ئەوا ئەزەل
رزگار صبحی
من ئەو ژ سترانەكێ ئینابوو دەر
ژ دەنگەكێ ژ ئەزەل،
ژ سەفەر و سەلیقەیێن قەرەچان!
من ئەو ژ عەورەكی ئینابوو دەر
ژ هێلینێن چویچكان،
ژ كتێبێن سحران،
ژ گۆپێن چیایێن ئاسێ،
ژ ناڤ زكر و خەلوەیێن سۆفیان،
ژ ناڤ بەردینێن شوینواران..
ژ ناڤ ڕحانێن ژ دەستێ ژنێن میهرەبان!
ئەو قەدا كەنیەكا ئەزەلی بوو،
گویشیەك بوو ژ زمان و زەمەنێن جوان
هەكو با لێ عاشق دبوو و پرچا وێ دبژیا
ئەز ژی دبژیام..دبژیا جیهان!
ئەو ژنەكا خوڕافی بوو
یا ڕسمكری بوو
ب تیپان، ب مەزیقێ، ب چیرۆكان
ئەو دەمجهەكا فیزیایی بوو، چاڤێن وێ كەونەكێ تژی ڕاكێشان بوو
من نەدزانی ئەو چاوا دبوو ڕێ و
دبوو عەور و دبوو ستران و ئەز د وێ دا دچووم
دچووم بێ ڤەگەڕیان!
ب هەمی ڤە وەكی دلخوەشیێ بوو،
ب هەمی ڤە وەكی سەرخوەشیێ بوو،
ب هەمی ڤە وەكی شاشیێ بوو،
ب هەمی ڤە چوو!
ئەو..
ئایەتەكا خوەدێ بوو، ئیمانەك بۆ دڤیا
ئەز شەیتانەك بووم، من نەشیا..من نەشیا..من نەشیا!
زڤستانا 2022ێ
