ڤەگەڕ
حسێن تاها هرۆری – ئەلمانیا
ئەرێ باشە، هەکو ژ نشکێڤە ئەم ڕووبروو ئێک بووین و چاڤێن مە بکەڤن ئێک، نزانم خوە پێ بینم دەر و سلاڤ بکم وێ یان ئەو دێ سلاڤی من کت؟ بۆ بگڕنژم یان خوە دلمای نیشا بدم یان ژی پشتا خوە بدم وێ و پووتە پێ نەکم؟ هەکو تایبەت بۆ دیدارا من هات و داخوازا لێبۆرینێ ژ من کر، ڕەفتارا من د گەل وێ چەوا بت؟ نزانم بێژم وێ یێ ل تە بۆریم و تە ئەو پیرۆز بت. بەس درەوە، نەشێم لێ ببۆرم و نەشێم پیرۆزباهییێ ژی لێ بکم، درەوێ ل خوە ژی بکم و ل وێ ژی بکم. نەخێر دێ راستییێ بۆ بێژم، دڤێت بۆ دیار بکم کو هێژ من ئەو ژ بیر نەکریە و ئەڤینا وێ د دلێ من دا هێژ یا گەرم بوو، تاکو وێ کێلیکا دلێ من شکاندی و بێژم وێ تە ئەشق و ئەڤینییا مە یا سالان دایە ب زێڕ و دراڤ، تە چ ڕوو هەیە دهێی بەرانبەری من و داخوازا لێبۆرینێ دکی؟ ما یێ بێ هش و هەستم. نەنە، هەلبەت ئەو نزانت ب سالان مایمە د کەمپان دا ل هیڤییا وەرگرتنا مافێ پەنابەرییێ، ڕەوشا من یا وێران چ هایا وێ ژێ هەیە، ئەو نزانت شەڤ و ڕۆژان من کار دکر دا نەختێ بابێ وێ ژ من خواستی بۆ کۆمڤە بکم، ما کی دبێژت ناهێت و یا تۆرە و هێژ ئەو نەهێن خوە ب سەر دەهێن من بێخت و من تاوانبار بکت و بێژت ب سالان مایمە ل هیڤییا تە و نەڤەگەڕیایی، لەو ژ تە بێهیڤی بووم، پێنج سال دەرباز بوون پشتی تە زانی من شووکریە و سەنگۆلکەک ژی کەفتیە د مالبچووکێ من دا تو ژ نوو ڤەدگەڕی، هێژ ئەو نفرینان ل من بکت و بۆ من ڕۆندکێن تیمساحان ببارینت و بێژت تە درەو ل من کر و تە حەز ژ من نەدکر، یان چاڤشین و پۆرزەران و دیسکۆیێن ئەلمانیا چ زوو ژ بیرا تە برم…
دەنگێ بلند یێ کارمەندا فڕۆکەیێ، ژ ناڤ ڤان هزر و خیالان دا ڤەجنقاند: “ڕێڤینگێن هێژا، هەمی ئاگەدار بن، کەمەرێن ئێمناهییێ بشدینن، پشتی چارێکەکا دی دێ گەهین فرۆکخانەیا دیاربەکر و هیڤییا مە ئەوە فڕۆکە ب سلامەتی دابدت…”.
