نامەیێن شكه‌ستى
چیرۆكێن گەلەك كورت
ئەدیب عبدالله
نه‌ھ
نه‌ھ كونێن ئاشكرا ب مرۆڤانڤه هه‌نە، ژ بلى پتر ژ نه‌ھ هزار كونێن ڤه‌شارتى، هه‌ر نه‌ھ و نه‌ھ هزارێن مه ژێ گۆتى پیساتییا دناڤا مرۆڤیدا دهاڤێژن، لێ بۆ ده‌مێ دو رۆژان مرۆڤێ مرى بیت و نه ڤه‌شارتى بێهن و مۆرا سه‌د سالێن پیساتییێ ژ مرۆڤى دهێت و دده‌ته مرۆڤى. پا نوكه ئه‌م چه‌ند مرى و نه ڤه‌شارتینه، نوكه بێهنا مه دچیته چه‌ندا ؟ دێ چه‌ند سالا ڤه‌كێشیت؟
نامەیێن شكه‌ستى
نه ژمێژه بوو، دوهى بوو، ده‌مێ مه شۆره‌شا نهێنى دكر، ئه‌و شۆره‌ش بوو مه ناڤ و نامه دشكاندن لێ د پر بها بوون، ناڤ دبوونه سونبل، نامه ژى مه ڤه دشكاندن دكرنه نڤشتۆك، وان نڤشتۆكان شۆره‌ش دزۆخاند، نه‌یار ژبه‌ر دفه‌تسین، ل سه‌ر وێ رێچكێ به‌رده‌وام بووین هه‌تا شۆره‌شێ سه‌رگرتى، سونبل دبوونه شه‌هیدێن زیندی، بلا كه‌س نه زانیت نامەیێن نهێنى ژى مه ڤه‌شكاندن، كرنه نامەیێن شكه‌ستى. هه‌تا نوكه ژى شۆره‌ش یا به‌رده‌وامه.
دیكل
بیست و ئێك مریشك و دیكله‌ك هه‌بوون، ژبلى كو سه‌برا وان پێ دهات، هه‌ڕۆ ژماره‌كا هێكان بێى به‌رامبه‌ر د كۆلكیدا ب ده‌ست دكه‌فت. وێ روژێ ژ ئه‌ركێ سه‌ربازییێ ڤه‌گه‌ریابوو، دڤییا هنده‌ك ده‌خل و دانى ژبلى خه‌ریبیێ بده‌ته مریشكێن خۆ، نێزیكى كۆلكى بوو، دیكله‌كی ل سه‌رێ گوندى بانگ هەلدێرا، دیكلێ وى ل كونجا دگه‌ریا دڤییا خۆ ڤه‌شێریت، هند كه‌ربێ گرت پێ خۆ ل سه‌ر تانێ كۆلكى دا هاڤێت، دیكل ستوناڤمل كر .
-جانه مه‌رگۆ ته بۆ وه‌كر؟
-دیكلێ خودانێ خۆ و بیست و ئێك مریشكان، هند نه‌وێره‌ك بیت من نه‌ڤێتن.
-مه ب تنێ ئه‌و دیكله هه‌بوو، مریشكێن مه مانه بێى دیكل.
-بۆ خۆ نه‌كه خه‌م ئه‌ڤه ئه‌ز.
باجان
باجانا كچا باجانره‌شكێ پشتى بێزارییه‌كا مه‌زن سه‌ر ده‌ستێ خیارێ كورێ كولندى دیتى گۆتى: ئه‌ڤرۆ بلا نه‌بیته سوباهى، دێ په‌نایێ بۆ دانوستاندنێ به‌ین به‌رى تشته‌كێ خرابتر رووبده‌ت. پشتى چڤات گه‌رم بووى گۆتێ: ئه‌زبه‌نى، كورێ ته زۆرێ نه‌قۆله‌یه، دخوازین سنۆره‌كى بۆ بدانى .
-خه‌م ناكه‌ت، هوین ب خێرهاتن.
چه‌ند رۆژ پێڤه چوون، كورێ خیارى چاڤێ كورێ باجانێ كۆره‌كر، كه‌ربێن وان ڤه‌بوون، جڤاته‌كا مه‌زنتر یا بێ ده‌ستهه‌لات دگه‌ل خۆ بر، دیوان ئازریا به‌رى بئاخڤن.
-دیاره هه‌وه تشته‌كێ هه‌ى.
-به‌لێ گیان، به‌رى چه‌نده‌كێ ژى ئه‌م هاتبووین، كورێ ته چاڤه‌كێ كورێ مه یێ كۆره‌كرى.
-چو نینه، ژ ئه‌ڤرو وێڤه دێ بێژمێ چاڤێ دى بپارێزیت.
بێنان
هێشتا ژ كێلیكا سنۆرێ گوندى ده‌رباز نه‌بووى، ته دگۆت: ئه‌ردى یێ داعویراى، پشتى لێگه‌ریانه‌كا بێى ئه‌نجام گۆتێ: ب له‌ز هه‌رنه ده‌ڤ محه‌مه‌دێ خه‌مێ، دا ده‌ڤێ گورگى لێ بێنیت. نوكه ئه‌م هه‌مى دبه‌رزه‌ینه، كه‌س نینه ده‌ڤێ گورگى لێ بێنیت، پشنیار دكه‌م هه‌ر گونده‌كێ ب ده‌هان كه‌س هه‌بن كه‌سب و كارێ وان بێنانا ده‌ڤێ گورگى بیت.
توتك
هه‌ما بیرا من دهێت، ده‌مێ سپێدەھییا ده‌یكا من دچوو سه‌ر ته‌نویرێ نانى بپێژیت، بۆ من توتكه‌ك دپه‌حت، هه‌ڕۆ من خۆ ب ده‌همانێن وێڤه دگرت، نانێ گه‌رم د ئاڤێ دهه‌لینا و دخوار، هه‌تا توتكا من چێ دبوو، وێ ڕۆژێ من نان دخوار، ده‌یكا من توتكا من ژ ته‌نویرێ دئینا ده‌ر، برایێ من ئه‌وێ زۆر حەز ژ من دكر توتك كره دووكه‌ر، من ژ بنێ پییا كره قێژى وى هێشتا له‌ق نه‌دابوو، گۆتى: برا ها قوزلقورت بیت یێ له‌ق لێداى.
نزنزا گریێ من، وێ سحارێ، ب سه‌ر گوندى كه‌فت، ده‌یكا من یا دلۆڤان گۆتى: خۆ بێده‌نگ بكه هێشتا هه‌ڤیرێ ماى دێ بۆ ته ئێكا دى چێكه‌م.
-ئیلا بیلا، توتكا من ببه‌نه به‌ر ئێك.
-برایێ من هند تووره بوو، ئه‌ز داكرمه د گۆڤێ ڤه، گۆڤ ژى دبن خانییێ مه‌ڤه بوو، لێ ل بیرا منه ئه‌ز هند ترسیام من قێژى رادهێلان، نوكه ژى ده‌مێ هزرێن هنگى دكه‌م مویێن له‌شێ من دبنه نشته‌ر. وێره‌كییا مه چ لێ هات، یێ بویكا ژ به‌ر ده‌ستێ مه دبه‌ن ئه‌م نه‌شێین بێژین كا توتكا مه.
