پاشی كوڕێ من نەكە عەسكەر!
نزار یاسین ره‌شاڤەیی
ئەڤ گوتنە یا بەربەڵاڤە دوی دەمەیدا دهێتە گوتن كو ئێك منەتیا بسەر ئێكیدا بكەت یانژی گەفەكێ لێ بكەت ئەوژی د بەرسڤدانێ دا وەك نیشادانا بێ منەتیێ دێ بێژیتێ پاشی كورێ من نەكە عەسكەر. گوتنەكە رەهەندێن خوە یێن جودا هەنە. باشە بوچی دڤێت عەسكەری بو كەسێ كورد هندە یا بسەهم و گران بیت ؟
عەسكەری وەك ناڤ و دەستەواژە سەمبولەكە بو كارێ رێخستنكری و بجهئینانا ئەمر و فەرمانان هەروەسا دسپلین و رێكوپێكیێ و یا هەری گرنگ ئەوە هەڤتەریبێ دەولەت و دەستهەڵاتێ یە، لێ ژبەركو بۆ مە قەت نەبوویە ئەگەرەكێ هێز و سەرفرازیێ، چونكە مە د دیروكا نوی دا چ جاران دەولەت و ئارتێش پێك نە ئیناینە، بەروڤاژی نەیارێن مە دەولەت لسەر ئاخامە یا د دامەزراندی و مە های ژ بایێ فەلەكێ نە، مە هند یێ های ژخوە بووی سنوورا ئەم یێت لێك جودا كرین و ئەم یێت بووینە هەڤوەڵاتیێن دەولەتەكێ كو ب چ تشتا نوینەراتیا مه ناكەت، وەكی ژنەكێ تو ب زوری ل زەڵامەكی مارە بكەی، لەوما پشتی هنگی یێ ل مە گران هاتی كو ئەم عەسكەریا دەولەتێن داگیركەر قەبوڵ بكەین.
نەكو بتنێ وەك هەڤركی و تەحەدی بەلكو ژبەركو مرۆڤێ كورد د هەمبێزا خوەزایدا دژییا دوور ژ هەر تشتەكێ ئازادیێن وی سنووردار بكەت و گەلەك یێ ب جوگرافیا و مرۆڤێن دەور و بەرێن خوەڤە گرێدایی بوو، ژیانا دوری وارگەهێ خوە قەت نە دیت بوو، ژبلی كێشا زمانی، ئەو دوركەتنا ل جه و وارێ وی دبوو، جهێ كەسەر و حەسرەتەكا مەزن و شینوارێن وێرانكەر لسەر كەسایەتیا وی دهێلان.
د دەهان ستران و حەیرانوكاندا یێ بوویە بابەتێ سەرەكی هەم ژبووی وی بخوە وەك ئەو كەسێ دچوو عەسكەریێ و هەمژی بۆ دایك و باب و حەزكریا وی. لەوما حەتا نوكەژی رەنگڤەدانا وێ لسەر كەسایەتییا كەسێ كورد یا گوخە، هێژ یێ ل وێ جیهانێ كیڤی و یاخی یە وەكی جانیەكێ هێژ فێری بار لێكرنێ نەبووی.
كوردان ب دەهان شورەش و سەرهلدان ژی یێ دبەرپا كرین و نیڤ دەولەت ژی یێ دئاڤا كرین وەك نموونا كومارا مهاباد یان ژی باشوورێ كوردستانێ یا ئەڤرو، بەلێ ئەم قەد نەشیاینە خوە ل وێ گرێیا كورە رزگار بكەین ئەوژی ڤەجنقین و فوبیا عەسكەریێ یە. نەكو ئەم دەستبەرداری ناڤێ پێشمەرگە نەبووینە، ژبەركو بۆ مە ناڤ و دەستەواژەكێ كوردی یە و پیروزیا خوە هەیە و مە ڤیایە ڤێ تایبەتمەندیێ ب پارێزین، نە بەلكو پێشمەرگاتی پتر ل گەل خوەزا و هشمەندیا مە د گونجیت و ژبەركو پێشمەرگە نە هێزەكا نیزامی و ب پەرگالە و زێدە ملكەچی ئەمر و فەرمانا نابیت و چ دسپلین نینە كو بیرا وی ژ هندێ بینیتە ڤە كو لەشكرە، لەوما ژبووی مە یێ بوویە مەزنترین تەحەدا و هەڤركی.
ژ بەر ڤێ چەندی هەمیێ ئەز بەردەوام دبێژم حەتا ئەم سەربازەكێ ب رامانا سەرباز چێ نەكەین، بلا بەحسێ دەولەتێ چ جاران ژی نەكەین.
