نیلا

ن: گۆردۆن هابەر
و. ژ ئنگلیزی: د. امین عبدالقادر
رۆژەکێ پشتی نیڤرۆ دەمێ کوڕێ من سام حەفت سالی، ئەو ل گەل کوڕکەکێ دیێ نێزیکی ژیێ خوە، دبیت سالەکێ یان دوویا یێ مەزنتر بیت، ل بەرسینگا باغچەیێ مال پیاسە دکر. ئەو زارۆکێ دی یێ لاوازبوو، پرچ و چاڤێن وی دتاری بوون، تیشێرتەکێ شینێ سادە و کابۆیەک ل بەربوون و پۆتەکا شەکال دپیا بوو.
من گۆتێ، ئەڤە کییە؟
کوڕکی گۆت ئەز نیلامە.
من گۆتێ تو ل نێزیکی ڤارا دژی؟
کوڕکی ملێن خوە هەژاندن.
تو نزانی تو ل کیرێ دژی؟
جارەکا دی کوڕکی ملێن خوە هەژاندن.
من بەرێ خوە دا نیلای و سامی و ئەوان بەرێ خوە دا من.
من گۆتێ هەوە دڤێت تشتەکی بخۆن؟
نیلای و سامی سەرێ خوە هەژاند. من کادە و شیر دانێ و ئەوان ب بێدەنگی و دلخۆشی خوار. دەمێ ئەو ژ خوارنێ خلاس بووین نیلای سێنیک و کۆپێن خوە هینانە سەر مەغسەلێ، ئەز سەرسام بووم کو سامی ژی وەکر. ئەو بۆ چەند مەهان بوو مە بزاڤ دکر کو ئەو وەبکەت.
سامی گۆت، دێ شێین چینە ژدەرڤە.
من گۆت، بێگۆمان. بەس بمیننە د ناڤ باغچەیدا.
هەڤژینا من پشتی ئەنجامدانا هندەک کار و باران زڤڕی مال.
ئەوێ گۆت، ئەڤە چ زارۆکە؟
من گۆت، ئەز نزانم.
دەما ژ دەرڤە ساربووی کوڕک هاتە د ژوورڤە. سامی ئەتارییەکا نوی هەبوو و ئەوانا ڤیدیۆ گەیم ل ژوورا پێشوازیێ دکر، پەیڤێن سڤکێن بێزارکەر یان هاندانێ ل هەڤ دگوهۆڕین. دەمێ من گوهدارییا وان کری، هەستەکێ ب هێز ل دەڤ من پەیدابوو: بۆ جارەکێ، ل دویماهیکێ، هەر تشت دروست ب رێڤەچوون.
من ترارکەکێ پتاتۆکان بۆ هینا.
من گۆتێ نیلا. ژمارا تێلەفۆنا مالا هەوە چەندە. من دڤێت دایک و بابێن تە ئاگەهدار بکەم کو تو یێ ل ڤێرێ.
نیلای گۆت من تێلەفۆن نینە.
تو ل کیرێ دژی؟
ئەوی گۆت ل چ جهان ناژیم و چاڤێن ئەوی ل شاشەیا تێلەفزیۆنێ بوون.
من هەست ب ئێشانێ کر. تە مال نینە؟
ئەوی گۆت نە باوەربکە. دێ شێم ل ڤێرێ مینم؟
ماریێ ل لێنانگەهێ بەرێ خوە ددا من. من زانی مە هەردووکان هزر د هەمان تشتدا دکر: هەلبەت ئەو دشێت.

ئەڤی سەردەمی گەلەک یا ب ساناهییە ل زارۆکەکێ بەرزەبووی بگەڕهی یان هەر تشتەکێ دی ل سەر ئنتەرنێتێ. دەما نیلا دیاربووی رێکا ژ هەمییان بلەزتر تێلەفۆن بوو. دەمێ ل ئەوێ شەڤێ ماریێ شیڤ دایە زارۆکان، من تێلەفۆنا جیرانان کر. کەسەکێ گوهـ ل چ نیلایا نەببوو. من تێلەفۆنا بنگەهێ پۆلیسان کر. ئەو پۆلیسێ بەرسڤدای گۆت کەسێ چ ئاگەهی ل سەر زارۆکەکێ بەرزەبووی نەداینە، بەلێ سپێدێ ئەز دێ جارەکادی سەحکەمێڤە.
من گۆتێ هەتا هینگێ ئەز چ لێ بکەم؟
تو دشێی تێلەفۆنا فەرمانگەهێ بکەی داکو ببەنە جهێ چاڤدێریێ.
هزرا دەستبەردانا ژ نیلای بۆ ئەگەر زکێ من بێشیت. ئەز وەسا نەخۆش بووم هەر وەکی ئەز دەست ژ سامی بەردەم. مارییێ جهێ نیلای ل ژوورا ڤالا چێکر.

