رێژین حكمەت
ئەز بۆ شعرێ دنڤیسم و…
شعر من نێزیكی بیرھاتنێن تە دكەت
تە ل بیرە؟
ل شەڤێن درێژ…
تە پەیڤ بۆ من دكرنە گلوازە و
ھینگێ…
تە ئەز فێری نڤیسینا شعرێ دكرم
ئەرێ…
تە ئەز فێری سیاربوونا عەوران دكرم
دفڕیم…
بلند.. بلند
تا من دادان ژ بیر دكر
تو ئەو شعر بووی
ئەوا من دڤییا بنڤیسم و
من نەشییا ب دووماھی بینم
وەرە بنێڕە
ل ھەمی لاپەرێن من یێن قورمچاندی
ل وێنەیێن من بنێڕە
دەما تە دگۆت:
دێمێ تە شعرەكا نەنڤیسایە
پا تە نەدكرە شعر و
ئھا دا نوكە…
تە د ناڤ بەرپەڕێن خوە یێن ڤەشارتی دا بینم
تو چەندێ دویری و…
ئەز چەندا دویر!
تە ل عەسمانان ئەز فێر دكرمە فڕینێ
تە نیشا من نەدا
دێ چاوان لیس بم؟
ئەرێ…
تە نیشا من نەدا
دێ چاوان ستێران گرم و…
دێ چاوان دگەل بارانێ ھێمە خوار
ئەرێ تە فڕین نیشا مندا و
تە دادان ژ بیرا من بر
ئھا، ئەرێ…
ھێشتا تو یێ د ناڤ شعرەكا مندا
تو شعرەكا من بووی
چەندین جاران من تو دنڤیسای و
من تو رەش دكری
ئەرێ من تو دنڤیسای و
جارەكا دی من تو رەش دكری
و ل دووماھی جار
ئەو تاكێ من ل سەر دادایی
نە ھەمان باخچە بوو یێ تە ئەز فێركریمێ
ئەرێ نە ھەمان ئەو باخچە بوو
تو دزانی بۆ؟
نەخێر…
ئەز دزانم تو نزانی و…
تو ژی دزانی ئەز نزانم
لێ یا ئەز و تو ھەردوو دزانین
تو ئەو شعر بوویی یا من دەھـ جاران نڤیسای و من رەشكری و
من نڤیسایە ڤە…
بێژە من…
تە چەند شەڤبێری دگەل من برینە سەر
تو د چەند خەونێن من دا بوویە مێھڤان و
ھێشتا ئەز یێ ل وێ شعرێ دگەڕم
یا من نڤیسای
یا ھێشتا تە نەخواندی و
ئەرێ ئەو شعرا تە ھێشتا نە خواندی و
ھێشتا دەستێن من
د بلندکرینە و…
ھندە دێ گەھن ئەسمانێ حەفتێ!
ھەر لاڤایا بۆ ھاتنا تە دکەن
نە تو ھاتی و…
نە لاڤایێن من تێرا ھاتنا تە كرن
ئھا ل ئەڤی باژێڕی
داڤێن پرچا من داڤ داڤ یێ سپی دبن
تە ھای ژێ یە
پیراتیێ خۆ ل دۆر من ئالاند
دا چ چێ بیت
ئەگەر تو ئەو شعر بای
یا تە ئەز فێری نڤیسینا وێ دكرم و
ئەڤرۆ من دیوانا خوە یا ئێكێ پێ ناڤكربا..
