بلند محه‌مه‌د
ل بن پەڕێن پایزەکێ
گەڕیانێن بەیھۆدەیی
ل بن سیبەرا زڤستانەکێ
خەمێن قەرقۆدەیی
ھەپارەنە و
ل جڤینەکا خرش
ل کۆلانەکا سەرخۆش
مە دەم دپیڤا و ئاخێ ئەم رادکێشاین
و دکرینە بیرھاتنەکا باڕۆڤەیی.
تە دگۆت:
دا ل سەر ھێلا ترێنێ بێھن ڤەدەین
تویتنەکێ بەردەینێ
خۆشاڤەکێ ڤەخۆین
د ھەمبێزا سیبەرا چنارەکێ دا
ببینە گیانەکێ گەڕیدەیی
پیتا ناڤێ تە لێ بنکرینم
دا پتر ژ ئەڤینێ، ئەڤینێ بکەیی.
دوو زاڕۆکین
دوو بێناڤ
د بێگونەھییا تۆزێ دا
کەنییێ دکەینە دەم
و چپکێن حەزان د پاخلا مە دا دبنە خوناڤ،
ل وێ رێکا درێژ
تە گول دوەراندن
و باژێڕ دبوونە گولاڤ،
دارا خۆ بۆ تە دتەواند
دەریا دبوونە دەراڤ
جانگۆرییەکێ ب لفکا تەڤە ھشکم
کا ببە کەڤالەکێ خودایی و
ببە سەراڤ
ببە باران
ببە باڕۆڤە
ببە لێھمشت و من نقۆیی دەریا حەزان بکە.
ل بن سیھا ڤێ شەڤێ
جگارەکێ ب لێڤێن من ڤە بکوژە
ھەمی چیڕۆکان بکە خۆلی
و د گەمییا دەمی دا بکە چیت
بکە لاڤژە و
نڤێژەکا درێژ د جانێ ژبیرکرنێ دا بکە.
من ژ تە پێڤەتر کەس دی نینە
سەندویچەکێ ل گەل کەرکەم
تەزیاتییەکێ ل گەل پارڤەکەم
ل گەل بگریم
بکەنم
و خەما ڤالا بکەم
تو ئاخەکی و ئەز چپکەکا دامایی
ب دەلنگێن دەمی ڤە شڕ خوە ڤارێ دکەم.
ل بن دارا ھە
ببە بەلگ،
سیبەرێ ل ھەناسەیا مە بکە
ئاسمانەک ژ حەزان یێ دھۆریت
یێ دبیتە قەلین
یێ دبیتە دەروێش
یێ دبیتە کەڤر و
ل ڤی جانی ئێش،
ھێش
ھلمەکا گەرمم
من فێری سەمایێ بکە
من فێر بکە بتەقم
ل بن شاکان خۆ ڤێدەم
ڤیانێ بکەمە شۆڕەش و
تژی دەستێن خۆ ستێر بکەم
ل بەر پێن تە بکەمە بەڕک
ل سەرایا شاھانە
ببیە ساندرێلا
نێ لەشێ حەزان، بارانەکا فھێتە
گومتلەکێ سار و ئاقارەکێ شێتە
و پیرۆزییێن تە بھانەنە و
ئەز پەلەکا ڤەمری و حەزەکا مرن نەڤێتە.
ل بن دارا ھە
د گەڕیانێن بەیھۆدەیی دا
من فێری ژیانێ بکە
حەز د ئاسمانێ ژبیرکرنێ دا تەرمەک مرارە،
ڤێ سپێدەھییێ ھند ژ تە غەریبم،
کا ببە باران و ل من ببارە
ببە گژلۆک
ببە ڕم و د کلۆخێ عشقا من دا بچکلە.
ھەمی سپێدەھیێن تە
ب بێھنا قەھوێ دھێنە پێچان
چ کورسیکێن ڤالا نینن
من و تە ھەمبێز بکەن
و ل سەنگەرێن ئاڤابوونێ
خۆ سۆر بکەین و ببینە کڤان
ببینە ھەیڤ و تارییێ ژ بەر پێن شەڤێ راکەین
شەڕان بکەینە گولدان،
ئاشتییێ رائێخین
سۆزەکا گەرم ب مۆما دەمی ڤە بکەینە قوربان
رێکێن مە ببنە بھار
ژ سپێدەھییا جوانی بڕژیێت
و بقەتن کەلا و زیندان.
کا ل بن دارا ھە وێنەیەکی بۆ تە بگرم
ببە ئاسمان
ببە بەلگ و
ب من دا ببە وەریان
دا ژ سپێدەھییان جوانییێ بچنم
و د بیردانکێ دا ببیە باران
ل بن دارا ھە
ھلما پایزێ
ھەناسەیێن دارا دکەتە قورمک و
ب پەنجەران ڤە
دوەریێت خوناڤ،
ئەم ژی ب پێنگاڤێن خاڤ
دچین، دجەنگین، دبینە مژ
دبینە سیلاڤ.
ل بن دارا ھە
دا سپێدەھییەکێ راچنین
قەھوەیەکێ ل ژێر داگرین
پیزایەکێ کەر بکەین و
وی ئاقاری خڕێ بکەینە گڕنژین
کو ئەڤ باژێڕە ھشیار ببیت
ل سەر جاددەیان
ل بەر پەنجەران
د بەلەکۆنێن تۆزکەوی دا
گرییا زاڕۆیان ببیتە بشکۆرین
نێ ئاوڕیێن تە ل سەر ھەستێن ئاریایی
خەونەکێ دڕێسن
بۆچی ئەم جگارەکێ ل سەر ڤی شوستەیی ناسۆژین؟
تاسەکێ باقلکا بکەینە کزۆت
لایێ تاری ژ دیرۆکێ بھێتە نخافتن و
روویێ عەردی ببیتە رۆژ
کا ستێرا بۆ تە بقڕینم
چیا بکەمە دەشت
دەریا بدۆشم
رێکا بکەمە ئاڤرمیش
تلێن من حەز دکەن لەشێ تە بکەنە گیتار
ئاوازا ژێ بژەنن و
ژیانێ تێر سەما بکەن.
ل بن دارا ھە
دا ب مۆمەکێ، بکەینە جەژن
چۆل ببیتە سەما و بەلگ بھەژن
مەزن مەزن
کێکەکێ ببڕین و
بلند بلند بۆ ئاسمانی ببەزن.
وەرە سپێدەھییەکێ ل نک وێ دارێ
فنجانەکێ تێکین
تەڤنەکێ ژ خوزییان داربەست
بکەینە ھەلبەست
د سیناھییێن سنۆران را سەربەست
ب پێنگاڤێن فڕ
پێخاس و سەرمەست
سەرچەمکێ شۆڕەشا ئالزی
بھەڕێفین،
رۆناھی بزێت و دیدارێن ب ھەست
ڤی ئاقاری ڤەگرن و
ئێدی د بن پەڕێن تارییێ را نەمینن مەبەست.
چ بکەم
کۆبارییێن تە رێسانە و
دلێ من پاپۆڕەکا فەتسی
نیڤرۆیی د تەحرە بارن
سیبەرێ دڕەڤێن،
مە دڤێت باران بباریت نم نم
ئاخ ببیتە نھانی و
تەڕ د بێگونەھییا ژیانێ دا
ب دیدەیێن تە، تژی شکەستنم،
لەوا ل بن دارا ھە
من بنژنە
بۆ تە،
سۆفییەکێ تژی مرنم.
