باژێڕەك نە ژ هەژی ژیانێ
دیار ئەرەدنی
سباھی چیایەك دێ سەرێ خوە ژ ناڤ زەڤیەكا پەمبی دەرئێخت.
نهالەك یا بەرەڤ دەریایەكێ دچت و حەزدكت ببت رویبار.
رویبارەك بۆ دوماهیك جار یێ د بن پرەكێرا دەربازدبت،
هەمی بەرێن د پرێ دا دنیاست
یێ خاترا خوە ژێ دخوازت
چونكی ب رویباربوونێڤە وەستیا و دڤێت د دەریایێ دا خانەنشین ببت!
مستەكا ئاخێ ژ دەستێن زارۆكەكێ ڕژیا،
هێڤیا وێ ئاخێ ئەوە ببت گر.
ئاخەك یا خوە د كۆلت و
خەونان ب مرنا كچەكێ ڤە دبینت،
دا بۆ وێ ببت گۆڕ.
و ئەز یێ دگەل هلما دەریایێ بلند بوویم،
ل هیڤیا ڤی ئەوری مە، دا ببارت!
ل بلنداهییان یێ ئەردی دبینم،
كاروانیەك یێ ژ دویر دهێت،
بارێ هێسترەكێ ماچن!
هێسترا دوماهیا كاروانی تژی سەر پشتا وێ هەمبێزن.
بوچی رێك بەران دهاڤێژت سەر خوە؟
بۆچی خوە دگرت و حەزناكت كاروانی ڤان ماچ و هەمبێزان بۆ ڤی باژێرێ نەفرەتێ بگەهینت؟
ما رێك نزانت دایكەكێ هەمبێزەك بۆ كورێ خوە یێ زاڤا دڤێت!
رۆژ یا ئاڤابووی.
بیكەكێ دڤێت ماچەكێ ژ وی كاروانی بۆ زاڤایێ بكڕت!
تژی سەر پشتا هێسترا زەر خوینە،
كرێكارێ د دیواری دا كەفتی خوین یا ژ برینا وی دڕژت!
كەرەكێ سپی یێ دناڤ كاروانی دا دگرنژت،
تیركێن بزماران یێن ب كورتانێ ویڤە شۆربووین.
كورسیكا سەرۆكی یا سست بووی،
یێ ل هیڤیا كەری دا بزماران د كورسیێ خوە ب قوتت!
هێسترا خالا رەش ل ئەنیا وێ، بارێ وێ گەنمە!
ژنەك یا زارۆكێن خوە برسی د نڤینت!
رێك یا ب دەنگەك بلند دبێژیت باژێری: هوو خەلكینوو، ب تنێ دێ هێلم كاروانیەك دەرباز ببت!
هەژارێن باژێری یێ دبێژن: كەرێ سپی..!
زەڤی یێ گازی ڤی ئەوری دكن،
بەلێ نۆكە دێ چین ل دەریایێ بارین.
چونكی ئەڤ باژێرە ژ هەژی ژیانێ نینە…