کەسەک نەهات پرسیارا ئەوی بکەت. کەسەکێ تێلەفۆن نەکر، چ ئاگەهی ل سەر زارۆکەکێ بەرزەبووی یێ هەمان سالۆخەت هەبن نەدانە. هەتا من سەحکرە سەر کارتوونێن شیری ل دوکانێ. چ دیارنەبوو.
ئەم نەشیاین رۆژێ هەمیێ ئەوی بهێلینە د خانیڤە، لەوما مە ئەو دانا قوتابخانێ. باشترین پێشبینییا مە ئەوبوو کو ئەو پۆلەکێ یێ ل بەری سامی.
هەلبەت ل سەر خوارنێن ب کۆم ل تاخی خەلکی پرسیار دکرن، یان دەما ئەم دکەتینە هەمبەر خێزانەکا دی ل مارکێتێ. مە بەرسڤێن نەزەلال ددانە ئەوان وەک ئاماژە کو ئەو نە شۆلا وانە. بێی ل بەرچاڤوەرگرتن کو ئەو زوی زوی دهاتە پەژراندن. ژ ئەوێ ژی پتر: ئەوی باشی ل ناڤ هەرکەسەکێ ل دەوروبەری خوە هینادەر. رەوشتێ سامی باشتر لێهات. من و ماری شەڕ کێمتر کرن. ئەو ب دروستی ل گەل زارۆکان گونجا ل کۆلانا مە یا گرتی. هەروەسا ماموستایێن ئەوی دگۆت خۆزی ئەوانا پۆلەکا تژی نیلا هەبا.
ئەز و ماری چ جارا نەدشیاین مە زارۆکێ دوویێ هەبیت، کو ئەزێ پەشێمان بووم. ژ لایەکێ دیڤە، من پرسیار ژ خوە دکر کانێ من شیان هەنە وەکی سامی حەز ژ زارۆکەکێ دی بکەم. دیارە بەرسڤ ئەرێ بوو. یا دیارە کو حەز ژێکرنا دایک و بابان یا سەروکانییەکا بێ دویماهی بوو: ئەو ڤیان بەرفرەهتر بوو هەتا هەردووکان ب خوەڤە بگریت. هەتا من کەسەک ژ یێ دی پتر نەدڤیا. گەلەک ژ دایک و بابان وەدکەن، ئەو ب تنێ تشتەک سرۆشتییە، بەلێ من وەک ئێک حەز ژ هەردووکان دکر. گەلەک جوان بوو. ئەو باشترین سەردەمێ ژیانا من بوو.
ئەڤە ژی ئەوێ ناگەهینیت کو تشتەکێ بێ کێماسی بوو. من و ماری هەردووکان هەست ب گونەهێ کر: هندەکا ل جهەکی ئەڤ زارۆکە یێ بەرزەکری. مە وژدانا خوە ئارامکر ب بیرئانینا ئەوان هەمی کارێن من کرین لێگەریانا کەسوکارێن ئەوی.
تشتەکێ سەیر هەبوو. مەبەستا من ئەوە رەوش هەمی یا سەیربوو، لێ ئەڤێ ل ئەوێ رەوشێ زێدەکر: چ جارا نیلای دیار نەدکر کو تشتەک دڤێت. هەر چەندە رەوشتێ سامی باشتر لێ هات بوو ل گەل نیلای، هێشتا ئەوی داخوازا تشتان دکر-یاریکێن نوی یان گەیم، هندەک جبسێن ناڤ شیری یێن شرینێن نەباش بۆ تێشتێ.
نیلای نە. هندەک جاران من حەز دکر ئەوی داخوازا تشتان کربا، پیچەکێ لێ کربا گری. ئەوی چ جاران وەنەکر، هەر تشتێ مە دداڤێ ب ئارامی وەردگرت. رەفتارەکا سەیر بوو، و مە هەر دپەژراند، هەر وەک کا مە چاوا کارێن زارۆکانە یێن سامی یێن ژنشکانڤە دهاتن نورمال وەردگرتن.
هەروەسا: سامی هەر چەند هەیڤەکێن کێم جلوبەرگێن نوی دڤیان. نیلای چ جارا نەدڤیان.

