گه‌رسون

ئه‌ديب عه‌بداللـه‌

یێ پرتەكا خۆشیێ دایە من یان نیڤ پرتا دلوڤانیێ ل من بەخشی، ل تەنگاڤیاندا هزرا من كری دێ دەنگێ خۆ دەمێ ئەگەر وی چ نەكر بیت ژی، یا دروست كەسێ هەژی بهەلبژێری، ئەز بخۆ دێ وی هەلبژێرم یێ بشێت وی ئەركی ئەدا بكەت، وەسا نینە ژی نهە هەر ئێك یێ ل باوەشا گاورەكی دا ژ بۆ بەرژەوەندا خۆ ل ساتێن دوماهیێ پارا ببژینیت، پا ژ وی دەنگێ ب پارەی دهێت نە رازی مە، ئەوێ دەنگێ تە ب پارەی ژ دەست بدەت یێ ئامادەیە خۆ ژی ژ دەست بدەت، یێ دەنگی بۆ پوست و پایا
بكڕیت هەما چنە دێ من و تە ژی ژ دەست دەت.
نـوزام بۆچی ئەم كلتورێ پاقژیێ پەیروە ناكەین! ما كەنگی پاقژی هەیە دا دپاقژبین، هەتا راستی بەخش بین، ببورن دەنگێ من یێ منە، بۆ من بهێلن. حەز ژ هەوە هەمیا دكەم هون هەمی ل بیرا منن، هەر ئێك ژ هەوە ل دویڤ قەدارێ وی دنیاسم هون من ناس ناكەن مەژیێ من ژی فام ناكەن.
وێ روژێ شێخێ مە ئەوێ برازایێ ئاغایێ گوندێ مە، ببورن ناڤێ وی ل بیرا من چوویە، بەربژێرێ شارەوانیێ بوو، راستیێ ژ وە ناڤەشێرم، من گەلەك كار بۆ كربوو، لێ بەربژێرێ من نە بوو وی ژی دگەلەك هەلكەفتان دا دەست خۆشی ل من كربوو، من دزانی دێ دەركەڤیت پلانێن هشیارانە هەبوون و گەلەك پارە ژی بۆ هەوا خۆە مەزاخت بوون.
هەلبژارتن هاتنە كرن نە تنێ تێرا خۆ دەنگ برن هەكەر ئەز یێ خەلەت نە بم تێرا دوو سێ كاندیدان دەنگ پویچ كرن، ژ بۆ روومەتی وهەڤالینیێ من تێلەفون بۆ كر دا پیرۆزباهیێ لێ بكەم بەری سوپاسیا من بكەت:
– تە دەنگ دایە من؟
– ببورە تو بەربژێرێ من نە بووی!
– ئەلو ئەلو…..
تێلەفون قوت بوو، هەر ئێكسەر من زانی ئەو چەند دەنگێن من بۆ وی بەرهەڤكرین، هەمی بوونە قوربانێ دەنگێ من.
مەغرەبەكا پائیزی بوو ل باغچەیەكێ خۆش حەجیێ مەتێ كو گەلەك هەڤالێ وی ژی بوو ل سەر شەرەفا دەركەفتنا وی مێهڤانداریەك رێكخست، ئەز ژی گازی كرم، بەرپرسێ هەوا پرۆپاگەندا وی ژی ل گەل بوو، من نەدزانی مەرەما وی ب ڤێ چەندێ ئەوە داكو بەندكێ هەڤالینیێ نە هێتە بزداندن، یان ژی شێخ بكەڤیتە ل سەر گیانێ من و روی ب روی من بێ رومەت بكەت. هێشتا ژ دویرڤە گۆت ئەڤە ئەو ژی هات یێ دەنگ نەدایە من.
– دیسان گەر ئاها نوكە جارەكا دی تو خۆ بەربژێر بكەی، ئەز دەنگی نادەمەتە!
– وەی بابۆ چەندێ ژ خۆ رازیە!
– ژ راستیبێژیا خۆ رازی مە. تۆ رازی ببی یان نە، وێ ژی ناكەمە خەم.
– یێ دەنگ نەدایە من ب كێر هەڤالینی و شەڤبێریا دگەل من ناهێت.
– ئەز رابووم قەیدی ناكەت ئەز بخۆ دێ …
حەجیێ مەتێ و بەرپرسێ هەوا پرۆپاگەندێ نەهێلا بریارا خۆ بدەم. شێخێ مە شێخە د ویلایەتا خۆدا دێ جەهدێن باژێری ب گێسكی پاقژ كەت، هەر زاروكەكێ ژ دایك دبیت دێ گۆلك و میها بۆ سەر ژێ كەت و كەتە خێر، هەر مروڤەكێ بمریت دێ گۆڕێ وی ژ گولا كەتە باغچە، دێ بەردەرازینكا هەر
مللەتەكێ كەتە باخچەیەكێ بخێرو بێر، دێ لێ گەریت هەرمللەتەكێ ل سەر ڤی عەرشی نە بوویی دەولەت، رویڤیێن وان كەتە شێر.
– شێخی هەمی ژێ تێن، لێ نهە ژی ببیتە بەربژێر دەنگێ خۆ نادەمێ!
تورەبوونێ سەر ژێ ستاند:
– كورو مائەز ب هیڤیا یێن وەكی تە و دەنگێ تە بەربژێر بوویمە.
– دەنگ، دەنگە چ یێ من بیت، چ ژی یێ نەزانەكێ بیت، گەر نهو ل جاددەكێ دا بچی دینەكێ خۆ نەنیاسیت دێ بێژیت شێخ من دەنگ دایەتە !شێخێ مە ژی چوویە دامێ ئێدی مننەت ب چ دەنگان نینە. هندێ تنگژیایە تو دبێژی من دەیبابێن وی كوشتینە.
جڤاتا مە بێهنەكێ مت بوو. ئەو گەرسوونا دڤێت سپەیس هەبیت! چاڤ گرا پرچ زەرو روی گەش بتلێ دوویێ یێ شەرابێ دانا بەر سینگێ شێخی، ب رویەكێ رومانسیێ سەردابرنا شەڤبێریا، ب زمانەكێ بیانی گوت:
–شێخێ من ئەڤ شەڤە شەڤا تەیە .
شێخ ژی گەنجەكێ هەلكێشایە بەژنەكا بلند و زراڤ هەیە، دێمەكێ جوان و مێیاتی ب  سەروچاڤێن وی ڤە دیارە. هەكە ئەزێ خەلەت نەبم دلێ وێ گەرسوونا بیانی یێ داگیر كری.
بەرپرسێ هەوا شێخی بێدەنگی شكاند، گۆتێ:
– شێخ تۆ دزانی ئەز ژ جڤاكێن روژهەلات و روژئاڤا یێ شارەزامە، ئەز دەنگێ ڤی جامێرێ نەنیاسم ب هزار دەنگان ناگهورم، دیارە تو نەشیایە ڤی بكەیە هەڤالێ خۆ.
شێخ گوهشی مێزە كرە من و حەجیێ مەتێ بتلێ دوویێ شەرابێ كرە سەرراد و گۆتی:
–  دێ بهێلن شەڤبێرییا مە سەقەت نەكەن هەر ئێك وخودێ خۆ. تو دەهـ دەهواتا بكەی
تۆ گەرا گوڤەندێ نوزانی. هون ب خودێ كەن هەمی هەڕن، تنێ گەرسوون بلا بمینیت