وەڵاتێ من شەنگە وەڵات
قادر حه‌سه‌ن عیدۆ
وەڵاتێ من، شەنگە وەڵات
ل تە گەڕیام، ئەز لات ب لات
ھەتا ھەبوون ھێز و شیان
من بۆ تە کر، کار و خەبات
* * *
بۆ تە دکر کار و بزاڤ
ھەتا ھەبوون من چاڤ و گاڤ
من دانە تە گول و گولاڤ
تە جەرگ و دل کرنە شەوات
* * *
تە جەرگ و دل کرنە ئاگر
خان و مان مانە بێ ڕاگر
ڕەنگی فەرھادێ خۆڕاگر
ژیانا من بوو کێفەرات
* * *
ب چاڤێن زل وەکی دینا
دنێڕم ئەز ل برینا
دنالینم وەک گۆیینا
تەمەن بۆری ب کش و مات
* * *
ژی بۆری ب ئاهـ و زاری
ب نالین و ژیر و ژاری
ترس و برس و ستەمکاری
بوونە دەرد و ئەز کرمە تات
* * *
تات و سەرمەست و بێزارم
ب ئاهـ و قیڕ و ھەوارم
ئیرۆ شێست و دوو بھارم
پاییزا سەخت و نەمەرد ھات
* * *
پاییز ھات ب با و باھۆز
من نەشکاندن پەیمان و سۆز
ئاخ و بەرێن تە یێن پیرۆز
بۆ خوە کرنە پووتک و لات
* * *
بۆ من تو پووت و ڕووگەھی
بھارەکی قەت نابەھی
پیرۆزترین وار و جھی
تەڤ گول و گولزار و شمشات
* * *
وان گولزار و باخ و چەما
بەختەوەری دا مە ھەما
دوژمنێ دڕ لێ بوو تەما
وەکی گورگێ دەڤ ب خوین ھات
* * *
گول و گولزار شەھتاندن
باخ و بیستان شەوتاندن
ب دلێ ڕەش لەوتاندن
دیجلە و خابوور و فورات
* * *
شارێن ڕەنگین، بورجێن بەلەک
وێران کرن وی یەک ب یەک
مەرگەسات مە دیتن گەلەک
ھێ سەرکەشم وەک ئارارات
* * *
سەرکەشم وەک ئاگریداغ
دل تەڤ بوویە برین و داغ
گەڕ گوننەهه، ئەگەر یاساغ
دل د گەل ئەشقا تە ڕاھات
* * *
دل ئاشقێ چیمەنێن تە
سەرخوەشە ب دیمەنێن تە
شاخ و داخ و بەتەنێن تە
بۆ خوە دکەم برج و کەلات
* * *
ئەشقا تە بۆ من ژیانە
گەشت و شاھی و سەیرانە
دخوازم بمرم مێرانە
نەک بژیم بێ وار و سابات
* * *
دخوازم بمرم نەمینم
یان وارێ خوه بخەملینم
ڕوومەتا خوە ڤەگەڕینم
یان بمرم بێدەنگ و مات
* * *
تێدکۆشم ب دژواری
برا ناھێتە بەر باری
پایەدار دکەت نەیاری
ئەز ماڕسێ بێ خەرابات
* * *
نەماڕسێ ڕێ وندامە!
دەروێشێ ڕێیا ڕەوامە
شەیدایێ شاخ و چیامە
باوەریا من ئاخ و وەڵات
* * *
وەرە برا دا برا بین
شەڤێن تاری شەڤچرا بین
بەرامبەر دوژمن تەبا بین
بەسن فەرمان و مەرگەسات
* * *
دوژمن مەژییێ مە دشۆت
مشەخۆرە ئەو مە دخۆت
بوو ئاگر و جەرگێ من سۆت
تاڵان کرن مەڕ و مالات
* * *
تاڵان کرن: ئاخ، ئاڤ و دار
ڕۆژ و پەیڤ و زمان و زار
مێژوویا من یا پڕشنگدار
بۆ قڕاڵان کرە خەلات
* * *
ئەفسانە و چیڤانۆکا
وەڵات چۆل کر ژ کەڤۆکا
ھرچ و ھۆڤ و پیرھەڤۆکا
بنپێ کرن عورف و عادات
* * *
عورف و عادات بنپێ کرن
پێکڤە ژیان بێهێز کرن
ئەڤیندار پشتەڕێ کرن
بووم فەرھادێ بێدەستھەڵات!
* * *
سیابەندێ ئەڤیندارم
دل ب کول و بریندارم
ژ ئەشقا تە دین و ھارم
ھەوار! کا سیپان و خەلات؟
* * *
کا عەفرین و کانێ کەرکووک؟
کانێ مھابادا نوو بووک؟
کانێیە شنگالا پەپووک؟
ئەو سۆرگولا ھێژ ترح و کات
* * *
نەھامەتان ئەم دبینین
گێلین خوە تێناگەھینین
دووبەرەکییێ دچینین
ب ئەفسانەیێن بێبنیات
* * *
ئەفسانەیێن بێ بنەتار
کرنە ڕێبەر بۆ مە نەیار
ھشتین بندەست و دیل و ژار
وەڵات تم تاڵان و بەربات
* * *
بەسە کوردۆ ژ خەو ڕابە
ھشیاربە بەس د خەودابە
نەزانینە خەو خرابە
بۆ تە بوویە دەرد و نەھات
* * *
وەڵاتێ من، شەنگە وەڵات
ل تە گەڕیام ئەز لات ب لات
نە من شیا تە ئازاد کەم
نە برینا من ژی داھات!!
شاریا
٢٧/٢/٢٠٢٤