پشتی پێنج سالێن نژاندنا خەم و کۆڤانان د دلی دا ل وەلاتێن بیانی ب دلەکی تژی هزرەت و خەریبی بۆ جارا ئێکێ یە چاڤێن ڕاگری ب دیتنا ئاخا وەلاتی گەش دبنە ڤە، دەمێ ل تخووبی دەربازى ناڤ ئاخا هەرێما کوردستانێ بووی و ژ تورمبێلێ ب خارکەفتی، ئێکسەر خوە هاڤێت سەر چۆکان و مستەکا ئاخێ ڕاکر دا بەر دفنا خوە و سێ جاران ب وێ ئاخێ ڤە ماچی کر و ئاخینکەک کوور ڕاهێلا و د گەل ئاخێ ئاخفت؛ “سپاس بۆ خودێ، کو هێلای جارەک دی بێهنا ئاخا خوە بهلکێشم، ئاخ ئاخێ بێهنا تە چەند یا خوەشە، ل چەند وەلاتان گەڕیام، ل چەند دەریا و چیایان بەرێڤە بووم، لێ من بێهن ژ بێهنا تە خوەشتر نەهلکێشان، بێهنا خوونا بابێ من و جانگۆرییێن وەلاتی یا ژ تە دهێت، کیڤە بچم هەر د گەل منی، تو ئاخەکا پیرۆزی، من نە دخواست پیرۆزییا تە ب خوونا براکوژییێ بهەڕمینم، لێ مخابن شەڕێ براکوژییێ ژ ناڤ تە و خوەشتڤییان دوور کرم، بزانە چەند پتر ژ تە دوور دکەڤم، تو ل بەر من شرینتری، ل سەر سۆز و پەیمانێن خوە مە و پشت نادم تە، هەر دەمێ خوونا من ب خوازی ل دژی داگیرکەران، ل جهێ بابێ خوە پێشمەرگە مە، لێ بۆ شەڕێ براکوژییێ هیچ جارەکێ نە یێ ئامادە مە”. پشتی دەربڕینا وان گۆتنێن بهزرەت یێن ژ کانییا ناخێ ڕاگری زاین، سەرێ خوە ڕاکر شۆفێرێ تەکسییێ یێ کو ئەو ژ ئامەدێ گەهاندی سەر تخووبێ هەرێما کوەردستانێ، چانتە و کەلوپەلێن وی ژ تەکسیێ ئینابوون دەر و ل هیڤییێ بوو خواترا خوە ژێ بخوازت، ل شۆفێری زڤڕی و گۆتێ:
– گەلەک سپاس بۆ ماندیبوونا تە، باش بوو تە ئەم ب سلامەتی گەهاندین.
– گەلەک سپاس بۆ تە ژی، ل بن سیبەرا ئازادییێ و ئالایا وەلاتێ ڕۆژێ یا ڕەنگین دەمێن خوەش ببۆرینی، هیڤییا مە ئەوە ئەڤ ئازادییە بەرەڤ باکوڕ ژی ڤە بهێت و سەرانسەری کوردستانێ بڤەگرت.
پشتی خاترخواستنێ و هەر ئێک کەفتی سەر رێیا خوە، بووبوو ئێڤارییەکا درەنگ دەمێ ڕاگر ژ دەرگەهێ سەرەکی یێ ئاڤاهییێ گومرکێ دەرکەفتی، گورەپانا پێشەوازییان یا پر بوو ژ وان مرۆڤان یێن هاتینە پێش کەسوکارێن خوە ڤە، سەرێ خوە ڕاکر چار گاڤان پێشڤە چۆ زڤڕی ل کۆما مرۆڤێن ملێ چەپێ نێری، کەسێ نیاس ب بەر چاڤان نەکەفت. د وێ ناڤبەرێ دا ل ملێ وی یێ ڕاستێ دەنگەکێ بلند هات گوهان: “یێ هات، خالێ من هات، خالێ من گهەشت… “، ل وی دەنگی زڤڕی، دیت گەلەک ژ مالباتا وی هاتینە پێشەوازییێ، پشتی سلاڤێ و دەستگڤاشتن و هەمبێزکرنێ و ماچ و ڕامووسانێن کەسوکاران و بخێرهاتنێن گەرم هەمییان لێ کری، ل تورمبێلان سوار بوون ب دلێن شاد و گڕنژین و کەنی ڤە بەرڤ مال ڤە هاژۆت، هەتا درەنگی شەڤ مال یا پڕ بوو ژ مێهڤانان، دیوان یا گەرمە و ڕاگر د ناڤ پرس و پرسیارێن مەزن و زاڕۆکان دا هێڕ بوویە، هەتا بووی دەمێ نڤستنێ گۆتنا (ل دەڤ مە هۆسانە، ل دەڤ وە هۆسانە) سەد جارکی د دەڤێ ڕاگری دا دوبارە دبوو، ب شەڤ ژی ژ بەر خەوان دگۆت: “ل دەڤ مە، لدەڤ وە”، پشتی نیڤشەڤ مێهڤان هەمی ڤەڕەڤین و یێن مالباتێ تنێ ماین، ڕاگری چانتەیێن خوە ڤەکرن و ئەو دیارییێن د گەل خوە ئیناین هەمی ل سەر ئەندامێن مالێ بەلاڤ کرن، دیارییا ژ هەمییان ب بهاتر پێشکێشی خووشکا خوە یا ناڤی هەلینێ کر یا وی ژ هەمییان پتر حەز ژێ دکر و ب پیلک گازی دکر وێ، ئەوا هەمی دەمان د گەل وی وەک هەڤالان و گەلەک باوەری پێ هەی و باش د ئێکودو دگهەشتن، ژ خوەشییان دا وێ شەڤێ هەمییێ کەس نەنڤست هەتا بەرێ سپێدێ.
