نەخوەشيیا وی
نيشان بامه‌ڕنى
نەخوەشيیا وی
خلتەيه‌کێ ڤەگرتۆکە
دبتە ئەهریمەنەک و
سواری کورسییەکا چارپێ دبت
یا کو، بەس ئەو دنزانت
ل سەر پشتا وێ چ چێ دبت.
تاجەکێ دکتە سەرێ خوە و
د ئاخەکا گیانێ وێ هەمی برین
هێلینەکا ئەزەل
ل سەر قوپا مەزارگەهێ منێ پیرۆز
ئاڤا دکت.
دوور ژ ڕەنگێ بوونا من
یاريیان
ب پێکێن شەرابا جەلادەکی دکت و
نەڤیچڕکێن خوە
ل سەر گیفکێن مەیخانەیا وی
ب خوینا من يا
ل سەر کولیکان مەیی، مەزن دکت.
هێشتا ژی دڤێت
ئەو زاڕۆکێ مایە بێ باب و
ئەو دایکا ل پاريیەکێ نانی دگەڕت
خازخازۆکيیێ
ل بەر دەرگەهێ وی یێ
ب سەد کلیلان ڤەنەبت، بکت و
دەستێ وی دانیتە سەر سەرێ خوە و
ببێژیتێ ئەزبەنی و ماچی بکت.
ئەگەر نە
دێ نەخوەشيیا وی
ژ کەڤلۆژانکێ خوە دەرکەڤت و
هزار سەر دێ چنە کولاڤەکی.
دا بەس بمینت
ئەو کورسییا ژ دارێ زۆرێ چێ کری و
تاج و تەختێن وی یێن
تژی گەندەل و گەنی.
١٦/ ٥ / ٢٠٢٣
سوێد – ڤەستەرۆس
