهۆك و سلێمانیێ و هەر فێستیڤاڵەكا دی یافلمان دا بیت كو بەشەكی بۆ بەرهەم ئینانا فلمێن لڤۆك (ئەنیمەیشن) ئانكۆ یێن كارتونی تەرخان بكەن كۆ گریدای رەوشا زارۆكێن كوردان ڤە بیت و برێكا وان فلمان بابەتێن دیرۆكی و كەلتۆری و داب و نەریتێن جڤاكی مە ب رێكا سیناریۆیێن دهێنە نڤیسین كو ئیلهام و رەنگڤەدانا بارۆدۆخ و نەخۆشی و دەردەسەریێن جڤاكێ مە بن د قۆناغێن جوداجودا دا دەرباز بووی، ب تایبەت تەخا زارۆكێ كورد كەسایەتییا خۆ د ڤان فلمان دا ببینیت و هەست ب هەبوونا خۆ بكەتن وەك تەخەكا گرنگ و دا بشێت خۆ دگەل ڤی هونەری بگونجینیت چونكی شیانێن زاڕۆكێن مە نە كێمترن ژ شیانێن زاڕۆكێن خەلكی، لێ یا پێدڤی ئەوە گرنگی پێ بهێتە دان داكو ئەو ژی مفای ژ سەربۆرا ڤان فلمەفیستەڤالان وەربگریت، هەروەسا داكو ژ لایێ جیهانا ژ دەرڤەی سنوورێن كوردستانێ ژی بهێت نیاسین، ب هزرا من فلمەفیستەڤالا دهۆك یا سینەمایێ یا نێڤدەولەتی باشترین دەلیڤەیە كو تێدا ئەڤ مژارە بێتە بەرچاڤ كرن، ب رێكا سینەماكارێن كورد و بابەت بگرنگی بهێتە وەرگرتن، دا كو ببیتە پێگاڤەك بەرڤ سینەما زارۆكی ل كوردستانێ بگشتی و هەرێمێ بتایبەتی.