ڕاگر ئێکە ژ ئەڤیندار و شەیدایێن دیمەنێن وەلاتێ خوە، حەز ژ گەڕیانێن چۆل و چیای دکر، هەمی تشتێ کوردستانێ ل بەر وی یێ جوان و شرین بوو، باشترین کامیرە د گەل خوە ئینایە و ژ وێنەگرێن بژارە یە، وی حەز دکر هەر تشتێ ب بەر چاڤێن وی کەفتبا وێنە کربا، هێژ ل ئەورۆپا گەلەک تشت دابوون بەر دلێ خوە و بۆ خوە د سەرێ خوە دا پلان کربوون، بگرە ژ گول و کولیلکان، دار و باران، کەڤر و بەران، ڕێ و ڕێباران، کانی و ڕووباران، پێلە و سوولاڤان، نهال و گەلییان، نزار و بەرۆژان، پەسار و کێرییان، پیر و زاڕۆکان و هەر جوانییەکا کەفتا بەر چاڤکێ کامیرا وی ژێ نەبۆریبا هەمی کربان کەڤال و تابلۆ، یا ژ هەمییان پتر دای بەر دلێ خوە ئەو بوو، چەند دیدارەکان د گەل هەڤالێن بابێ خوە پێک بینت و بیرهاتنێن خوە یێن پێشمەرگاتییێ بۆ وی ڤەگێڕن و هەمییان تۆمار بکت، لێ یا وی بۆ خوە دانای د شیان دا نەبوو، دلگرانییا بارێن خەما ئەشقا وی یا کەڤن هێژ ل سەر زال بوو و ژ بەر سەرەدان و مێهڤاندارییان ژی، هیچ دەمێ گەڕیانێن چۆل و چیان و دیدارێن د گەل هەڤالێن بابێ خوە نەبوو.
ڕۆژا دوێ دەمێ هەلین و ڕاگر ل سەر بانی ماینە ب تنێ، هەلینێ چاڤێن ڕاگری د خواندن، خەمەکا بژان د چاڤێن وی دا ددیت، تێ ئینادەر یێ ل ڕاستيیەکێ دگەڕت و هزرەتەکا کوور د دلی دا یە، هەلینێ دەست ب ئاخفتنێ کر:
– برا دزانم ژ سەر ڤە یێ دلشادی ب دیتنا مە و هەمی کەسوکارن، لێ دیارە کەدەرەکێ گیانێ تە هەمی داگیر کریە و مالا خوە ل ناڤ مێرگا ژیانا تە دانایە، لێ دڤێت بزانی دوماهییا هەر پێنگاڤەکێ دەستپێکا هاڤێتنا گاڤەک نوو یە…
بێهنا ڕاگری تەنگ بوو گۆتە هەلینێ:
– ببۆرە من ئاخفتنا تە بڕی، گەلەک درێژ نەکە زوو وەرە سەر مژارێ کا چ د دلێ تە دا هەیە بێژە! هەلین بەردەوام بوو:
– باشە برا لێ هیڤییا من ئەوە ئارام بی وەک ناڤێ خوە، خوە ڕاگر بی، بابۆی ناڤێ تە کریە ڕاگر دا ئەم ل سەر هەمی نەخوەشییان خوەڕاگر بین.
