ئەدەب
هەلامەت
ئەلند مزووری
ئەو هەلامەتێ هە…!!!
ئەوێ ل ناڤ بێدەرا
هیڤیێن مندا
دخەونێ ژی دا
من دترسینیت
خەونێن من هەمیان دڤەڕەڤینیت
هندی خۆ دهەلاڤێژم
ژ بەر وی نەوێرم
پێنگاڤەکێ…
بەرەڤ خەون و حەزێن خۆ
بهاڤێژم
ئەو هەلامەتێ هە…!!!
د ناخێ من دا
یێ بوویە هۆڤەکێ دڕندە و…
یێ ب من دکەنیت
یێ من دکەت ئارمانج و …
دڤەنیت
بپەنجێن خۆ یێن دڕ
جەستەیێ من دڕەنیت
ئەو هەلامەتێ هە…!!!
د هشیاريیێ ژی دا
ئەز یێ ژ رێکا هیڤيیان
ڤاڕێ کریم
ژ رێکا عەشقا…
چاڤ رەشا من
دویر کریم
ژ خۆشتڤی و دۆست و هەڤالان
یێ ڤەقەتاندیم
ژ جڤاتا…
شەنگە زەریێن ڤی گوندی
بێ بەهر کریم
ما کەنگی ئەز…
بوویمە بڕینەک
ل سەر لەشێ هەبوونێ
یان بوویمە…
کەسەرەک ل سەر قەدەرا…
ڤێ زۆمێ
هۆ هەلامەتۆ…
ما تو ل وێرێ یی
یان دا چویچک
نەخۆن دانێ وێ کۆمێ
هەتا کو ئەڤ هەلامەتە
هۆسا ڤێ جەنگێ د گەل من بکەت
من ژ رێکا هیڤیيان…
دویر بکەت
کیڤی بکەت
٥-١١-٢٠٢٣
