هونەرمەند عادل سندی، سترانبێژى كۆچك و دیوانان
دیدار: عبدالجبار عاصف
ل دەستپێكێ من گەلەك حەز هەبی ل سەر مێهڤانكرنا ل ناڤ بەرنامه و روینشتنان، بەلێ ل ڤێ داویێ ئەز دبینم كو گەلەك رێز ل هونەرمەندی ناهێتە گرتن و بتایبەت ئەو سترانبێژێ خۆدان شیان و خۆدان دەنگێ خۆش و جیاواز. ئەز دبینم بتنێ ئەو گرنگیێ ددەنە موزیكێ چ یا خۆش یان نەخۆش بیت و بتایبەت هەكە هات و كچەكا جوان ژی دگەل برەقسیت. ئەوان ئاگەهـ ژ پەیڤێ و دەنگی نینە، بتنێ كچكا بیننه بەر چاڤێن خەلكی.
ل ناڤ وەلاتێ مە كوردستانێ و ژ بەر كو دەمێ ئێك ژ مە دهێتە ژ دایك بوون و هێش زارۆك دێ بینین كو ئەم گوهـ ل سترانێن فلكلوری دبین. چ ب رێكا ئامیرێن پەخشكرنێ یان ل ناڤ هندەك روینشتنا و ل ناڤ دیوانان و ب رێكا ئێك ژ كەس و ناسێن مە یان ئێك ژ نێزیكێن مە. ب راستی سترانا فلكلوری هندی یا كەڤن بیت تاما وێ خۆشتر دبیت و بالكێشتر دبیت ب تایبەت ئەو سترانێن هندەك ژ چیروكێن كوردان ددەنە دیار كرن. هەلبەت ب رێكا ڤان جورە سترانا ئەم گوهـ ل گەلەك چیروكان دبین و ئەڤ چیروكە نامرن و هەردەم دئێنە بیرا مە و ب تایبەت ئەو چیروكێن ل سەر دەمێ بابكالێن مە. چێدبیت هندەك كەس بێژن ئەو جورە سترانە یێن مروڤێن دانعەمرن، بەلێ وەكو یا دیار و بەرچاڤ، دێ بینین كو گەلەك ژ گەنجێن مە ژی گوهداریا ڤان سترانان دكەن و بەلكو گەلەك سترانبێژێن فلكلوری هەنە ژ گەنجان ژی. ئەم نەشێین خۆ دویر بكەین ژ ڤان سترانێن فلكلوری. چنكو ئەو مینا گولەكا پر بێهنن د ناڤ باخچەیی دا. چنكو گەلەك بیرێن كەڤن د ئینن بیرا مروڤی. هەروەسا دەمێ مرۆڤ گوهداریا ڤان جورە سترانا دكەت مرۆڤ هەست ب جیهانەكا دی دكەت. هەست ب ژیانەكا دی دكەت و وەكو ئەم دزانین كوردستان پرە ژ چیروكێن هەری ب ناڤودەنگ و خۆش مینا چیروكا خەجو و سیابەند و چیروكا مەم و زین و چیروكا عەلو و فاتمێ و گەلەكێن دی. هەروەسا گەلەك سترانبێژێن فلكلوری یێن مه‌زن د ناڤ گورەپانا گوتنا سترانا كوردی یا فلكلوری دا هه‌بوون مینا هونەرمەندێ ب ناڤودەنگ محمد عارفێ جزیری و عیسا بەرواری و مریم خان و گەلەك هونەرمەندێن دی ژی. هەروەسا هونەرمەندەكێ گەلەك دەنگ خۆش ل ناڤ باژێرێ زاخۆ و ب تایبەت ل دەڤەرا سندیان دیار بیە و ب دەنگێ خۆ یێ خۆش و نازك چەندین سترانێن پر بها یێن فلكلوری گوتینە و جەماوەرەكێ بەرچاڤ بۆخۆ چێكریە ئەو ژی هونەرمەندێ فلكلوری عادل سندی یە. مە ژی ئەڤ چاڤپێكەفتنە ل گەل وی كریە و مە هندەك پسیار ژێ كرینە. ئەوی ژی ب دلەكێ بەرفرەهـ بەرسڤا هەمی پسیارێن مە داینە.