ڕاگری ب دلگرانی ڤە گۆت:
– باشە دێ بێدەنگ بم و خوە ئارام کم، تو یا بەردەوام بە ل سەر ئاخفتنا خوە.
هەلینێ جارەک دی دەست ب ئاخفتنێ کر ڤە:
– دەربارەی نارینێ هندەک تشت هەبوون د تێلەفۆنێن کابینەیان دا ژ بەر وێ بۆشاتییا ل دۆرێن مە نەیێن گۆتنێ بوون، دەلیڤە نەبوو بێژم تە، ل پشت مە خەلکەکێ مشە د ڕێزێ دا هەبوو و گازندە ژ تێلەفۆنێن درێژ دکرن، ئەو نامەیا من بۆ تە ڤرێکری ژی، من ب ڕۆندکان و ب کەدەر بۆ تە نڤیسی بوو، من مرنا خوە پێ خوەشتر بوو ژ وێ مزگینییا نەخوەش کو بدم تە، دلێ مە هەمییان گەلەک ب تە و نارینێ ڤە بوو…
برای نەهێلا هەلین ئاخفتنا خوە ب دوماهی بینت:
– وێ خیانەت ل من کریە و خوە ل من نەگرتییە هێژ دلێ وە ب وێ ڤەیە؟
– نە برا ببۆرە وەسا نەبوو وەکی من بۆ تە د نامەیێ دا نڤیسی، بێهنا خوە فرهە بکە دا بۆ تە ب دورستی ڕاستییا چیرۆکێ ڤەگێڕم، مادەم دێ هەر زانی ژ دەڤ من بزانە باشترە!
– کەرم بکە بێژە!
– دەمێ مە زانی بابێ وێ ب زۆری دایە شوو و بۆ خوە دایە ب نەختەکى گران، لێ یا ژ هەمییان نەخوەشتر دایە کوڕێ سەرۆک جاشەکی، ژ بەر وێ ستەما بابێ وێ لێ کری، کەربێن مە هەمییان گەلەک ژ بابێ وێ ڤەدبوون و مە هەمییان نفرین لێ دکرن، لێ نفرینێن مە ناگەھن چو جهان خودێ ژی ل پشتا ستەمکار و خودان هێزا نە…
ڕاگری هندەک هەڤۆک ب سەر یا وێ ڤە زێدەکرن:
– پشتی سەرهلدانێ مە هزر کر سەرۆکجاش و سەرۆکهۆزێن خاین نامینن و کوردینی دێ کەڤت د دەستێن خەباتکەر و کوردپەروەران دا، مە نەدزانی دێ ژ نوو رۆلێ خاین و خوەفرۆشان هێت و ژ نوو کۆچک و تەلاران ئاڤاکن و بەردلکێن کوڕێن شەهیدان بۆ خوە ل بەر پارە و زێڕان کێشن.
هەلینێ لێ ڤەگێڕا:
– مخابن وەسایە کۆچکێن وان ژ بەرێ دگەرمترن، رەشەکێن وان ل سەردەمێ ڕژێما سەدامی چار بوون، نهە چلن و هەمی هەیڤان خەرجییێن وان د بنەجهن و هێژ گەلەک مالباتێن شەهیدان دبێ مووچەنە… ژ بەر وە ل مالا مە بوو شینی و نیهار مە نەدزانی دێ چەوا ڤێ مزگینییا نەخوەش گەهینین تە، ل من ببۆرە دەستێ من پێنڤیس نەدگرت ڤێ چەندێ بۆ تە د نامەیێ دا بنڤیسم، من زانی تو دێ گەلەک هێرس بی و کەڤییە د خەمێن وێ دا، من هیڤی ژ خودێ دکرن تو ڤێ چەندێ نەزانی، ببۆرە بۆ وێ درەوا من د نامەیێ دا د گەل تە کری من ژ دلپێڤەهی بوو و بۆ بەرژەوەندییا تە و ساخلەمییا دەروونێ تە بوو، لەو من نڤیسی؛ (ل هیڤییا نارینێ نەمینە ئەوێ تو یێ ژبیرکری مالێ دنیایێ و زێرا چاڤێن لێ تاری کرین و یا شوو ب دەولەمەندەکی کری…).
