دەرگەهێ ئاسۆیێن تنێبوونێ
خالد عەلی سلێڤانەيی
دەمێ ئەز ب هێلێن زەوی ڤە دهاتم بەند كرن
كی بوو گازندە دكرن؟
كی بوو هەتاڤ ب بستا ساربوونا هەستێ خوە ڤە دبژارت؟
ئێدی ئەز ژ هچكێ شەڤان رە بانگ نادم
دەنگێ من زڕە.. زاڕۆكان ژ لاندكان دئێخت
دەمێ ئەقل دبت ئارمانج
هزرێن مە دبن بەلا سەرێ مە…
نەز ژی نە ئەزم
ئەز ئەز بووم چاخێ تۆزێ با پاقژ دكر
چاخێ زڤستانێ تێهنا گەرماتییێ ژ مە قەردكر
یەك مێژوو من هەبوو، كو جاران ناخێ ئەردی من پێ تژی دكر
ئەو ژی دبن چادرا چەمبەركاتی و سۆتنا گوندێ چەمزراڤی دە
بۆ رەژییا بنێ كوچكێ قەدەرێ.. و بزۆتێ سەرێ نارگیلا دیجلەیی…
زەحمەتە تو د من بگەهی
و قورسە ئەز د تە بگەهم
لەو ئەم هەردو دێ لایەنەك سیێ ژ تێگەهشتنا خوە
ئافرینن…
هەول نەدە خوە بگەهینی من، چونكی
گەهشتن یا ب تەڤە دچت…
هەر ل وی دەمێ مژویلانكان جادە دمالین
و تو دبووی كاسێتەك كەڤنار
د دەستێ گوهدارەك سەردەم دە
شەرمێ ئەدرێسێ خوە دگوهۆڕی
و گەلەك بیرۆكە و تێگەهان ناڤێن نوی بۆ خوە ئامادە دكرن
پەیادە جادەیان دهاژۆن.. و ئەز ل قورنەتا
چایخانەكا تژی سڕ
و دو سەرسەری یێ تژی كێشەیا هەلبەستان
دووكێلا نارگیلان دكن…
ئەم نە هەژینە.. ئەم هەژینە…
هەمی قەرزە.. تو دزانی و دڤێت بهێت دان
خوە ئەو هەناسەیا تو گۆری قورمێ جغارەیێ ژی دكی.
نە بێژە من باران ژ لەیلانێ دۆتن و پێشكێشی تە كرن
ما تو نزانی
نان ب تنێ نە هەلویستێ تەنویرێ یە
یێ بڤێت ئاڤابوونێ بكت
دڤێت كەڤران بشكێنت
و ب تنێ مری نەشێن گۆڕان بكۆلن…
ئەز دێ هەمی رابردووی
ب برويسیێن شوباتێ ڤە خەندقینم…
دێ ماچەكێ ژ تە خوازم
ماچەكا ژ بەری بیست و ئێك سالان
خوە ل ڤێ زستانێ پێ گەرم كم…
دبت تو باوەرنەكی كو هێشتا بوهار
یێن ژڤانێن كەڤن بۆ مە ددن ئالیەكێ
لێ ئەز باوەر دكم تو ڤەگەڕیانەكا ئەورەك ڤەدەری…
كرێتە ئەز ب چاڤێن كەسەك دی
تەماشەی تە بكم…
دگەل هاتنا ژڤانی
نابت خاپاندن ئەگەر ئەز نەهێم
چونكی رێككەفتنا مە ل سەر پێلێن خابیری بوو…
نزانم هێشتا ئەو پرا سەرسەری تێرا جهێ
ئەنییا پێلاڤان دكت…
دەمێ ژ “چەمزراڤی” رۆژ دهەلات
هەمی دەشتێ دەستوری دخوازت بۆ هندەك رۆناهییێ
هۆسا بۆ من دیار دبوو…
نە ماسیێن مەزن مان… و نە شكەفتكا بچووك ما
ئەز ڤەگەڕیام و ملێن من گران
من نەدزانی كو هەمییێ ل دویڤ خوە دكێشن
خانم ژی، پەشێمان بوو
دەمێ دگۆته من: تو كرێتی تو من نە بینی
ئەڤرۆ ئەز هەمی دووڕیانێن رەڤێ مە
ئەز ژمێژە ژ هەر چوار ئالیان دەركەتیمە
هندی تە خەون هەبن، دێ د ڤێ هەلبەستێ ڕە چن
لێ هیڤیدارم خەونێن ژ خەوا خوە مەزنتر نەبینە
وەكی من نەكە، نە تو دگەهی و نە خەون…
ب ناڤێ هەلبەستێ سویند نەخوە
نە سویند ب تە دكەفت و
نە كەفتن ب سویندا دبن
نەبە ئەزەك دی…
ئەز سەرخوەبوونا خوە ژ خوە دخوازم
هەمی دەسهەلاتێن دلی ب نەرم وئارامی
بهێنە ڤەگوهاستن بۆ ئەقلی
چونكە كەسێ ئەز نە دۆتم سەرانسەری
ڤێ هەلبەستێ، ژبلی دلی
من نانەك و قورچەك ئاڤێ و بیاڤەك ڤەكری بۆ قێڕییا خوە دڤێت
ئەگەر تە بڤێت تێر بمری، گەلەك بژی، گەلەك خەونان ببینە
وەرە دا ئەز ڕهێن هەلبەستێ بكم سەكسۆكە و راپەرەكێ مۆدرن ژێ پەیدا بت
باشە تو ڤێ بۆ كێ دبێژی؛ ئەی بێكەسۆ، بتنێیۆ…
تو دزانی گوهـ قەلان
و كەس نە ئامادەیە تو شڕشڕا خەمێن خوە
د گوهێن وی دە دەرڤالا بكی
ل وێراهە.. هاڤیبوونەك بۆ فرۆتنێ یە
ل ڤێرێ.. هەمبێزەك هاڤیبوویە
چ جغزەیەك فەلیتەیە…
جیهان یا بەرەڤ “زەوال” ڤە دچیت
رۆژهەلات، رۆژئاڤا، باكوور و باشوور
هەمی ل بەندا ئێكسپایربوونا ئەردی نە
ئەرێ ما ڤی ئەردی ژی ئیكسپایر نینە؟
هەمی یێ هەول ددن پەراسویێن خوە بكن پێسترك
بۆ ئاڤاكرنا سەرگیفەك دی ل سەر ئەختەرەك
ب هاتنا وان نە بەختەوەر
دا جارەك دن، ژ هەناسەیێن خوە یێن گەنی تژی بكن.
تێدگەهن و ناگەهن
لێ.. تو تێبگەهی و پاشی بگەهی
چێترە تو بگەهی و پاشی تێبگەهی
من نەڤێت كەس د خزمەتا من دە بت
هزرێن من وەفادارترین بەردەست وخزمەتكارێن منن…
جارەك دن سترانەك كاڤلكری ژ پستۆكا شەڤێ دزێت…
هەمی تشت هەڤدژن
وەك بارانێ مە دشوین، مە دجوین
وهێشتا كەسێ چ شرۆڤە بۆ گوڕییا ئاوڕییا
د چاڤێن تنێبوونا من دا نینە!
