شڕۆ
محسن قۆچان
د رەگەزنامه‌يێ دا ناڤێ وی شەریف بوو، لێ دگۆتنی شڕۆ، یان ژی شڕۆیێ دین، هەرچەندە گەلەک يێ مەزن ژی نەبوو، لێ داڤێن سپی پرچا وی نەخشاند بوو، چلێ هاڤینێ ژی بایە، ساکۆیەکێ فرفۆتە دکرە بەر خۆ، هچکێن وی دو بهۆستان ب سەر دەستێ وی ڤە دچۆن، کوملکەک دبن ساکۆی ڤه دکرە بەر خۆ، ژ به‌ر قڕێژێ رەنگ لێ نەمابوو، بیرا دایکا وی ژی نە دهات کانێ کەنگی د ئاڤێ ڤەدایە، خورتان شەرتانێ ل سەر رەنگێ کوملکێ وی دکر، لێ کەسەک ژی د شەرتانا خۆ دا ب سەر نە دکەت.
ئەگەر مرۆڤی بێ وژدانی کربا و داڤەکا دەزی ژ شەلوالێ وی کێشابا، دا حەفتێ پنيیێن رەنگاورەنگ ژێ وەریێنە بەر پیيان، شەکالا وی هه‌ر ب ناڤ شەکال بوو، خۆ دویستۆڤسکی ژی نە دشیا ب درستاهی پەسنا وێ بکەت، سەد جارکی چۆبوو نک پنیدۆزی، بزمارێن هویر و گر ل سەر سندانێ تێ چکلاندبوون، برغی کربوو، ب وێ شەکالا ب ناڤ شەکال پييێن خۆ یێن ب هێز ل ئاخا کۆلانێ ددان، گژێن ژێ دهات، ب ڤێ چەندێ خەلکی دزانی ئەڤە ئەوە و دا بێژن:
– ئەڤە شڕۆیێ دین هات.
ئەرێ یێ دین بوو، لێ نە ژ دینێن مزر بوو، زیان نەدکرن و نە ژی دداڕەسیا كه‌سێ، هەر کەسەکێ داخوازا هاریکاريیا وی کربا، دا وەکى خۆ هاری کەتن و ئەگەر یێ ماندیبا، یان د خۆڕا نەدیتبا، دا بێژیت:
– هەڕە بێژە بابێ خۆ بۆ تە ئێکێ نوی بکڕیت.
هنده‌ک زڕزڕک ب سینگی ڤەبوون و کۆلان ددانە سەر پيیەکی، کاغەز کۆم دکرن و د بەر ڕا دکرە گازی:
– شڕۆوا دینا.. شەکر تەحلە، تۆڤ شرینە.
ئەگەر کەسەکی کوشتبا شەکر نەدخوار، لێ ئەگەر تە کيلۆیەکا تۆڤچای دابا ڤێ، دا د گاڤێدا کڕینیت.
***
ئێڤارا رۆژا پێنجشەمبی بوو، مالا سۆفی عەلی شەکرۆکێن خێرێ ل سەر زاڕۆیان بەلاڤ دکرن. زاڕۆیان به‌هرا خۆ بربوو و ڤەڕەڤی بوون، د بەر لاڤایان ڕا کڕاندبوون و هێ دەڤێ وان یێ شرین بوو، گژێنا پييێن شڕۆی هات و تۆز ب سەر کۆلانێ ڤە چۆ، سوفی عەلی دو شەکرۆک دانەڤ حەلۆکا کچا خۆ و گۆتێ:
– بابۆ بدە شڕۆی.. خێرەکا مەزنە.
دەمێ حەلۆک ژ دەرۆکی دەرکەتی، شڕۆ چەند پێنگاڤه‌کا ژێ بۆری بوو، گازی کرێ:
– وا شڕۆ.. وا شڕۆ.
شڕۆ راوستا، نیشانێن گەلەک پسیاران ل سەر دێمی بوون، ب دەنگەکێ بۆڕ گۆتی:
– تە چ بوو حەلۆکێ بیتانۆکێ؟
– ها ڤان دو کتێن شەکرۆکان بهاڤێژە دەڤێ خۆ.
دێمێ وی تێکچۆ.. گڕنژی و جارەکا دی ناڤچاڤێن وی بوونە کوریشک، پاشی چ ئیشارەت نەمانە ل سەر دێمێ وی.
– ئەز شەکرۆکان ناخۆم.
– بۆچی؟
– هەما ژ خۆچی.
یا دی ب سترانکی گۆت:
– ئەز ناخۆم و ئەز ناخۆم.. شەکر تەحلە و تۆڤ شرینە.
– تو بهاڤێژە دەڤێ خۆ، پاشی ئەگەر یا خۆش نەبوو تف بکە.
– پا ئەگر د خۆش بوون؟
– گۆشتی پێ بگری.
– پا ئەگەر د خۆش بوون، ب دلێ من بوون و من حەز ژێ کر، ئەز هوی بوومێ، هنگی دێ کى دەتە من ڤە؟
– هنگی.. خودێ یێ مەزنە.
ناڤچاڤێن وی بوونە گرێ، تەڕاتى د چاڤێن وی دا برسکی، ب کەرب ڤه دەستێ خۆ بلند کر و دفنا خۆ خوراند و بەردەوامی دا ئاخفتنا خۆ:
– بەرێ خۆ بدێ کچێ.. هەی داپیرا مامێ خۆ، راستە دوهی، ئەڤرۆ و هنگی ژی خودێ یێ مەزنە، مامێ تە یێ ئەحمۆ سکتی و تە دو شەکرۆک دانە من، سوبەهی دڤیت ئەز بەرەکی ل کولۆخێ تە بدەم دا دو شەکرۆکان ژ تە چێ بکەم، هه‌ى دایکا من.. خەلک سەرا تشتێن خۆش ئێکودو دکوژن، ما ئەزێ دینم؟ من مەژيیێ کەری خواريیە دا خۆ هوی کەمە خوارنێن خۆش، ئاخفتنێن خۆش، نڤینێن خۆش و جلكێن پاقژ و خۆش؟ ئێ کەس نادەتە من، بەلێ تشتێ نەخۆش کەسێ نەڤێن و هەمی گوڕ دکەنە بەر من.
ل خۆ زڤڕی و ب کۆلانێ دا چۆ، شەکالا خۆ خڕاند و هەر گازی کر:
– شڕۆوا دینۆ.. شەکر تەحلە، تۆڤ شرینە.
ل پشت ئیخلا خانى، سۆفی عەلی گوهداری دکر، تەپەک ل رانێ خۆ دا، شپێن ژێ هات و د گەل خۆ گۆت:
– من هزر دکر ئەڤە یێ دینە!
٢٠|١١|٢٠٢٤