پشتی ڕاگری گوهـ ل ڕاستییێ بووی، نەشیا خوە ڕابگرت و رۆندکێن خوە ئێدی بڤەشێرت، د سەر ڕەوشا خوە ڕا دلێ وی ب ڕەوشا نارینێ دسۆت، خووشکێ ژی ب چاڤێن تژی ڕۆندک ڤە برایێ خوە هەمبێز کر:
– دلێ تە ب وێ ڤە نەبت ڕەوشا وێ یا باشە و چو کێماسی لێ نینن، ل دەستپێکێ گەلەک یا تۆڕە و ب هێرس بوو چەندین جاران ژ وێرێ رەڤییە دەڤ مامێ خوە، لێ جارەکا دی ب زۆری ڤەگەڕاندیە ڤە، ئەو ژی نەشێت تە ژبیر بکت و گازندا وێ ژی ژ تە هەیە، دبێژت: “هەکو ڕاگر زووتر ڤەگەڕیابا ڤە و خواستبام ئەڤرۆ ئەڤە نەدهاتە سەرێ من… “.
ڕاگری ب دەنگەکی مەلوول بەرسڤا هەلینێ دا:
– هند پێڕا گەھشتم چۆن ب دەستێن من بوو، لێ ڤەگەڕیان نە ب دەستێن من بوو…
هەلین کچەکا ژیر و ڕەوشەنبیر بوو ب ئاقلمەندییا خوە بزاڤ دکرن برایێ خوە ژ ڤێ دۆزەخێ دەر بینت، پشتی بێهنەکێ هزرێن خوە کرین و گۆت:
– گەلەک خەمان نەخوە، هندەک تشت نە ب دەستێن مرۆڤی نە، مرۆڤ یێ نەچارە دەستان ژێ بەردت، هندەک جاران ژان ب سەر بەختەوەريیێ دا دزالن، لێ دەرگەھێ بەختەوەرییێ چو جار ناهێت گرتن، ل سەر ڤێ چەندێ (هێلن ئادەمس کێلەر)٭ێ گۆتنەک جوان و ب سۆد بۆ مە ل پاش خوە هێلایە دبێژت: “دەمێ دەرگەھێ بەختەوەرییێ دهێت گرتن، دەرگەھەک دی ل بەر مرۆڤی ڤەدبت، لێ پترییا جاران ئەم ل دەرگەهێ گرتی دنێڕین، لەوما ئەم دەرگەهێ ڤەکری نابینین”، تو ژی سەرهەڤسارێ قەدەرێ بەردە و یا روودای ئەم نەشێین بگوهۆرین، چ ژ کچان مشەتر، هەر کچا تو تبلا خوە بۆ درێژ بکی دێ هیڤییان ژ تە کت…
پشتی سوحبەتەکا درێژ ڕاگری ب ئەنیا خووشکا خوە ڤە ماچی کر و ژ دلەکێ ب هیڤی سپاسییا وێ کر:
– هەکو من تو نەبای، دبت من ژ هێسری تاوانەکا مەزن کربا، دا وێ ڕەڤینم، یان ژی تۆلا وێ ل هەڤژینێ وێ بابێ وێ ڤەکم. سپاس بۆ خودێ من خووشکەکا هندە ژیر و زانا هەی…
پشتی پازدە سالان ژ سەرەدانا ئێکێ بۆ کوردستانێ ڕەوشەکا نەچاڤەرێکری ڕوودانەکا ناخهەژین ڕاگر نەچار کر بەرێ وی بکەڤت ڤە وەلاتی، لێ ڤێ جارێ نە بۆ گەڕیان و نە بۆ سەرەدانا کەسوکارن لێ بۆ ب جهئینانا وەسیەتا بابێ خوە. دەمێ ل بەر تێلەڤزیۆنێ ئەو دیمەنێن دلشکەستی دیتین و گوهـ ل ڤێ نووچەیا بلەز بووی؛ “هۆڤێن پەروەردەیا بیابانێ شنگال داگیر کر و ب هزاران خورت و کچێن ئێزدی کەفتینە دەستێن وان هۆڤان و ب سەدان گەنج و زەلام کوشتینە و ب هزاران پیر و ژن و زاڕۆکێن پێخاس و برسی بەرەڤ چیایێ شنگالێ ڕەڤینە”.