پ / عادل سندی كیە ؟
عادل سندی / ئەز عادل سندی مە ئاكنجیێ باژێرێ زاخۆ مە. خەلكێ دەڤەرا سندیا مە.
پ / تە كەنگێ هەست كریە كو دەنگێ تە یێ خۆشە و كەنگێ تە دەست ب ستران گوتنێ كریە؟ و دەست پێكا تە بۆ گوتنا سترانێن فلكلوری بی یان سترانێن ئەڤینیێ بی.
عادل سندی / باوەركە ئه‌ڤ پسیارە د جهێ خۆدایە. ئەز وەكو هەر كەسەكێ ژ بنەمالەكا كوردم. ئەم ل سالێن هەشتیان ل ژدەرڤەی باژێری بین و ل ناڤ شورەشێ بین ل گوندی وهینگێ ئه‌ڤ هەستێ ستران گوتنێ ل نك من پەیدا بۆویە. من گەلەك حەز ل سەر سترانا كوردی هەبی و هەتا بیە دەمێ سەرهلدانێ و ژ بەركو ئەم ل گوندا بین لەورا چ دەرفەت بۆ من پەیدا نەبوو كو ئەز رابم ب گوتنا سترانا. بەلێ سوپاس بۆ خۆدێ پشتی سەرهلدانێ و ب تایبەت ل سالا ( 1991 ) ئەم هاتین بۆ ناڤ باژێرێ زاخۆ و من دەست ب گوتنا سترانا كر.
پ/ تو وەكو سترانبێژێ فلكلوری، تو داخبارێ ب كیش سترانبێژێ فلكلوری؟
عادل سندی / باوەركە نە بتنێ سترانێن فلكلوری بەلكو هەمی جورێن سترانا من گوهداری لێ دكر و من دگەل خۆ دگوتن و بتایبەت ل ناڤ كەس و ناسێن خۆ من ستران دگوتن و سوپاس بۆ خۆدێ كو هەمیان ژی هاندانا من دكر ژ بۆ ستران گوتنێ وهەمیان ژی دگۆتنە من كو دەنگێ تە یێ خۆشە. بەلێ بارا پتر من حەز ل سەر سترانێن فلكلوری هەبوو. پ/ وەكو من گوه لێ بووی و خەلك ژی دبێژن دەنگێ تە گەلەك نێزیكی دەنگێ هونەرمەندێ خۆدێ ژێ رازی (محەمەد تەیبی ) یە. تە چەوا زانی دەنگێ تە نێزیكی دەنگێ وی یە؟
عادل سندی / باوەركە چ گومان تێدا نینە. ئەز ب خۆژی گەلەك جاران دەمێ گوهداریا دەنگێ خۆ دكەم. ئەز هەست دكەم كو ئەڤە هونەرمەند محەمەد تەیبە، هەروەسا هونەرمەندێ خۆدێ ژێ رازی محەمەد تەیبی ژی گوهداریا دەنگێ من كر و گوت ئەڤە دەنگێ منە. گوت ئەڤە ئەزم سترانا دبێژم. ئەو ژی وەكو مەوهیبەیەكێ یە ژ نك خۆدێ. دەنگێن مە گەلەك نێزیكی ئێكن و من ب خۆژی گەلەك حەزژ سترانێن محەمەد تەیبی كریە و من گەلەك گوهداریا سترانێن وی دكر ژ سالا ( 1979 ) و هەتا نوكە ژی و ئەز داخبارێ وی مە و ئەز نەپەشیمانم. هەردەمێ ئەز بێمە مێهڤانكرن ب تنێ ئەز سترانێن وی دبێژم.
