دەستوور

عزیز شەمۆ ئەلیاس

1
هنجی دەنگ تێدا هەی ل خولام وبەنیێن خۆ خوری :
وەرن برێنێ، وەرن برێنێ، ئوون ب خودێ کەن وەرن برێنێ! دورست وەکو گوهدرێژان دراوەستیاینە، هایژ چوو نینە، ب چێروانا خۆ ڤە دمژوولن، چی خەما وانە، پیسێن چەپەل رابن ..رابن تشتەکی بکەن، من ژ ڤێ قەیرانێ، ژ ڤێ بەلا وپرسگرێکێ قۆرتالکەن، رابن بلەز هەڕن پەرتۆکا (دەستۆر) ی بینن، رێز رێز بۆ من بخونن، کا وان چاوا دڤێ.ژ چی دبێزارن رەشکەن، دەرینن، وەکو وان دڤێت وئەو حەزدکەن سەرژنو دەستۆری بنڤیسن، ژێ کێمکەن…سەر زێدەکەن …قەی ناکەت، نەخەمە…وەکو ئەو دخوازن بلا بۆ خۆ چێکەن، ئێتۆنا تورەبوونا وان دژوارە، هندە چوو نەمایە پێلا بەرخوەدان ونەرازیبوونێ بگەهتە دەرگەهێ مال وکۆچکا من ..پاشی سوود چی یە؟
2
کو پاسەوانان ملێ مەزنە وەزیرێ وی گرتن وئینان جڤاتێ وبەرامبەر وی راوەستاندن، هەژاری ..دیار بوو گەلەک شەپلی وشەپرزە بو، لەشێ وی هەموو ژ ترس وسەهمان دلەرزی، خونتکاری دەنگ ل تەڤایا رونشتییان کر، جڤاتێ چۆلکەن، تنێ هەردوو (وەزیر وراوێژکار) ل جەم بمینن.
وەزیر سەرنزم ومەلوول بەرامبەر کورسیکا سەرۆکاتیێ راوەستای ما، پشتی بێهنەکێ ژ بێدەنگی ومتبوونێ ژنشکێڤە خونتکاری ل خۆدا وژسەر کورسیکێ رابو ودناڤا هوندرێ کۆچکێ دا هات وچوو ودگەل خۆ دگۆت وڤەدگۆت : ” راوێژکارێ زانا وژیر، ئاقلدارێ من، تۆ چاوا رەوشێ دخونی…ڤێ پرسگرێکێ چەوا شرۆڤەدکەی؟
تەکبیرا ڤی ئەز شێت کرم (دەستێ خۆ درێژکر بۆ وەزیری!؟) گوهداریێ بکە تۆ ب خودێ کەی گوهداریێ بکە. وێ دبێژت ددوماهیک هەلبژاردن وراپرسیێ دا تە نۆت ونەه ژ سەدێ ژ دەنگا ئینابوو، هەموو هاولاتیان تۆ دڤێی، یێن ل شەقامێ گێلەشێن وتێکدەرن، پاسەوان دێ دەنگێ وان کپکەن. شوونا بێژن بروخێ ئەز دێ هێلم ئەو بێژن (بژیت وهەر بژیت خونتکارێ خۆش بیت.)
تۆ باوەردکەی؟! هێژ مە دەلیڤه‌ مایە. ئەم چی بکەین؟
ئەز باوەرناکەم…رۆژا ئێکێ من تۆ هەلبژارتی وەزیر بۆ خۆ هنگی ئەز گێل وچەوت بووم. ئەز ب خودێ دلۆڤان کەم تۆ ب کێر بەر دوو کارکا نائێی. یا هاتی سەرێ من ومەملەکەتا من هەموو ژ ئەنجامێت شیرەت وپلانێن تە ئێن ڤالا وچونەبوون. کا دێ بۆچی ب خەبەرێ تەکەم، ب ڕاست هات سەلماندن ئەز گێلم؟
هەکە تنێ پارە وپۆلێت من ب تە سپارتین من دابانە مللەتێ خۆ وئێکسان دابەش کران، نها هەموو دێ مینا ئاڤا ل پەی مەرێ بن. چارە چی یە راوێژکار.چارە؟
3
ب دەنگەکی نزم وب بێ پووتەی راوێژکاری لێ بەرسڤدا :
ئەزبەنی.. ئەڤە سەرێ دەهـ رۆژانە بەردەوام مێشکێ من مژولی شیکرن وتوێژینێیه‌ بۆ ڤێ بەلایێ. تە راستی دڤێت بۆ دەربازبوونێ ژ قەیرانێ تاکە رێگە وچارەسەری وهایژ من وەرە ژسیناریۆیێت باشترینە بۆ مە هەمووان. تۆ چی دبێژی ئەز ئیرۆ هێڤاری ڤێ پەیامێ، دەستدا لاپەرەکی ژ بەریکا خۆ ئانیدەر وددەستێ وی کر برێنتێ وب خونت، ل میدیایان ب ناڤێ تە راگەهینین؟!
کو خونتکاری لاپەر دخوەند، هند هێز وتوانا نەدما خۆ راگرت، دجهێ خۆ دا درونشت سەر ئەردێ ل ناڤا کۆچکێ. دەنگێ وی دقرکێ دا دخەنقی وئاخڤتنا دکر هند نەیە بژوون بوو، بەلێ پا وی (راوێژکار) باش دزانی وتێدگەهشت ئەوێ چی دبێژت :
ئەز چی خۆلیێ ب سەرێ خۆ وەرکەم. ئەز کۆڤە بچم و بەرێ خۆ بدەمە کێدەرێ. ئەز بازدەم کێدەرێ و تەکەی سەرێ خۆ بم. ئەز خۆ ل کۆڤە ڤەشێرم وهنداکەم؟
دوان ئێکودووان دا بێهن قوتک دهاتێ، بووە خرخرە سینگێ وی، دەڤێ خۆ ڤەدکر ودخواست باییەک هێنک هەناسە بکەت. راوێژکاری بازدا سەر لاشێ وی وهەول ددا هاریکاریا وی بکەت رابت سەر لنگان. نەهەرێ. وی هەست دکر لەش وێ لێ سار بووی، هەر چەند چاڤێن وی دزل بوون ودبرسقین. دیار بوو هندە گیان سپارت.