ئەوێ سەرخۆش
د. عارف حیتۆ
پێکەکێ عەرەقێ و
لبەکا باهیڤێن خۆماڵى و جگارەکا تووتنا گارەى
تبلەکا هنگڤینێ کەڤرینێ شرینێ و پەیڤەکا مجد
د هەگبەیا ڤەگەڕێدا…
وەلات پێ دبیتە پەرستگە و ئەوێ سەرخۆش
ل سوجدەگەها وێ مریدە.
تەرتیلێن ب سەروا، دکەتە ستران…
سیڤاندۆک دهێنە سەمایێ و تەڤ چلخانە دخەندقینە
هەکو دەستێن نزاکەر سەرئەڤراز دبن،
نیرهە ژ گەمیڤانان ڤەددەت، پێل ل پێالن سوار دبن و
ماسى یێن بچووک، ل بن پەڕێ ماسى یێن مەزن
گەشتێن چوونێ و هاتنێ دکەن…
رۆژ پاسەوانا قودرەتێ و داوى یێن خۆش
نۆش!…
پاپۆر.. پێلێن دەریایێ دبڕیت و ل چ بەندەران
تێهنێ ژ چاڤێن نەنڤستى داناقوتیت!
خەریبییەکا د دلێ دلیندا خەرفتى و ئێدى نەما
ل بەندەمانا رێژگەهێ، خەتیرەکا دى بەردەتێ و
بیرەهى یێن خوە پێڤەکەت.
ئەو گەڕیدەیە…
د هۆش و نەهۆشییا پەردێدا، خۆدیکەکە
ل خوە دنێڕیت و دبێژتە خوە نۆش!
دەستەکێ وى ل ئاسمانان باقێن زیۆسى دپەرخینیت
دەستێ دى ب عەردیڤە توندە و دلبەرەکا ژ خەونێ چێبووى،
جار دنڤینیت، هندەک جاران ژى دلڤینیت!
ل وى دەمێ باران بارى و پەزکویڤییان، هوڕکرییە قویتێ ئاقارى
وى ل سەر ستێرا ئۆمێدەکێ بەلەدى ل پشتا رۆژا ددان
هەکو دنیا بوویە تارى و رووڤییان دەستداى دستارى
وى ئاوازەک (دلشاد سەعید)ى دگەهاندە سەر رووبارى
تەڤى پرتێن محەبەتێ، ب جەمەدێڤە بوونە بەستى و
کەسەک نەبوو گویفکا ببەتێ!
صەلەواتێن شێخێ شێخا و نڤشتى یێن ”مەلە حسۆى“
ل مەیدانکێ، هەراجکرن حەپکێن گێچێ و
ریشالۆکێن سیاسەتێ…
من گوهلێیە، میوزیک یا ب کوریا بایڤە
دێ گەهیتە هەمى جهان
وەلێ ئاواز… نەگەلەک یا ب دلێ منە!
شەملکەکا بەر دڕیایى ل سەر زویرکێن وارى نهیا و
ئەوێ سەرخۆش…
دێ بەر قیبلە، هەمى حەزێن خوە ڤەکوژیت!
ما حەزێن کەل، دێ چ لبنێن دى ل سەر دیوارى زێدەکەن؟
یان چەند رێکێن دى یێن گەهینێ دێ ڤەکەن؟
هەر رێکەکا ل بەر وەغەرێ یان ڤەگەڕێ، بگڕنژیت
دێ د همبێزا وارگەهێ رۆژێدا کورک بیت
ئەو وارێ تەقنەکا نویسەک ب کوملەکێ وى یێ سپیڤە
درەڤیت دکەڤیت غارددەت رادوەستێت دلڤیت دنڤیت
رادبیت روودنیت دکەنیت دگریێت دحەلیێت دکەویێت
بەرزە دبیت و دزڤڕیتەڤە
لاڵ دبیت و دبێژیتەڤە
دمریت و ڤەدژیتەڤە
دبینیت دخوینیت پەسەند دکەت رەت دکەت
هەمبێز دکەت ژخوە دووردکەت دهاڤێت ڤەدگریت
دەردئێخیت و دکەتە د ژوورڤە
ئەوێ خەونا دوهى و پێرا پاتێ قێڕى
هێژ ب چۆکێ ویڤە قمیایە و جەمبازییا دکەت، ژێ نەبێزار!