پ/ هونەرمەندێ خۆدێ ژێ رازی ( محەمەد تەیبی) چەوا زانی كو دەنگێ تە نێزیكی دەنگێ ویە و دەمێ زانی چ گوتە تە و هەستێ وی چ بی؟
عادل سندی / باوەركە هندەك ژ هونەرمەندێن مە سەرەدانا باژێرێ هەولێرێ كرن ل وێ سالا هونەرمەندێ خۆدێ ژێ رازی محەمەد تەیب ڤەگەریایە كوردستانێ، ب راستی ژی گەلەك رێز لێ هاتە كرن و پێشوازیەكا گەلەك گەرم و مەزن لێ هاتە كرن. هینگێ هونەرمەندێن مە چوون ژ بۆ سەرەدانا وی و گوتنێ ئێدی مە منەت ب تە نینە كو تۆ بێی زاخۆ یان نە ئێی. ئەوی ژی ب حێبەتی ڤە گوتە وان بۆچی؟ هونەرمەندان ب كەنی ڤە گوتنێ باوەركە مە هونەرمەندەك ل باژێرێ زاخۆ هەیە. دەمێ ئەم گوهداریا دەنگێ وی دكین ئەم دبێژن ئێدی ما محەمەد تەیب بۆ چیە؟! هەما ئەو ب خۆ یێ ل ناڤ مەیە.
گەلەك به‌حسێ من بۆ وی كربین. وی ژی گوتە وان دەمێ ئەز بێم بۆ باژێرێ زاخۆ، وی هونەرمەندی نیشا من بدەن ئەز حەزدكەم وی ببینم. جارەكێ ل ناڤ بارەگایێ رادیویا زاخۆ وانا ئەو مێهڤان كر. پەیوەندی ب من كرن گوتن من كاك عادل ئەم حەز دكین تو بێی وەكو مێهڤانێ رادیویا زاخۆ مە بۆ تە سپرایزەكا دروست كری و ئەم حەزدكین تو بێی. ئەز ژی هاتم و من دیت محەمەد تەیب یێ روینشتیە. گوتە من پێدڤیە تو بۆمن هندەك ژ سترانێن من بێژی و هندەك سترانێن ب زەحمەت ژی هاڤێتن ل بەر من. گوت ئه‌ڤ سترانە هەمی هونەرمەند نەشێن بێژن چنكو یێن دوو یان سێ نەغەم بین. من ژی دەست ب گوتنا وان سترانا كر و ب راستی ئەو گەلەك حێبەتی بۆو و گوت باوەركە نوكە ئەز ب خۆ نەشێم ڤان سترانا بێژم. كەیفا وی گەلەك هات و گوت ئەڤە ئێكەمین كەسە ئەز ببینم ده‌نگێ وی وه‌كو دەنگێ من. پ / وە كو تو سترانبێژ، دەمێ تۆ دروینیە خۆارێ و ب تنێ، تو حەز دكی گوهداریێ ل كیش جورێ سترانا بكی. سترانا فلكلوری یان سترانا ئەڤینیێ؟
عادل سندی / هندەك جاران دەمێ بتنێ و ڤارێ دبم یان بچمە ل ناڤ گوندێ مە، باوەركە ئەو ژی دمینیت ل سەر جهـ و وارێ مرۆڤ بچیتێ . چنكو هەمی جهـ نە یێن هەمی جورێن سترانانن. بەلێ زوربەی جاران حەز دكم گوهداریا سترانێن قەهرێ بكم. بەلێ هەكە ئەز سترانەك یان دوو سترانێین محەمەد تەیبی نە بێژم بێهنا من نائێت.
