بیرەوەری
محسن قۆچان
د کولۆزێن بیردانکا من دا
زڤیرکەکا رویدانایە
ترس، برس، ڕەڤ، تیکێن دیوارێن زیندانێ لێ د جهـ گرن
شەمەتەیێن بێسەروشوین
تێک دئالزن
نە چ رویدان خۆ ژ بیر دکەن
نە دڤەڕەڤن
نە ژی دمرن
بیرا من دهێت
ئەز ئەورەکێ شەڕۆکە بووم
من سەرمیرا هەمی خەما
دکر ژەهرەک یا بێ شەما
ژ دەرێ کونمێريیا دئالیسی
ئەز بەرماکێن تەوالەکێ ل خۆ بەرزەبووم
لسەر کێليیان دچۆمە لیسی
گیانێ من یێ پرت پرت بوو
دا ژ بیرڤە بچم
من پرت ل دویڤ پرتێ دڤەچنی
پێنگاڤێن من د دویراتيیێ دا دبوهژی بوون
دگەل بەفرێ جارەکا دی شوین دبوون ژ نوی
ئەز ب هەمی ڤە ڕەشبایەکێ بێ پەردە بووم
چیڕۆکا مە دکرە پنی
د تەڤ دەمان دا ئەز ل ژڤانێ دویماهيیێ بووم
هەر دویماهيیەک دەستپێکەکە
لەورا دویماهی گیرۆ دبیت
دخەیشیتن هەما ب قەستی
لێ نزانم…
ژ دەستپێکێ تە بۆ هێلا
هنگڤ ژ هێلا چاڤێن تە
بۆیاغا لێڤێن من تەڕ بکەت؟
سمبێلێن من بکەت قەشا، بکەت بەستی؟
ما تە ژ بیر کر؟
ل دويماهيیێ هەر تو هەبووی
ژ دەستپێکێ هەر تو یا هەی و
د بنیات دا عشقا چاڤێن تە شوڕەش بوو
د گەهێن من دا خۆ د کرە مەی
دا بێژمە تە…
چێ دبیت ئەڤرۆ بەفر بباریت
د گەل بەفرێ
ئاڤ د چاڤێن من دا دپەنگیت
پتر ژ کوژیکێن کۆلانان
ئەڤا هەنێ بەرەژەنگێن نەبوونێ نە و…
هەمێ نەبوون ل چاخێن ئالۆز
دبنە مژداری، دبنە تۆز
ئێکێ ژ دوان بۆ من بکە
یان دێ بەفر من داعویریت
یان ژی تو خۆ بکە بەفر
دا حەزێن من یێن دۆژەهی
تافیل بکەی و د گەل خۆ ببەی
14/5/2023
