نامە بۆ سۆفی

كوثر شوكت

ھەر جارەکا من بەرێخوەدابا تە، من تشتەک ژ خۆیاتیا خۆ ئاشکەرادکر، چەند باشتر نێزیکی تە دبووم، پتر د ڕژیامە ناڤ وێ خۆیاتییێ، من ب باشی ئاگەھ ژێ ھەبوو کو ئەڤێ چەندێ پەیوەندی ب ھێزەکێڤە ھەیە دسەر عەشقێدا، تشتەکێ کوورتر!
مرۆڤ ڕادەستکریێ چرکێیە، چرکەیەک مرۆڤی ڕۆھندکەت، چرکەیەک مرۆڤی بلنددکەت، چرکەیەک مرۆڤی ژناڤدبەت، چرکەیەک مرۆڤی بەرزەدکەت! دبیت تو ژی چرکەیەک بووی.
جاران ئەز ھزردکەم، ئەوا مرۆڤان ژ جاندارێن دی جودا دکەت، کو بەخترەشترن، ھەر ئەو چرکەیە. ئەرێ تو ژی ھزردکەی، ھەکە مرۆڤ دناڤ ھەر چرکەیەکێدا وەکی ھەیی بژیت، دێ ژ بەندایەتییا دوودلی و بێزاریێ ڕزگاربیت، دبیت ئازادبیت!؟ بەلێ پا ئەم وێ ژی دزانینن کو ھەر د وێ چرکەیێدا چ ڕامان بۆ ھیڤییێ، بۆ خۆزییێ نامینیت! ھەست پێ دکەم چەند ئارام یا ژ کەنارێن تە دووردکەڤم، پێنگاڤ، پێنگاڤ؛ دبیت ژی چرکە، چرکە! یا نەفی دبمە گزیرتەیەکێ، گزیرتەیەکا نوو! ناھێتە بیرا من، ل قوناغەکا ژیێ خۆ، ئەز بۆ دەمەکێ درێژ مابمە ل جھەکی، جاران ئەڤ گوھۆڕینێن ژ نیشکاڤە، گەلەک ب دژواری ھەستێ خەریبوونێ؛ یێ نەناسیاریێ ب سەر مندا د ئینن، خەریبوون ژ وان مرۆڤێن د ڕۆژانێن مندا، وان جھێن ل بەرچاڤێن من! ئەڤێ دوورکەڤتنێ پەیوەندی ب جھیڤە نینە، بتنێ یا ب چرکەیەکێڤە ھەی.
بایێ ترسەکێ یێ تەڤلی ھەناسەیێن من دبیت، وەکی ترسا مرۆڤانە ژ مرنێ ژ نەمانێ، ژ نەدیاریێ! ھەستەکێ بێ سیما و بێ ناڤە، دوورکەڤتنەکا بێ سەدەم و بێ فشارە. دبیت ژی ترس ژ وان چرکەیێن خۆشیێیە، یێن دەمەکی د گەل تە ب گوھلێبوونا دەنگێ کەنیا تە، ئەز بلند ل ئەسمانەکێ دی دفڕیم.
دێ بێژی مرۆڤ گرتییێ دوودلی و بێزاریێ یە، ھەردەم ژ خۆشیێن مەزن دترسیت، ھزردکەت خۆشی ھەلگرا نەفرەتەکا ڤەشارتیە.
ئێدی داڤێن گومانێ یێ خۆ دباوەرییا من دا دئالینن، ئەز ژی یا ھەمی پێکولادکەم خۆ ب دوماھیک داڤا یەقینێ ڤە بگرم، لێ دناخێ خۆ دا باش دزانم، ژمێژە من ھەر تشت یێ رادەستی دەمی کری، ب تنێ یا چاڤەرێ چرکەیەکێمە.