ئەز كۆمكەكا ئاخێ مە
هلبین باقر
هەمییان د هەمبێزا خوە دا ڤەدشێرم
شاخێن من
دوو قەلیشێن درێژن
پر ژ دیرۆكا دەولەتا دلئێش
كاڤل دكرن
بازبەندێن من!
مارەك رەشە
ل دۆر بەژنا تە دئالینم
تو ژی وەكی جاران
ببە باران، لسەر سینگێ من نەرم ببارینە
ببە عەور
عەورێن گران، ب گونەها خۆ من نەئێشینە
و سلاڤێن دنیایێ…
ل تاریستانا لەشێ من پەرچفتی بە و بنڤە
بنڤە و سەرێ خۆ بدانە سەر بالیفكا خەمان
بلا ئەڤ شەڤ د هەمبێزا خەمان بێتە بۆراندن
بلا ئەڤ شەڤ د خولیسەرییا دیوانا گورگان دا
بێیە ڤەچڕاندن
هەتا سباهی
خوە د عەشقا مەشقا پڕ مەستا مەبەستا تە دا
رۆژەكا نوو بێتە هلاندن
و بزڤڕی
ب ئومێدەك ژ نوو
ب دلێن شكەستی
ل هەیبەتا خەیالێن بندەست
داخا خەونا من خەمچەمین
خویسارا خوینا من یا دكەلیت
دا بزڤڕی وێ هەمبێزێ
ژ دوور دوور تە ماچ بكم
دا بزڤڕی
د ناڤ لیسێ
ژ بهارا دێمێ من یێ خوناڤی پیرۆز بكی
ژ پایزا نفشێ من یێ لاواز فرشك بكی
د دەرگۆشا خەونا ئازادیێ دا بدی بای
و ل هەمبەر پەنجێن دەمی
تێهنا رۆژا كەلەگوڕی پێ بشكێنی
و بریندار دبی
ب برینەك سۆر
دەرمانەك سۆر
خەونەك سۆر
بارانەك سۆر
دیسان زڤڕاند لبەر وێ كۆمكێ
سەر ژ نووڤە
دەست پێ كرڤە