نێزیکی سالەکێ پشتی نیلا هاتییە د مالا مەڤە، د ژیانا مەدا، ماری تێلەفۆنا من کر ل سەر کاری، دەنگێ ئەوێ یێ نە ئارام بوو: ئەو یێ بەرزەبووی. کوڕک ژ باسا قوتابخانێ پێکڤە هاتنە خوارێ و ژ نشکەکێڤە سامی تێبینیکر کو نیلا ل گەل نینە.
من هەمان تشتێ بەری هینگێ کر: من تێلەفۆنا هەڤسۆیان و پۆلیسان کر. دەما رۆژ دبوونە حەفتی، مە کامیرە دانانە هنداڤ دەوروبەرێن تاخی. پشتی هەیڤەکێ، ئەز ل سەروچاڤێن نیلای ل سەر کارتوونێن شیری ل دوکانێ دگەریام.
لى من چنە دیت.
بۆ ماوێ سالەکێ ئەم دنەئارام و بێ خەو بووین. پاشی ب تنێ ئەم خەمگین بووین، و چەند سام مەزنتر دبوو، ئەو دویر دکەت. هەڤژینییا مە بێ دەنگ بوو. پرت و بەلاڤ نەبوو، بەلێ یا دلخۆشکەر و سۆزدارژی نەبوو.
چەند سالەکان پشتی سامی کولیج تەمام کری، ماری مر. دویماهیک تشتێ سام ب منڤە دگرێدا، کەڤتە خوارێ و بۆ هەتا هەتایێ چوو.
نها ئنتەرنێت یا ل هەمی جهان بەردەستە، و جار جارە ئۆنلاین ئەز ل ناڤێ نیلای گەڕیام، ل گەنجەکی کو ناڤێ ئەوی وەک یێ نیلای بیت. ئەز ل کۆربەندێن زارۆیێن بەرزە د ناڤ سۆشیال میدیایێدا گەریام. تەنها تشتێ من دیتی دلئێشان بوو.
ئەز خانەنشین بووم. من سەفەر کر، پتر ژبەرکو من چ تشتێ باشتر نەبوو بکەم. ل پشتی نیڤرۆیەکا گەرم، ئەز ل گۆرەپانەکێ دەرباز بووم بەر ب شەربەتفرۆشەکی چووم، دەما من کوڕکەکێ پرچا وی پیچەک رەش دیتی، هەشت – نەهـ سالی بوو، دەستێ ژنەکا گەنج گرتبوو. ب دەستێ دی ئەوێ ژنێ عەرەبانکا زارۆکەکی پالددا.
من و ئەوی کوڕکی تەماشای چاڤێن هەڤ کر و من ژ کەیڤخۆشییان کرە قێڕی. بەلێ پشتی هینگێ من هەر ژ سەری هەتا بنێ پییان هەست ب ساریاتیێ کر. چونکو نیاسینا سەروچاڤێن ئەوی ترس د دویڤ خوەدا هینا. دەستێ ژنکێ کێشا، بزاڤکر ب بێ ئۆمێدی ژ من دویر بێخیت.
ئەوێ ژنێ خوە ب ئالیێ کوڕکیدا خوار کر و دەستێ خوە یێ نەرم دانا سەر ملێ ئەوی.
من ئەو زمان دزانی د ئەوێ بگەهم.
ئەوێ گۆت، چ چێبوو نیلا؟
من هند مێشک هەبوو کو بزانم ئەگەر ئەز خۆ نێزیکی ئەوان بکەم دێ دویماهییا وێ یا خراب بیت. ب تنێ دا یێ سەرکەڤتی بم د ترساندنا ئەوێ ژنێدا و دبیت من خوە دابا گرتن. ژبەرکو نیلای نەڤیابوو ئەز ئەوی ببینم.
ئەز ب ئاراستەیەکێ دیتردا چووم، زەلامەکێ ب ناڤ سال چووییڤە ب ئاشکرایی دگری. هزرا ژ هەمییان ب ترستر ئەوبوو: ئەڤە چەند سالە نیلا ئەڤی کاری دکەت؟

ل نێزیکی دویماهییا ژیێ خوە، ماری پرسیار ژ من کر ئەز چ هزر ژ نیلای دکەم. ئەوێ نەگۆت نیلا کییە، گۆت نیلا چیە. ئەوێ گۆت، ئەو چ جارا مەزن نابیت. ماریێ گۆت پێدڤییە جادۆیەک د ئەویدا هەبیت، سەرەرای ئەوێ چەندێ ئەوێ چ جاران باوەری ب چ تشتێ سەرسرۆشتی Supernatural نەدهینا. ماریێ گۆت ئەز هندەک جاران هزر دکەم کو ئەو وەهمەک بیت. بەلێ ماموستایێن ئەوی ئەو دیتبوو. هەڤسۆیان ئەو دیتبوو.
من گۆت، ئەز نزانم کانێ ئەو چ بوو، ب تنێ تشتێ ئەز دزانم من حەز ژ ئەوی دکر.