كورتە چیرۆك
ئەحمەد یاسین
زللەهەكا ب هێز ل رویێ منێ چەپێ دا، كفێن ژ دفنا من هات، سۆراتییەكێ ئەز گرتم و قڕكا من تەنگ بوو، من هزر كر دێ خەندقم، هێدی ژ ناڤ بچووكان من خۆ ڤەكێشا و رك ل وی شەڕە سەیی من تەماشەكر، هەر چەندە ئەز نە بچووكەكێ وەسا شویم بووم و من نەزانی بۆچی كەلا خۆ ل من دارێت، بتنێ یا من ئەو بوو، ئەز ژ بچووكان زیرەكتر و شەهرەزاتربووم و من دزانی دێ چەوا و ب چ رێك شەكرۆكێن خێرێ ب دەستخۆڤە ئینم، من دڤییا بگریم و گرییا من زوها بوو، ژ بلی وێ زللەهێ هزار و ئێك قەسێن كرێت ژی فاتێ د من وەركرن، چەند پێنگاڤەكان بۆ پشتێ چووم و ل بەر وی دیواركێ ئاخێ روونشتم، هەڤالێ من گەهشتە من و نیڤا دەستێ من ڤەكر و شەكروكەك كرە تێدا و گۆتە من: “من دوو وەرگرتن، ئێك بۆ من و ئێك بۆ تە” ئەوی نە ژ دل پێڤەمان شەكروك دا من، نە ژی ب خێرا خۆ، نە ژی ژ ترسا، یا ئەز تێگەهشتیم، وەسا هزر كر، كو ئەو زللەها ب من كەفتی، پێدڤی بوو ب وی كەفتبا، چونكە ئەو زارۆیەكێ شویم بوو، هەر دەما خێر ژلایێ جیرانانڤە ب سەر زارۆیان دا دهاتنە بەلاڤكرن، هەڤالێ من، زارۆ پالددان و پێهن و مست ژی ل پشت و كماخێن وان ددان و خۆ دگەهاندە كیسكێ شەكروكان و گەلەك جاران كیسك هەمی ژ دەستێن خێركەران دئینا دەر، گەلەكێ شویم بوو، هەكو كیسكێ فاتێ ژ شەكروكان خالی بووی، ب چاڤێن غەزەبێ ل من نێڕی و ژ سەرێ كولانێ ژۆردا چوو كلێسا خۆ، هەكو ب رێڤە دچوو، وەسا یا ب هەیبەت بوو، دا هزر كەی ئەردێ ل بن پێن وێ دهەژیێت، پاشی ل سەر ملێ خۆ زڤڕی و قەستا من كر، من سەرێ خۆ شۆڕكر و ل هنداڤ من راوەستیا و گۆت: “تو گەلەكێ شویمی، تو بچووكان پالددەی، تە دو جاران شەكروك وەرگرتن و تە نەهێلا هەڤالێن تە ژی بۆ خۆ وەرگرن، ما تو شەرم ناكەی شلاتی!” پاشی چەپەك ل خۆ دا و نەهێلا ئێك ئاخفتن بكەم.
فاتێ ژنەكا كەیس ماقویل بوو، یا ب خۆڤە بوو، ئەو چوار سال بوون، زەلامێ وێ ل شەڕەكی ل باشۆرێ ئیراقێ هاتبوو كوشتن، هەر دەم كراس و كورتەكێن رەش ل بەر بوون، تژی دەستێن وێ ژی بازنكێن زێڕی بوون، دشیا دەهـ زەلامان ل سەر پێیەكێ ب راوەستینیت و نەهێلیت ئێك ژ وان باخڤیت، رۆژەكێ ل پێش چاڤێن مە، ژنەكا جیران پرچا وێ ددەستێن خۆ ئالاند و ل سەر پشتێ دخشاند، ب كوتەك دو زەلامان ئەو ژن ژ دەستێن وێ ئینا دەر، ناڤ و دەنگێن وێ ل تاخێ مە بەلاڤببوون، گەلەك جاران دەنگێ شیق شیقا وێ ژ مالا وان بلند دبوو و ب سەر تاخێ مە دكەفت، بیرا من دهێت، شەڤەكێ داپیرا من رەحمەتا خۆدێ ل گۆڕا وێ بن، ل سەر بانێ ئاخێ چیرۆك بۆ مە ڤەدگێڕان، قێژیەكا وەسا ژ فاتێ دەركەفت، جرفەك ب من كەفت و داپیرا من گۆت “بسملا”، شەڤ و رۆژ نە دبوون ئەگەر مە قێژی و دەنگێ وێ نە بهیست با، مە بچووكان ژی، رۆژ دهژمارتن تاكو ئێڤارا ئەینیێ بهێت و فاتێ خێرا شەكروكان دگەل مە بكەت، ئێدی چەند ببا ئێڤارێن ئەینییان، هەر ژ دوورڤە دا ل من حەیتینیت و بێژیت”هێرڤە نەهێی” ئەز ژی ب چاڤێن دامای و دلێ شكەستی دا ل كەیفا هەڤالێن خۆ نێڕم.
ئەوێ سالا بەفر تژی كولانێن تاخی بووی، عەبۆیێ ژن مریێ جیرانێ فاتێ، فاتێ ل خۆ ماركر، هەر چەندە چ دەهواتێن وەسا نەبوون ژبلی دەنگێ هندەك تلیلیان و شیڤ خوارنەكێ، ئەمێن بچووك، وەكو هەموو ئێڤارێن ئەینییان، مە بویسا خۆ ل كولانێ دانا و چاڤەریێ خێرا شەكروكێن فاتێ بووین، لێ نە مە شەكروك دیتن و نە ژی فاتێ، نە ژی دەنگێ شیق شیقا وێ و نە ژی قێژی، فاتێ ژ ڤی دەستی چوو د ڤی دەستی دا، شەكروك نەمان، قێژی نەمان، فاتێ هەیبەت ژی نەما، جارا دووماهیێ من دیتی، ئێڤارەكێ ددەرگەهێ مال دا ل سەر كماخێن خۆ روونشت بوو، بیست خەبەرا توفك كەلاشتن و چوو د ژۆرڤە و دەرگەهێ حەوشێ پێڤەدا. ئەوەی ژ وێ رۆژێ وەرە، دەر و جیران دوعایێن خێرێ بۆ عەبۆی دكەن.