پ / وەكو تو سترانبێژ، تو نابینی دەنگێ تە كێمە ل سەر شاشێن تیلەفزیونان و ل ناڤ چاڤپێكەفتنان و تو كێم دهێیە مێهڤان كرن ل ناڤ بەرناما ندا تۆ نینی، ئەگەر چنە؟
عادل سندی / ل ڤێرێ ئەز دبێژم ئەگەر هەر ژ من بۆ خۆیە. ل دەست پێكێ من گەلەك حەز هەبی ل سەر مێهڤانكرنا ل ناڤ بەرنامه و روینشتنان. بەلێ ل ڤێ داویێ ئەز دبینم كو گەلەك رێز ل هونەرمەندی ناهێتە كرن و بتایبەت ئەو سترانبێژێ خۆدان شیان و خۆدان دەنگێ خۆش و جیاواز. ئەز دبینم بتنێ ئەو گرنگیێ ددەنە موزیكێ چ یا خۆش یان نەخۆش بیت و بتایبەت هەكە هات و كچەكا جوان ژی دگەل برەقسیت. ئەوان ئاگەهـ ژ پەیڤێ و دەنگی نینە . بتنێ كچكا ل بەر چاڤێن خەلكێ برەقسینن!
پ/ ب دیتنا تە جەماوەرێ سترانا فلكلوری پترە. یان جەماوەرێ سترانێن ئەڤینیێ؟
عادل سندی / ئەز دبینم هەتا رادەكی یا باشە. ئەز دبینم گەلەك ژ گەنجان ژی گوهداریا سترانا فلكلوری دكەن و تێدگەهن. پ / هندەك جاران تو بەشدار دبی ل ناڤ ئاهەنگان و ب وێ بەشداریێ تو سترانێن فلكلوری دبێژی یان ژ تە دئێتە خۆاستن كو تو سترانێن ئەڤینیێ بێژی؟
عادل سندی / بەلێ ئەز دهێم داخۆاز كرن. بەلێ ئەو ستران ژ من دهێتە داخۆاز كرن ئەوا ل دویڤ ستایلێ من. ئەز سترانێن ئەڤینیێ ژی دبێژم بەلێ ئەو سترانا ب رێز بیت. چنكو ئەز وێ سترانێ نابێژم ئەوا ئەز ببینم كو دێ ناڤودەنگێ من پێ شكێت.
پ / تە چ پێشنیار هەنە ژ بۆ چەوانیا بەلاڤكرنا سترانێن فلكلوری؟
عادل سندی / ب راستی من گەلەك رەخنە هەنە ل سەر سترانبێژان. چنكو ئەز یێ دبینم ل سەر شاشێن تێلەڤزیونان هندەك دێ هێن و سترانا فلكلوری بێژن بەلێ مخابن مافێ وێ سترانێ نادەنێ. چنكو دێ رابن و ژ نك خۆ هندەك پەیڤان ئێخن د ناڤ دا. ئاوازا وێ سترانێ و تاما وێ نامینیت. هەكە هات و ئێك ژ مە بئاخڤیت یان رەخنەكێ لێ بگریت. ئێكسەر دێ بێژیت: ما تە چ شول پێ هەیە! چنكو ئەو ستران ب وی شێوەی نائێتە گوتن. چێدبیت خۆدانێ وێ سترانێ نەمایی بیت. ئەڤجا دێ بێژیت مانێ فلكلوریە.
پ / ئایا نوكە و ڤێ پێشكەفتنا زانینێ و ڤان موبایلا و ئەنترنێتێ چ كارتێكرن ل سەر بەلاڤكرنا سترانا فلكلوری ب تایبەتی كریە. و ل سه‌ر سترانا ئەڤینێ و جورێن دی ب گشتی كریە؟
عادل سندی / باوەركە ڤێ پێشكەفتنێ و ڤان موبایلا و ئینتەرنێتێ چ بۆها بۆ هونەری نەهێلا و ب تایبەت بۆ سترانێ. نوكە دێ بینی كەسەك دێ هێت و سترانەكێ هەر یا چەوا بیت بێژیت، ل روژا دی دێ بینی یا بەلاڤ بی ل هەمی جیهانێ. ل سەردەمێ بەرێ مە گەلەك زەحمەت ددیت و مە گەلەك پارە لێ دمەزاخت هەتا مە سترانەك توماركربا.
پ / ستران بێژ دشێت پشت گەرمێ سترانگوتنێ بۆ دەبارەكرنا ژیار و ژیانا خۆ و خێزانا خۆ بیت ؟
عادل سندی / ب هیچ رەنگی ئه‌ڤ تشتە نینە. بتنێ هەكەر هات و ئه‌ڤ سترانبێژێن گەنج و ئەو ژی ب رێكا سترانگوتنێ ل ناڤ داوەت و شەهیانا. بەلێ ئەز دبینم ئەو ژی یاكێم بۆوی.
