تاک و بەردەواميیا گەفێن هەلوەشیانێ
دلدار محەمەد
بەری نوکە ل چەرخێن بۆری هەبوون و ساخلەم راگرتن و پەیداکرنا تاکێن ئاڤا بۆ جڤاکان دهاتە زڤراندن، ژبەرکۆ ئەو ب بنواشەیێ جڤاکی دهاتە دیتن، بەلێ نهۆ دڤی چاخی دا جڤاک بتنێ نەمایە بەرپرسیار ژ نەهێلانا سەربخوییا تاکان پشتی تەبکا عەردی درویشمێ جیهانگیریێ بلندکری و ناڤێ گوندەکێ بچویک دانەیە سەرخۆ، پرسیارا زیق ئەڤە ئەرێ گوند بوونا جیهانێ (ئەگەر گوندیاتیا وێ ژی وەکی یا کوردان بیت ) گەف نینە لسەر نەمانا تاکی؟
پێلێن ئەپێن تۆرێن جڤاکی دلێ تاکان خۆش دکر کو دێ بەرەڤ خۆڤە دەنەرێ، ئێدی نامینن دووکەفتی بەلێ پرسیار ئەڤەیە، ئەو تۆرێن جڤاکی یێن باس ل شورەشان دکەن و خۆ ل (بهارا عەرەبی دکەنە خۆدان ) رێز ل تاکی گرت یان جارەکا دی تاک کرە ئالاڤەیەکێ ئارمانج بەرزە و بەرەڤ کومێ هاژووت؟
ئەڤە وێ رامانێ ددەت مانا ل پشت لاپتوپ و شاشەیێن موبایلان رامانا بتنێ مانێ وەکو جاران نەهێلایە.
دەستیریێ بدەن ئەز دێ پرسیارەکا دی ژی کەم، ئەرێ ئەڤ هەمی مژویلیا مە بخۆڤە، ئەڤ براندنا پەیوەندیێن جڤاکی، تێرا هندێ کر کو ئەم نەبینە دووکەفتیێن پەیچێن ئاغایەکی ؟!
ب دیتنا من مە تاک هەلوەشاند و حەزێن وی بەرەڤ کومێ ڤە برن و مە ئەو نەچارکر کو ببیتە دووکەفتیێ دووکەفتییان، ل رۆژهەلاتێ تاکگەرایی نەشیایە رامانا ل خۆ گەریان و خۆ ڤە دیتنێ بدەت، هندی وێ رامانا بتنێ مان و بتنێ هێلانێ دخودا هەلگرتی، ما تاکەک هەست بتنێ هێلانێ بکەت دێ شێت خۆڤەبینیت، یان دێ هەستا بەرزەبوونێ پتر تێدا شوین بیت؟
ب دیتنا من کەنگی نانێ مە ژ دەستێ سەرداران هاتەدەر، کەنگی پێناسامە و دانەنیاسینا مە بۆ ئەرکێ مە بتنێ و ئەم بۆ دیاربوونێ د پێدڤی یێن دیتر نەبوین، هنگی دێ تاکێ مە ژی بیتە تاک و شانازیێ ب هەبوونا خۆ کەت.
ئەگەر مە ئەڤرۆ دەلیڤەیا لێ زڤرینێ نەمابیت ژی بۆ سوباهی ئەڤ پرۆسە دێ یا ساخلەم بیت کو ئەم ژ ئاڤاکرنا زاروکی دەستپێدکەین، وی ژ بن رکێفا حەزێن مەزنان دەر د ئێخین، ئەرێ تۆ دبینی زاروکێ مە بتنێ ئەکتەرەکە حەزێن مەزنان نیشان ددەت؟ ل رۆژا روون ئەڤه یا دهێتە دیتن، بابەک یێ زارۆیێ خۆ بۆ گەهاندنا پەیامێن خۆ دکەتە کەرستەیێ ڤیدیویەکا پەیامدار ؟! ل رۆژا روون زارۆ یێ دهێنە دیتن دناڤ هەلکەفتێن مەزنان دا !
بڤی دەستوداری ئەم دێ سوباهی ژی خۆدان جڤاکەکێ کومێ تژی تاکێن بێ ئاراستە و پلان بین بۆ هەبوونا خۆ. رەنگە ژی گەلەک جاران ببینە حەیزەرانێ دەستێ هندەک سەردار و سەردەستان کو ئەوان بدەست دڤێت ئەم نەبین و د هەبونەکا بێ ناسنامەدا ببهوژین، ب پلە ئێک ئەڤ ئەرکە دکەڤیته سەر ملێن سەمیانان کو زاروکێن خۆ وەک زارۆک بینن نەکو وەکی ئالاڤەیێ بجهـهاتنا هندەک حەزێن وان، ما مەرجە جڤاکی دایکەک بەری پێنجی سالان شکاند بیت ئەو ژی ئەڤرۆ زارۆکێ خۆ ب ئامادەبوونا وی ل جڤاتێ بشکێنیت و ببێژیتە خودان ژیەکی (خولامێ تە ) یان ( خوداما ) تەیە !؟
ژبلی ڤێ ژی سازیێن گرێدای زاروکان پێدڤی یە زەندو باسکێن خۆ هەلدەن، ئەڤە بیست و سێ سال ژ چەرخێ بیست و ئێکێ بورین، ما ئەرکێ وان بەس لەیزاندنا زارۆکانە ل سەر دەپێ شانۆیان؟!
هندی ئەم زارۆیێ خۆ وەک ئامراز بینین، دێ پتر تاکێن لاواز پەیدا بن و سباهی و رەنگە دوزبا ژی بکەڤیتە دەستێ کومەکا نەهشیار، هنگی دێ ئاڤابوون ژی کەفتە گۆمانێ، چونکی ئاڤابوونا بێ هشیاری ژبلی کو ژیێ وێ یێ درێژ نابیت، پاشەرۆژا وێ هەر هەرفینە، هۆسا هەلوەشیانا تاکان دێ مە بەرەڤ جڤاکەکێ بێ تاک و کومەکا کۆرە دەتە ڕێ.
برینا نەهشیاریێ ژی هنگی تیمار دبیت هەکۆ رەوشەنبیر و هزرمەند پیچەکێ ژ بەرژەوەندا خۆ دویردکەڤن و دەمەکی ددەنە هزرکرنێ د ئاراستەکرنا یێن دیتر ژی دا، بەلێ هندی هەمی بتنێ هەر ئێک بۆ بەریکا خۆ بژیت، ئاڤابوون و پەیدا بوونا تاکێ هشیار دێ درویشم بیت و نەزێدەتر، رەنگە رۆژا مە ژ رویێ ئاڤابوونا هزری ڤە ژ سوباهی یان ئەڤرۆ ئێڤاری ژی، ئاڤاتر بیت.