هەدارا وی ل هیچ جهەکی نەهات، ڕابوو سەرپێیان و ل نیڤا ئۆدێ هات و چۆ و هەوار کر و د گەل خوە ئاخڤت؛ “باوەر ناکم، هیڤییا من ئەوە ئەڤ نووچەیە درەو بت، یان خەون بت… “، د گەل ڤان گۆتنان یێ ژ خوە ب باوەر نەبوو، ڕوویێن خوە دان بەر تەپۆلان هەتا هەست ب ئازارا دربێن خوە کری، زانی نەخەونە و ڕاستییە، ب دەنگێ بلند بەردەوام بوو د گەل خوە؛ “هەوارە خودێ ما ئەڤە چەوا چێدبت، هەکو ڕاستە تو هەی تو بۆچی ل هەوارا ڤان بێگونەهان ناهێی، ئەڤە چ چامەیە جارەک دی دهێت سەرێ ڤان کوردان، خودێ ما تو ل کیڤەی؟”، ل دەنگێ وی یێ بلند هەڤژینا وی پەریشان ژ لێنانگەهێ هات:
– تە خێرە چ چێ بوویە تو بۆچی هندە دەنگێ خوە بلند دکی ئارام ببە!؟
ڕاگری ب هێرسی ڤە بەرسڤا هەڤژینا خوە دا:
– ما زێدەتر دێ چ چێ بت، تەماشەی نووچەیان بکە، پاشی بێژە من ئارام ببە!
هەردو ل سەر پێیان ڕاوەستیان و چاڤێ وان ما ل وێ نووچەیا گران و دیمەنێن دلسۆژ، پشتی هەڤژینا وی تێگهەشتی چ چێ بوویە، ما حێبەتی و هشک بوو نەدزانی دێ چەوا هەستێن خوە یێن بریندار دەربڕت، خوە ل سەر پێیان نەگرت، هند گەھشت خوە بەردا سەر قەنەپەیێ نێزیک و هەر ب ڕانێن خوە دادا و نفرین ل دووڤ نفرینێ ژ دل و ناخان دەربوون و ئاراستەی هۆڤێن ڕەشاتییێ کرن.
– خودێیۆ.. دی بلا ئەرد بکەلژیت و داعەش هەمی تێدا بچن خوار و بەرزە ببن، خودێ دێ ئەسمانی ڤەکە و هەمییان بهلکێشە بۆ ناڤ ئاگرێ دۆزەخێ، خودێ ما ئەڤ ڕەڤ و مالوێرانی دێ هەر باهرا کوردێن بێگونەهـ بن، ما مە چ کریە ئەڤ دنیایە هەمی ل مە بوویە دوژمن…؟!
ئەو چەند ڕۆژ بوون ئەڤ نووچەیێن دلسۆز د بەردەوام بوون و ڕۆژ بۆ ڕۆژێ شەڕ یێ دژوارترە، چەند ڕۆژان پشتی ڕوودانا شنگالێ ئێڤاریيەکێ پشتی ڕاگر ژ سەر کاری ڤەگەڕیای ڤە مال ل سەر شیڤێ د گەل مالباتا خوە ئاخفت:
– من دڤێت بۆ وە تشتەکی بێژم، دزانم دێ گەلەک پێ ئێشن، لێ یێ نەچارم!