پ / تە سترانەك سەیر یا گوتی ئەو ژی بناڤێ ( شانە شانە ) تو دشێی بۆمە بدەیە دیار كرن كا چیرۆكا ڤێ سترانێ چەوابی و چەوا پێك هاتیه؟
عادل سندی / ب راستی من گەلەك هزرێن خۆ كرن كو ئەز رابم و سترانەكا جیاواز و ستایلەكێ نوی بێژم. بەلێ ژ بەری سەد سالا و هەتا نوكە كەسەكی ئه‌ڤ هزرێن هوسا نەكرینە. بتنێ دێ رابن و سترانان ب كچێ و بلبلكی بێژن. هەكەر تو هزرا خۆ د وێ مەزناتیا مێشێ دا بكەی دێ بینی گەلەك و گەله‌ك ب مفا یە و هێژایە كو مرۆڤ سترانەكێ پێ بێژیت. لەورا ئەز چوومە ل نك هەڤالەكێ موسلمان و خۆدێناس و من ئه‌ڤ هزرە گوتێ كو پەیڤ بێتە نڤێسین ل سەر مێشا هنگڤینی. ب راستی ئەوی ژی ئه‌ڤ پەیڤە بۆمن نڤیسین وەك دلێ من. ئەز نە پەشیمانم من ئەو سترانە گوتی و كەسەكی هزرەك نەكریە كو سترانەكا هوسا بێژیت.
پ / تە جورێن دی یێن سترانان گوتینە مینا یێن ئاینی یان سیاسی یان وەرزشی و هتد..؟
عادل سندی / من هەمی جورێن سترانا یێن گوتین. ئەز دبێژم ئێكەم كەس سترانا ئاینی گوتی ل دەڤەرێ ئەز بیم ل پشتی سەرهلدانێ. گەلەك ب دلێ خەلكێ بی و ل سەر ئەزمانێ زارۆك و مەزنان ژی بی و من گەلەك سترانێن ئەڤینیێ ژی یێن گوتین و ب تایبەت سترانێن فلكلوری.
پ / ئەو سترانێن فلكلوری ئەوێن تە گوتێن ب دەنگێ خۆ، هەمی یێن تە ب خۆنە یان تە ژ هندەك هونەرمەندێن دی وەرگرتینە. ئانكو ئەم دشێن بێژین ئه‌ڤ سترانە یا هونەرمەند عادل سندی یە؟ عادل سندی / من سترانەك یا گوتی ئەو ژی بناڤێ ( لوشڤانو) فلكلورە و كەسەك نزانیت ئەو یا كیش سترانبێژی یە. سترانەكا كەڤنە بەلێ مە نوی كر و موزیكەكا خۆش دانا سەر ل ناڤ ستودیویا خۆدێ ژێ رازی ( عادل حاجی ) و بهاریكاریا هونەرمەند سمیر زاخۆیی و موزیكژەن هاوار میكائیل. و من هندەك سترانێن فلكلوری ژی یێن گوتین و بتایبەت سترانا ( دێرسم ) ئەو پەیڤ یێن محەمەد تەیبی نە. پ / هەكەر هات و تە بڤێت كو تۆ سترانەك یان چەندین سترانێن خۆ تومار بكەی، دێ چەوا رابی و موزیكێ و موزیكژەنان په‌یدا كەی؟ ئانكو تیپەكا تایبەت یا موزیكێ هەیە كو رابن ب دروستكرنا موزیكێ بۆ سترانێن تە؟ عادل سندی / باوەربكە مە چ تیپێن موزیكی نینن. بۆ ڤێ چەندێ پێدڤیە سترانبێژ پارەكێ زور هەبیت دا بشێت سترانا خۆ تومار بكەت. چنكو موزیك ل ڤێرێ دروست نابیت، بەلێ ل وەلاتەكێ دی دێ هێتە دروست كرن.
