ڤەژاندنا ڤەژینێ
خالد علی سلێڤانەيی
تژی پاخلێن خوە بھار بکە
و ل سەر دەڤێ برینا خوە بمەشە،
قۆپکێن قولاچکێن رەشەڕۆژان بشکێنە
د قۆسکێ قۆناغا نوی دا پاشڤە بکێشە
و بەردە ئەنیا رەشبینیيێ…
خوەلیيێ ب خوەلیسەرييا خوە دا بکە
قەشەنگ.. قەشەنگ.. ب رێز بێرێز
قەفتێن قێژیێن بێبەھرییا خوه مینا جۆت کەزییا بڤەھوینە
کرێتیيا ئادگارێن کەتوارێ خوە پێ بنخێڤە…
ئاگرێ کەربا خوە تژی دفنا ناخا خوە یا قەڕمۆکی بکە
و دۆزەخا ڕابۆری ب خەمسارییەکا خەمخوەر بقەڕسینە…
ئەی قورمێ قەھرا قەڕمتی
ئەی قۆدیکا قەھرەمانییا قەدەغە
قوڕقوڕا تە قەچاخە
برسا تە کمباخە
دلێ ئەوران نەشکێنە
تەرمێ ھیڤییا تە ھێشتا ساخە…
کنجڕێن د بوقچکێ رێڤنگییا خوە دا
ب دەزیێ رێزانییەکا وندابووی بدروی
ل سەر کلۆڤاندکا سەرنشیڤییا خوە
بکە ئالا…
و بژی.. بژی ھەتا مرن گۆمانێ ژ کارابوونا خوە بکت
و بژی.. بژی ھەتا کەربێن دەمی ژ تە ڤەببن
و بژی.. بژی ھەتا تو ھەتکا بێزاريیێ دبی
ھەتا رێک ژ پێنگاڤێن تە بترسن
ھەتا ژیان ل سەر دفنا خوە
ل بەر پێیێن مرنا تە خوە قوربانی تە بکت…
و ژبیر نەکە،
ئاگری ب ئاگری بڤەمرینە
بەفرێ ب بەفرێ بحەلینە
مرنێ ب مرنێ بترسینە
خوە ب خوە بڤەژینە
دەمێ بەرەڤاژی دبیت یاسا
پرادۆکس چەکە
و جاردی ژ بیر نەکە
پاییز لەیلانە
وەریانا راستەقینە ئەوە دەمێ
تو د ناڤ خوە دا گەش نەبی ڤە
ھینگێ ژدەستدانە
ھینگێ ھەمی تشت بێ مەرەقە
رۆناھی بێ رەونەقە
ژبیر نەکە…
جیھان ھەمی ببت وەریان
و پاییز ل سەر تە بکن فەرمان
باوەر نەکە.. ژبیر نەکە
و تژی پاخلێن خوە بھار بکە
ئەی ڤەرەستيیێ ژ خوە
ما کی ھندی تە ب سەنگێ سڤکە؟
