گەڕیان و پرس
جەگەر كەمال ڕێكانی
ئەز گەڕیام
دا بپرسم
ل تاخ و گوند و باژێڕان
ئەرێ گەلۆ كێ دیتيیە
تەیر بشێت بێ پەر بفڕیت؟!
مال بێ ستوین خۆ راگریت؟!
ماسی بێ ئاڤ قەت نەمریت؟!
ئەز چووم و هەر گەڕیام
ل نهال و دەشت و چیا
ل تەڤ ئەردا سەرێن رێیا
لێ چ بكەم من نەدیت و قەت نەدیت
ئێك بێژیتە من
تەیر دشێت بێ پەڕ بفڕیت!
و مال بێ ستوین دێ خۆ راگریت!
نەخێر من نەدیت و قەت نەدیت
ئێك بێژیتە من
ماسی دێ شێت بێ ئاڤ ژیت و نەمریت!
لەورا من دا رێكێ
و چووم و چووم و.. چووم
دا وەربگرم بەرسڤا خۆ
چونكی نەشیامە دلێ خۆ
لەورا ئەز نەراوەستام
و چوومە نك
تەمبیرڤانەكێ و گۆتێ:
تەمبیرڤانۆ ببێژە من
سەرێ من ب ڤێ پرسێ
دئێشیت و یێ گێژە
برینا من یا دژوارە
و یا روحا من دكێشە
تو ب خودێ كەى بۆ من بێژە
ئەرێ بێ داڤێن تەمبیرێ
تەمبیر دهێت ژەنین؟
تەمبیرڤانی كرە كەنی و گۆت:
ئەز خولام.. یا ئەزبەنی
تو دزانی بۆچی دكەمە كەنی؟
من گۆت: تەمبیرڤانۆ دێ بێژە
كەلا دلێ خۆ داڕێژە
وی گۆت: ما چ بێژم
نێ تەمبیر ب وان تەمبیرە
گەر ئەو نەبن
وەك مرۆڤەك ئێخسیرە
كەنگی تە دیتيیە ئێخسیر
ل بەر دارێ سێدارێ كەنین
داكو نوكە مۆزیك بێ داڤ بهێت ژەنین؟
ئەز چووم داكو هێشتا بگەڕم
دا وەربگرم بەرسڤا خۆ
و تەنا ببیت ئەڤ دلێ من
ئەز گەڕیام و چووم و.. چووم
من دیت باغەڤانەك
من ژ وی ژی پرسی
ئەرێ تو نابێژیيە من باغەڤانۆ
ما باغ بێ گول و دار دشێت ببیتە باغ؟!
وی گۆتە من: نێ باغ ب دار و گولان باغە
گه‌رئەو لێ نەبن، باغ نە باغە
باغ بەس ئاخە
كەلەخەكێ مریيە، نەیێ ساخە
ل وی دەمی
من زانی
نە تەیر دشێن بێ پەر بفڕن
نە ژی مال دشێن بێ ستوین خۆ راگرن
و نە ماسی دشێن بێ ئاڤ بژین و نەمرن
و نە تەمبیرڤان بێ داڤێن تەمبیرێ
دشێن موزیكێ ب ژەنن
و نە ژی باغ دشێن بێ دار و گول بمینن باغ
و نە باغەڤان بێ باغ دبیتە باغەڤان
ئەز چووم و چووم و.. چووم
ل سەر گرەكێ بلند
و ب دەنگەكێ مەلیل و نزم
من گۆت و هەر بۆ خو دگۆت
ئاخ و هزار جاران داغ
ئەگەر هۆسا ببۆریت
پانێ ستوینا وارێ من
ڕۆژ بۆ ڕۆژێ
یا پرت پرت دبیت
ئەگەر كەس لێ نەبیت خودان
كێم یا مای ئەو ژ بن بچیت
و مالا من وێران و كاڤل
و بن ئاخ ببیت بن ئاخ ببیت!