پ / وەكو تۆ سترانبێژێ فلكلوری. تۆ چارەنووسێ سترانا فلكلوری چەوا دبینی؟
عادل سندی / هەتا راددەكی باشە هەكە كەس دەستكاریێ ل ناڤ نەكەت.
پ / ژ ڤان سترانێن تە ب دەنگێ خۆ گوتین و هونەرمەندێن دی ژی گوتین. كیش ستران نێزیكی تەیە و تۆ خۆشسیا خۆ دبینی دەمێ گوهداریێ لێ دكەی ؟
عادل سندی / ستران گەلەك ژ ئێك د جیاوازن و ئەو چەندە ژی دمینیت ل نك جەماوەری، بەلێ پێدڤیە مرۆڤ ژ خۆ و شیانێن خۆ رازی بیت. پ / ئەو كیش سترانە هندەك هونەرمەندێن دی یێن گوتین و تۆ حەزدكه‌ی وێ سترانێ ب دەنگێ خۆ بێژی و تومار بكەی ؟
عادل سندی / گەلەك ستران هەنە ب تایبەت سترانێن محەمەد تەیبی. من گەلەك حەز هەیە ئەز سترانێن وی نوی بكەم.
پ / سترانێن فلكلوری زوربەی وان پێك دئێن ژ چیروكێن شەری و وخۆینداریێ. یان وه‌سا نابینی؟
عادل سندی / زوربەی وان یێن شەڕینە. ئەم دشێن بێژین حەفتێ و پێنج ژ سەدێ یێن شەڕینە و بیست و پێنج ژ سەدێ یێن ئەڤینیێنە.
پ / گەلەك جاران من گوهداریا سترانێن فلكلوری یا كری و ئەو ستران تە ب كورتی یێن گوتین، سەرەرای وێ چەندێ كو ئەو ستران هندەك هونەرمەندێن دی یێن گوتین بەلێ ئەو ددرێژن. ئەگەر چنە كو تە ئەو سترانە كورت كرینە؟
عادل سندی / هندەك ستران گەلەك د درێژن. ئەز كورت دكەم دا گوهدار ژێ بێزار نەبیت.
پ / بۆچی زۆربەی سترانێن فلكلوری ژ چیروكان پێك دئێن؟
عادل سندی / سترانا فلكلوری بخۆ چیرۆكە. یان چیروكێن ئەڤینیێنە یان یێن شەڕی. مینا سترانا عەلو فاتمێ و خەجو سیابەند و سترانا مەم و زینێ و گەلەكێن دی ژی. هەلبەت هەمی ژی پێك دهێن ژ چیروكان.
پ / هەكە تە گوهداریا سترانەكا فلكلوری كر ب دەنگێ هونەرمەندەك دی. ئێك سەر تو دێ وێ سترانێ ژێ وەرگری. یان پێدڤیە تۆ چەندین جاران گوهداریێ لێ بكەی و بۆخۆ بنڤیسی هەتا تۆ ژبەر بكەی؟
عادل سندی / هندەك سترانبێژ هەنە دەمێ سترانێ دبێژن هندی هند خۆش دبێژن هەما ئێك سەر یێ سترانبێژ بیت دێ وەرگریت. چنكو هەما ئێكسەر دچیتە د ناڤ دلێ مروڤی و خۆینا مروڤی دا و گەلەك سترانان ژی دێ گوهداریێ لێ كەم، دوو جارا و سێ جاران هەتا وەربگرم.
پ / ئایا سترانێن فلكلوری ژ دەڤەرەكێ بۆ دەڤەرەك دی دجیاوازن یان هەما هەمی دشێن هەمی سترانێن فلكلوری بێژن؟
عادل سندی / هەر دەڤەرەكێ سترانێن خۆ یێن تایبەت هەنە. مینا سترانێن دەڤەرا جزیرێ و دەڤەرا شنگالێ و دەڤەرا مە. هەر ئێكێ ژی تامەك تایبەت هەیە. ستایلێ خۆ هەیە. چنكو سترانێن هەر دەڤەرەكێ باسی چیرۆك و سەرهاتیێن وێ دەڤەرێ دكەن.
