باژێڕێ بێ دەم
د. بەدرخان سندی
دبەر شوینوارێن هیڤییان
و بەرمایی یێن حەزەکا کەڤنار دژییا
و رۆژێن خۆ دجوی..
ب ڕەخ دیوارێن خەونەکا خۆش و درێژ و زەلال
یا وەک بیرەوەرییان لێ هاتی..
رۆژانە و هزرانە پیاسە دکر و دکرەڤە
وی پالدای پیاسا خۆ دکر و..
هەتا دو دلۆپێن ڕۆندکێن گەرم ل سەر رهێن نەتراشی
نەببان مێڤان
ژ پیاسا خۆ نە دزڤڕی ڤە
خەلکێ مە دبێژنە ڤان جۆرێن پیاسەیان.. دالغە
ئەوی بزاڤا نێچیرڤانییا وان بیرا دکر..
لێ دهاتن و دفڕین
لەو نەدشیا بگرت
بیر.. ب دەمی ڤە گرێدایە
و دەم.. دبن ئێشەکا گراندایە
های ژ خۆ نینە
هندەک ژی دبێژن هەر نەمایە
باژێڕە.. وەلێ بێ دەمە
هەردوو پەڕێن دەمژمێرا وی
ب دیوارێ ژوورا وی ڤە یێن هشک بووین
چەرخ و دیلابێن دەمژمێرێ
ئەوێن بەرێ د عشقێ دا دژیان..
و ئێک ودوو دڤییان
و ب شەڤ و ڕۆژان
ب دویڤ ئێک ودوو ڤە مژویل و نیسیای
و تکتکا ڕامووسانا وانا ئەوێن ب شەرمی و نەرمی
دهاتن بەر گوهێ وی..
ژەنگێ خوار
تەڤنەپیرکا مالێ.. خاتوینا بێدەنگییێ
شاژنا تەمبەلییێ
و سەبرا بێ توخیب
جهێ خۆ گوهاڕت و چوو د ناڤ قالکێ ده‌مژمێرێ دا
و خیڤەتا خۆ ل وێرێ ڤەدا
و دەست ب کارێ متبوونێ کرڤە و وەی پا ب شۆلە
ئاها ل وێرێ ئاکنجی بوو
و دەم.. ژ هینگێ وەرە.. هەما هوین دساخ بن!
تڤیرکێن هەر سپێدە مەلەڤانێن ڕۆناهییا ئەلندێ سۆر و خێڤە
دهاتن بەر پەنجەرێ دبسترین
و ب شویماتی نکل ل شویشا پەنجەرکێ ددان
هەروەکی دڤییان خودانێ پیاسا هزرانی ژ خەو ڕاکن
ئەو ژی چوون.. نەهاتن ڤە
دبێژن پەنابەرییێ ژ تڤیرکێن چەمێ باژێڕی..
باژێڕێ بێ دەم ژی گرت
و چوونە هندەک وەلاتێن دویر.. وەلاتێن بدەم
شەڤ کاروانەکی درێژە، بێ هەدارە..
و پیاسەڤانێ مە ل بەندا رەوشا هەتاڤەکێ بوو
پیاسا خۆ یا ڕۆژانە ل بەر ڕۆناهییا وێ بکت
و کەزییێن حەزا کەڤنارا بەرێ
وەک هەر ڕۆژ ڤەزەلینت شەهـ کت و بەردت
وەلێ تاڤا بێ تابه‌تيێ..
وێ ڕۆژێ مانەک گرتبوو و ل ئاسمانێ حەفتێ
داخوازا مافێن خۆ کر و خۆ ئاسێ کربوو
و ..هەما بوو خۆپیشاندان و نە بشکڤی
هەورێن ڕەش و تاری..
باژێڕێ بێ دەم داگیر کربوو
ڕەشبینییێ ژی داوەتا خۆ..
ل ناڤ کۆلانێن باژێڕی دا دکر
خۆ حەنەفییێن مالا ژی ژ پێش ئاڤێ ڤە ڕەشبینی دڕشتن
پشتی وێ سحارییێ..
کەسێ خودانێ پیاسا حەزا دێرین نەدیت
پەردێن پەنجەرکێن مالێ مانە شۆڕ
و ئێدی نەهاتنە ڤەدان
و کەسەکێ ئێدی
تڤەنگا وی یا بڕنۆ
ئەوا ب دیواری ڤە هەلاویستی و ژ دویرڤە دیار دکر، نەدیت..
و.. هێشتا باژێڕ بێ دەنگە
و.. هێشتا باژێڕ بێ دەمە
