هەڕە ئازادیيێ بخۆ
حه‌ميد گراڤى
مامێ شه‌عبان وه‌كى هه‌رجار ، قه‌ستا چايخانا پيره‌مێران كر، ئه‌وا هنده‌ك هه‌تا ڤێگاڤێ ژى ب تڕانه‌ڤه دبێژنێ چايخانا چاڤزيقا، بێ لومه وه‌كى سه‌لويێ زه‌مريدێ گۆتى: ئوفيسه بابو، بێ لومه، هندى پيره‌مێرێن ژنمرى و زه‌لامێن ژنبه‌ردايى ل وێرێ خڕڤه‌دبن، هه‌ر ژسه‌ركێ سپێدێ يێن ل وێرێ، چاڤێن وان وه‌ك رادارا مرورێ حسيرنابن، د گه‌ل هه‌ر فڕه‌كا چايێ ئاخينكه‌كێ ب حه‌لالى دهه‌لكێشن، ئه‌و كولانكا ته‌نگا ب ره‌خڤه، ژنكێن دانعه‌مر ياتاپوكرى، گيايێ چياى و كه‌سكاتيێ و گه‌له‌ك جاران دێ بينى تشتێ هشككرى ژى تێده دفرۆشن، تيته تيتا هورێنێن ترۆمبێلا و قه‌ره‌بالغ و ده‌نگودۆرێ كارتفرۆشا، تام و گه‌رمييه‌كا دى يادايه چايخانێ و مه‌يدانا چاڤزلكانى ياگه‌شكرى.
ئه‌و رۆژ نه‌وه‌ك چ رۆژا بوو، يا باشقه‌بوو، زێده يێ په‌ريشان و خه‌مگرتى بوو، هێشتا نه روونشتى سه‌عدوويێ قونخوار ده‌ستێ خوه ل به‌ر ڤه‌گرت و گۆتێ خۆدێ عه‌مرێ قوچالى درێژكه‌ت، دێ كا تشته‌كێ بۆ مه به‌رده، ئينا د خوه خه‌بتى، روبعه‌ك كره دده‌ستانده و گۆتێ: ها بگره گه‌نده‌ڵ، ئه‌ز ب وى خۆدێ هه‌كه‌مه هه‌كه حالێ ته ژمن خوه‌شتر نه‌بت، ئينا ده‌ڤێ خوه تێكدا و گۆتى: ته روبعه‌كا قوڕمچى يا دايه من، ته چ عه‌لعه‌لوك نه‌داينه من، چایچى ملێ سه‌عدوی گرت و گۆتێ ماڵميرات، ما تۆ ب چ عه‌ردێن دى ناكه‌ڤى، دێ هه‌ره سێ گه‌زا دوور كه‌ڤه، چايه‌كا ره‌ش و شرين ده‌ينا به‌ر و ب دلێ خوه ڤه‌خوار، زۆرێ مه‌لول و په‌ريشان و پوسيده‌بوو، هزره‌كێ دئينا و هزره‌كێ دبر، كه‌فته داڤێن دالغا و ئاگه‌هـ ژده‌وروبه‌رێن خوه نه‌ما، ل زڕزڕا ده‌نگێ په‌يا‌له‌كێ ڤه‌جنقى، د كيسكێ خوه خه‌بتى، و ژبڕميتێ داقوتا و جگاره‌ك به‌ردايێ و د ناڤ دوكێلا وێده چوو، هزرێن وى مينا رۆژا حه‌شرا ئه‌نفالا لێ هاتن، موعيزى و ده‌ستكورتيێ ژهه‌مى ملانڤه دوورپێچكربوو، داخوازى و پێدڤيێن ماڵێ مينا فيشه‌كێن سێتيرێ لێهاتبوون، پاكێت، پاكێت، خوه دكێشانه گه‌لاليشكێ، د گۆهێن ويدا دپه‌نگين، ژكێرێ ده‌ست پێ بكه‌ت و ته‌كبير و چاره دێ چ بت، كه‌ڤنه پێشمەرگەيه، هەمی تەمەنێ خوە، ب چول و چیانڤە يێ بوراندی، به‌لێ ئه‌ڤرۆ خوه پیرەمێرەکێ كه‌فتى دبينت، شیانێن هەلگرتنا چەکی نەماینه، مل و دەستێن وی يێن خاڤ بووين، سه‌رێ وى يێ بوز و قژاڤژى دبن له‌پكا ده‌رسوكێدا يێ ده‌ركه‌فتى، سه‌رێ سه‌ربارا، خەلا و گرانیێ يا خوه بەسەر باژێريدا گڕتی، شه‌رێ برا كۆژيێ ده‌رگه‌هێ هه‌مى مالا يێ قوتاى، هه‌ردوو كۆرێن وى، ماڵ ياهێلانه بهيڤيا خودێڤه و يێن چووينه به‌ڕۆكێن شه‌ڕى.