هەمی پێکڤە گوهشین و بێدەنگ مان ڕاگر بەردەوام بوو ل سەر ئاخفتنێ:
– بابێ من خودێ ژی ڕازی جارەکێ شیرەتەک ل من کریە و من ژی وەک پەند کریە گوهار ل گوهێ خوە، دەمێ هێژ ئەز سنێلە من جارەکێ ل بابێ خوە پرسی، تە بۆچی چەک هلگرتییە و ڕێیا پێشمەرگاتییێ هلبژارتیە، بۆچی کارەکی دی ناکی، بابێ من ب گڕنژین ڤە بەرسڤا من دا: “کوڕێ من، دڤێت هندەک هەبن بەرگرییێ ژ ڤێ ئاخێ بکن، هەکو من نەکر و یێ دی نەکر و مە هەمییان چەک دانا و پشتا خوە دا ئاخا خوە ئەڤە وەلات ڕزگار نەبوو و یا مە هەی ژی دێ ژ دەست مە چت، دێ شیرەتەکێ ل تە کم، هەکو جارەکێ ملەتێ تە یان ئاخا تە کەفت د دەلیڤێن تەنگ دا، ب هەر ڕەنگێ بت دڤێت تو بەرگرییێ ژ وەلاتێ خوە بکی و ملەتێ خوە بپارێزی، لێ هشیار بی چەکی بۆ چو تاکە کەسان و بۆ براکوژییێ نەهلگری!”، ئەڤە شیرەتا بابێ من بوو و من ژی هەر هینگێ بۆ وی سۆز دایە، پشتی من باش هزرێن خوە کرین من بڕیار دایە سوبەهی بچم کوردستانێ و چەکی ل دژی هۆڤێن تارییێ هلگرم، هیڤییا من ئەوە هوون ل من ببۆرن…
هەر دو زاڕۆکێن وی یێن د ژییێ دەهـ و دوازدە سالییێ دا خوە د بابێ خوە وەرکر و هەمبێز کر، ب گری و ڕۆندک ڤە:
– باب تو ناچی مە نەهێلە ب تنێ، مە هیڤی ژ تە هەیە نەچە!
هەڤژینا وی ژی خوە نەڕازی کر:
– بلا کوڕێن دز و گەندەلان، بلا خودانێن ڤیلایێن سەرێن ملان، خودانێن مووچەیێن بندیواران بچن شەڕی، یێن ئێک رۆژ تنێ ژی پێشمەرگاتی نەکری…
پشتی ڕاگری ب ئەنیا هەر دو زاڕۆکێن خوە ڤە ماچی کری، ئاخفتنا هەڤژینا خوە بڕی:
– بۆ وان ناچم شەڕی، دێ بۆ ڤان هەژار و بەلەنگازێن بێگونەهـ چم، سۆزێ ددم وە ب سەرکەفتن ڤە ڤەگەڕم، ئەڤە ئەرکە ل سەر ملێن مە، مرۆڤ بۆ خوە ب تنێ ناژیت، هندەک دمرن دا هندەک دی بژین، هندەک شەهید دبن دا نفشێ پشتی وان ب ئاشتی و ئازادی بژیت، هندی ئەڤ دیمەنێن ستەمکارییا داعەش ل بەر چاڤێن من بن، کەس نەشێت من ب ڕاوەستینت، ژ شەرمزاری هەر ڕۆژ چەند جارکی دمرم، بلا مرنا جارەکێ بت ب سەربلندی، دێ هەر چم و دڤێت بچم…
ڕۆژا پاشتر ڕاگری خاترا خوە ژ مالباتا خوە خواست و بوو خاترخواستنا دووماهییێ، پشتی تۆمارکرنا چەند داستانان د گەل پێشمەرگەیێن قارەمان، ڕۆژا ڕزگارکرنا شنگالێ ئەو ژی دگەھت کاروانێ نەمران.
________________
٭ هێلن ئادەمس کێلەر، نڤیسەره‌کا ئەمریکی یا ناڤدارە، د ناڤبەرا سالێن (١٨٨٠ – ١٩٦٨)ێ دا ژیایە خوەدانا بەرهەمێن مەزن و پەرتووکێن گەلەک ناڤدارە.
