ژ وەرزێ گولا

هزرڤان

1
وێ گۆت بوو: دهێم، ل وەرزێ گولان
داکۆ ئەم پێکڤە سترانێ بێژین
ببین پەلاتینک
تەڤا ژیێ خوە ل داوییا بەهارێ
شاد بووم ئەو دهێت
ببوومە گۆدۆ ژ بەر هاتنێ(١)
خەون دستران
جوانی دباری خەم دبوونە قڕان(٢)
هەر زەنگا دهات ژ تەلەفۆنێ
دچووم هاوارێ
دلبەرێ چما بەهار ل من بەهی
من سەر سپیکر ل بەندەمانێ
مالا ژانایە تەڤ ستەما یارێ
گەر من زانیبا چاخێ چاڤەڕێ
من ل بیر دئینی، دا ئەز یێ شاد بم
دیارە چووبووم رێکا نەهاتێ، رێکا ژ بیرکرنێ
خەونا من سوور بوو رەنگێ هنارێ
سووند ب چاڤێن تە
ئەڤە ژ رۆژا کەڤتیم داڤێن تە
من بیر نە کرییە، ژ بیرکرنێ بکم
ئەز ژ سۆزا خوە ناهێمە خوارێ.
2
ئەفسانەیە چیرۆکا من
هەما ژ ئەزەل
ل بڕیارا وێرەکی یێ
بەهانەیە ئەڤینا من
ترسەک هەیە ژ دەستپێکێ
ژ زانین و زیرەکی یێ
نە من ناڤ و ناسناڤ دڤێن
نە رووگەهـ و دراڤ دڤێن
نە کولاڤ و پێلاڤ دڤێن
گەر تە بڤێت حەز و هەستێن من تێبگەهی
دڤێت دوور ببی
ژ پیلانێن داگیرکرنێ
ژ هزرا باخوێ و کۆلەتی یێ(٣)
دەلالا من،
ئەڤ گۆتنە ژ حەزکرنێ یە
دوورە ژ داڤێن خاپاندنێ
ئەگەر تە بڤێت بەرێ دارێ خێڤە بکی
هزر بکە ل چاندن و سەخبێری یێ
ئەم تڕالن(٤)
چاخێ ئومێد دگەهیتە دەڤێ دەری
ئەم د خەون یان نە ل مالن
پشتا مە ژی چەمیایە
ل بن بارگرانییا خوەزی یێ.
3
بهێلە- وەک پێلەک بای بچم
وێ هە سینگەک پاکژ..
بێ گەمار
ل بەندا هەناسەک مشت ژیان
خوە کر باج
بهێلە- وەک قورچەک ئاڤا کانی یێ
ل بەر هەتاڤێ ببم نەم(٥)
کولیلکەک ل بەندا خوناڤەک هینکە
بێ ئاڤ ما، بوو قەراج
بهێلە- وەک پێلەکا مژێ
ببم گریان.. ببارم نەرم
مێرگەکێ، ل سەر کنارێ بەندەمانێ
سینگ یێ ڤەکری
سترانا “لۆرالای” دبێژیت(٦)
دا ل گەردەنا وێ ببم ماچ
بهێلە- هندی وان بڤێت کین
ل دژی من ب ئارینن
ئەز ژ هەزکرنێ تەڕم
گەردەنەک ل بەندا منە و دوو مەم
پێڤە دبمە خاچ.
١: گۆدۆ- قەهرەمانێ قوڕتالکرنێ یێ چ جاران نەهێت
٢: قڕان- بریایی؛ نەیی
٣: باخوێ- خودان
٤: تڕال- تەمبەل
٥: نەم- هلم، ئەو تەراتییا د بایی دا
٦: لۆرالای- چیرۆکەک هەلبەستییە، ل سەر ئەنیمۆ و ئەنیما.