ب چ حالێ هه‌ى خوه هاڤێته د ترۆمبێله‌كێ دا و قەستا ماڵا دۆست و سەرکردێ خوەيێ به‌رێ کر، زۆرێ ب هيڤى بوو، ده‌ستڤالا نا‌ڤه‌گه‌‌ڕت، ژبه‌ر كۆ دۆستێ وى يێ فيرهاى، كوڕێ وى بازڕگانه‌كێ ناڤداره، د خنيمه‌ت و به‌هه‌شتا خۆدێ دا دژين، خولام و خودام و كۆچكا وى ژمرۆڤان خلاس نابت، سفرا وى يادانايه، حه‌وشا مالا وى دێ بێژى مێرگێن به‌هه‌شتێنه، ياپڕه ژگولێن هندى و هوله‌ندى و ئيسپانى، مرۆڤ هه‌ر حه‌ز دكه‌ت، بێهنا وان گولان بێهنكه‌ت، ب هه‌ر حاله‌كێ هه‌ى، بێ ڤیزە و پاسپورت خالێن پاسەوانان دەربازکرن، یێ ناڤدارو ناندەھ بوو، دوه‌ختێ خۆدا، خۆدان هه‌لويست بوو، ماڵا وی ژى خوارنگەها هەژاران بوو، هه‌ر دەمێ چەکدارێن شورەشێ ئاسێبان، ب نان و ده‌وارێ خوه دهانا وان دچوو، چه‌نتكێن وان ژ نان و پێخوارنێن وى بێ به‌هر نه‌دبوون.
ل پێشوازيا مێهڤانان روونشت و بخێر هاتنا وى كرن، هه‌ر چه‌نده خۆدانێ مه‌قسه‌دێ نه‌ديت، چونكى ب شه‌ڕيڤه د مژوول بوون، مەشکا دەستکورتی و بێ حاليا خوە بۆ ژنكان ڤاڵاکر، نه‌شيا خوه، داخوازا هاریکاریێ كر، خۆدانا مالێ لێڤێن خوه لێكدان و گۆت: دۆستێ ته يێ چوويه ئه‌مريكا چاره‌سه‌ريا خوه بكه‌ت، كوڕك ژى يێ ل به‌رۆكێن شه‌ڕى دژى ياسا شكێنا.
ب دله‌كێ مه‌ليل ژديوانا وان ده‌ركه‌فت، ل كۆژيێ مالێ، به‌رى ژده‌رگه‌هێ مالێ ده‌ركه‌ڤت، كوڕه جحێله‌كی گۆتێ: مام من پسياره‌كا هه‌ى، تۆ به‌رێ پێشمه‌رگه بووى، ئينا گۆتێ به‌لێ مام ئه‌ز پێشمه‌رگه بووم، ئينا گۆتێ تە بۆچی چەکێ شوره‌شێ هه‌لگڕت بوو، ئارمانجا تە چ بوو؟ هه‌لبه‌ت ژسه‌روبه‌ێ وى دزانى كا هاتيه چى، ئینا بێ دوودلی گۆتێ: مام مه ژ بۆ ئازادیێ چه‌كێ شوره‌شێ هه‌لگرت بوو. ئینا گۆتێ: مام مرازا تە بجھ هات، نۆکە تۆ یێ ئازادی، هەرە تێر ئازادیێ بخوو، هه‌تا تۆ پێ حه‌مه‌ر دبى، ئه‌م بۆ پاره‌ى دكه‌ین.