خەونا مژدار.. شلێرەکە د چاڤێن زیقێن ئیرۆسیدا
تەڤ خوەرسکێن ژ ئەفرۆدیتێ ڤەپەشاینە ب پەنجەرانڤە
پارسەکێن بەر هەتاڤێنە و د تاریێدا دل پێ دئاریێن
ئەو ب دەهمەنا شلێرێڤە بەنیشتەکێ بێ شەکرە و
بایەکێ باکۆرى، هەستێن هەلچوویى ددانتە سەر
صەندەلەکا ل باخچێ گشتى مایە ب تنێ
سەرەداڤێن یوتوبیایێ، خەونڕۆژکێن سەرمەدى بۆ دئێختە داڤێ..
نۆش!…
ل بیاڤەکێ دەرڤەکرى، هەر تیرەکا ژ تیرکڤانى مندەهۆش
هەر نێچیرڤانێ ل بەر دەستێ نێچیرا خوە، بوویە کڕنۆش
قەبخواستنا گێمەکى دکەن، نە ل ڤێرە بیت، گێرە بیت!…
هەمى ماڵ ماڵێن خودێنە
وەلێ خودێ… یا ژ سەر عەردى بارکرى!
خر دەستەکا خوە یا دگەل باى فڕێکرى و
مۆرا خوە یا دگەل خوە برى…
– هەمى ژبەر تەیە، گێلێ سەرخۆش
یێ هۆشێ خوە کرییە داردەستێ قەدەرێ و
خەونا خوە دایە موغبەرێ!
– بۆچییە هۆش؟
نۆش!…
من گۆزکەکێ ئاڤێ رەشاندە دێمێ وى
ب رۆندکڤە گۆت: دگەل من نەکەن
هوون ب خودێ کەن، ڤێ منەتێ دگەل من نەکەن!
ئەز کولیلکەک بوهاریمە و دار ب منڤە شەهنازن
ئەز هنجارێ رەزڤانیمە و زنارەکێ دفنبلند
ل سەر باڵگەهێ ئەڤێ بەهەشتا مەست و خۆش
بۆچییە هۆش؟
ژ من ڤەبن!
هشیار نەبم…
دا نەبینم کاروان یێ د ئاڤەکا مەند دا
خیابانێن پان و فرەھ سەرابن و گولێن تەییسۆکێن نایلۆنیى،
ل ناڤ چیمەنان ڤڕا بدەن
کەسێن خەمگێن، ل قوالچکان بچەورن و جاما خەمێ،
د سەردا بچیت…
نۆش!…
پێکەکێ عەرەقێ و
لبەکا باهیڤێن خۆماڵى و جگارەکا تووتنا گارەى
تبلەکا هنگڤینێ کەڤرینێ شرینێ و پەیڤەکا مجد
د هەگبەیا وەغەرێدا…
وەڵات پێ دبیتە پەرستگە و ئەوێ سەرخۆش
ل سوجدەگەها وێ شاهەکە…
سەرلەشکەرێ وى یێ هاتییە ساڵڤگەهێ
ئەڤ گولستانا گولوەرین، ناهێت دزین!
ئەو گەڕیدەیە…
پیەکێ وى ل ئەنیا شەڕى غەدارەیە
پیێ دى ل بەر، نۆبەتا مۆچێ ریعایێ، مەدارەیە
ئەڤجا بهێلنە دناڤ بلوورا سەرخۆشیێدا و
کەس دەرگەهێ وى نەقوتیت!
نۆش!…
2023