پ / تە چ هەیە تو بێژی بۆ ڤان سترانبێژێن فلكلوری یێن نوی هاتینە د ناڤ گورەپانا سترانگوتنێ دا؟
عادل سندی / داخازا سەركەفتنێ بۆ وان دكەم. بەلێ بتنێ من دڤێت بێژم كو هەكەر بڤێن سترانا فلكلوری بێژن بلا ل بەراهیكێ لاو ژ بەر بكەن. چنكو هەكەر سترانێ وەكی گوتنا خۆدانێ وێ نەبێژن چ تام لێ نامینیت. پ / ل ناڤ ئاهەنگان وەكو جەماوەر چ جورێ سترانا ژ تە داخۆاز دكەن و ب تایبەت كیش سترانێ و بۆچی؟ عادل سندی / ئەز دچم ل ناڤ ئاهەنگان. زوربەی جاران سترانا ( دێرسم و سترانا حەیران ژاروو ) ژ من داخاز دكەن.
پ / پێدڤیە سترانبێژ یێ خۆاندەوارو رەوشەنبیر بیت یان نە پێدڤیه؟
عادل سندی / دڤێت سترانبێژ یێ رەوشەنبیر و خۆاندەوار بیت.
پ / ژ بۆ دروستكرنا سترانا فلكلوری، ئایا ئاوازدانەر پێدڤیە. یان هەما سترانبێژ ئەو بۆ خۆ ئاوازا وێ دروست دكەت و دبێژیت؟
عادل سندی / ئەو ب خۆ سترانا فلكلوری یا دروستە ژ ئاوازێ و پەیڤێ ژی و چێنابیت دەستكاری تێدا بێتە كرن.
پ / ب دیتنا تە چێدبیت سترانبێژ خۆ بدەتە نیاسین ب تایبەت ب سەر فلان لایەنی یان فلان هوزێ یان فلان دەڤەرێ. یان هەما ستران بێژ مولكێ هەمی خەلكێیە و بێ جیاوازی؟ عادل سندی / سترانبێژ نە مولكێ خۆیە و نە مولكێ چ لایەنایە. بەلكو مولكێ هەمی خەلكێیە. ئەو ژی دمینیت ل نك وێ سترانا ئەو دبێژیت. هەكە سترانا وی یا خۆش بیت و ب دلێ هەمی تەخ و چینا بیت. هەلبەت دێ بیتە مولكێ هەمی كەسی. چنكو كەسەك نەشێت رێكێ ل گوهداریكرنا سترانەكێ بگریت. پ / تە هندەك ستران بۆ تێلەڤزیونان كلیب كرینە. تە گەلەك كلیب هەنە؟ عادل سندی / من نێزیكی حەفت هەتا هەشت سترانێن ئاینی یێن كلیب كرین. هەروەسا هەشت سترانێن ئەڤینیێ ژی و هەروەسا یێن سیاسی و وەرزشی ژی و ب تایبەت سترانێن فلكلوری. ئانكو نێزیكی ( بیست و پینج ) كلیب من هەنە و سوپاس بۆ خۆدێ هەتا نوكە ژی دهێنە وەشاندن بەلی ژ بەركو موزیك یا كەڤنە. لەورا دێ بینین بتنێ دێ ل ناڤ كەنالێن ئەردی هێنە وەشاندن. پ / دوماهیك پەیڤا تە چیە تو بێژی؟
عادل سندی / بتنێ پەیڤا من ئەوە كو رێز ل هونەرمەندان بێتە گرتن و هەر سترانبێژەكی ستایلێ خۆ یێ تایبەت هەبیت. نە هەما هەر سترانبێژێ بێت رابیت و سترانێن ئەردەوانی یان ئەیازی بێژیت. بلا ئەو ب خۆ بۆ خۆ ستایلەكێ تایبەت هەلبژێریت.
