هیڤیێن وەریایی
فهیمە ابراهیم – ریمشاید – ئەلمانیا
ئەو ب گیانێ من ڤە هاتبوو گرێدان، ئەم ببوونە ئێک رح د دو جەستەیان دا، نە دشیا ب ساناهی دەستان ژ من بەردەت، هەستەکى جوان بوو، کەسەک ببیتە ئەڤیندارێ تە، هەتا وێ رادەیێ، ئەو باوەریە هەبت ئەڤ گرێدانە یا هەروهەرە، نە کو دێ ب بۆرینا دەمی سست بت.
هەرچەندە من خوە ب پایزەکا پیر ددیت، لێ ئەو ب هەموو هەستێن خوە ل من ئالۆدە ببوو، قەدەرا من ئەو بوو ب تنێ مینا خەونەکێ و ئاشۆپەکێ بم، ل بەندا دەمی بمینم، بەلکو دەمژمێرێن هەڤدیتنا مە د چرکەيه‌کێ دا ب ژڤانەکی نەچاڤەرێ شاد ببن، د چاڤەرێبوونا دیتنەکێ دا من هزار برین دەرمان کرن و ل شوونا وان هزارێن دی دەربوون. هەستێ ژ دەستدانێ زەحمەتترین هەستە دلی بریندار بکەت، ب برینەکا نەچاڤەرێ کری. ژ نشکەکێ ڤە، تە بڕیاردا بچی، بچی یە وەغەرەکا دوور، دەمێ من پرسا ئەگەران کری، تژی چاڤێن تە رۆندک بوون، تە خاترا خوە خواست، تە هیڤیەک دابوو من دوبارە بزڤڕی، ب سالان ل بەندا سۆزا تە دایە من مام و تو نەهاتی.
چیڕۆکا من دگەل تە ب داوی نەهاتیە، بەلکو هندەک دیمەنێن وێ زێندی د پارچەيه‌کا دلێ من دا هلگرتی ماینە. من حەزکرن نینە وێ چیڕۆکێ ب داوی بینم، لەوا هێشتا ب هیڤی مە، هێشتا د ناخێ من دا هەستەک تە دحەوینت. هێشتا هندەک پەیڤ مابوون ب دارێژمە بەر سینگێ تە. من دڤێتن ئەڤ ترسا هندە سالان دلێ من دئازرینت، ژ دەستدانا تە ببیتە خەونەک و ژێ هشیارببم. من دڤێت دوبارە گەرماتیا دەستێن تە ترسا من هەمبێز بکەن، وەکو پەلەکێ ل زڤستانەکا سار من هەموویێ بکەتە گەرمۆک و هەستێ ترسێ بسۆژم.
ڤالاتیەکێ گیانێ من یێ ئالۆزکری، دەمێ من بڕیارا مرنا هێدی هێدی دای، ل وی دەمی من چ هیڤی بۆ ژیانێ نەبوون. دەمێ دەنگوباسێن تە ب ئێکجاری قوت بووین، من هەست ب داویا خوە کر. من باش دزانی تو یێ ساخی و یێ ب سلامەتی، لێ بەرسڤا نامەیێن من نادەی. فێر ببووم رۆژانە ل گەل نامەیێن تە ژ خەو راببم. تە فێر کربووم باوەر بکەم کو د سەر ڤێ هەموو دووراتیێ را، هێشتا یا گرنگم. ب ڤان هزرێن رەشبین، من بهارا خوە ژی بەهاند. د ترسم د ناڤا ڤێ رەشاتیێ ڕا ب خەندقم. یان خوە ژ دەست بدەم و ببمە لێبۆک. نهۆ من حەزکرنا چ تشتان نەمایە، هەتا خەونا ژی ب هاتنا تە ڤە نابینم، مینا بەلگێن زەر یێن ڤێ پایزێ من چ هیڤی بۆ مانێ نەماینە، ترسا من بایەکی ب هێزە هەردەما هات، دێ من دگەل بازڤیرکێن خوە دوور بەت و بەرزە کەت.
درەنگ هشیاربووم، ب هەستەکێ سار، ژ ناڤ نڤینێن گەرم دەرکەتم. من زانی نە یا باشم، لێ ل بەر خۆدیکێ راوەستیام و ئەو داڤێن سپی د ناڤ پرچا خوە ڕا ب بۆیاغەکا سپر، ڕەش کرن. لێ ئەو خیچ و خەتکێن کەتینە بن چاڤا، ب چ مکیاژان نە هاتنە بەرزە کرن. دەمێ ژیان هەموو دەرگەهان دگرت، هەموو دەرگەهێن دی ل پەی ب خوەڕایی دهێنە گرتن، هەتا دەرگەهێ دلێ تە ژی ل من دهێتە گرتن.
ل دەمەکی من ئاگەهـ ژ دەرگەهێن گرتی نەبوو، دەمێ دلێ تە هەمبەر خەمێن من یێ ڤەکری، ل وی دەمی من هزار بهانە بۆ مانێ هەبوون. هەکەر چۆن چەند یا فەر ژی با، لێ پێخەمەت ئەوا د ناڤبەرا مە دا، دا هەر مانێ هەلبژێری.
نوکە، من پێکول کر تە ژ سینۆرێن هەستێن خوە دوور بکەم، هەتا وێ رادەیێ کو خوە ڕازی بکەم کو چ چیرۆک و پەیوەندی د ناڤبەرا مە دا نەبوون. چ بیرهاتن مە پێکڤە گرێ نادەن، دەمێ گوهـ ل ناڤێ تە دبم، چ هەست دلێ من ئازار نادەن. خوزی ل وی دەمێ تە بڕیارا چۆنێ دای، من داویا چیڕۆکێ نڤیسیبا و دەرگەهێ پەرتووکا بیرهاتنێن مە ب ئێکجاری گرتبا. من پشتا خوە دا با رابردۆیی و ئەز ژی ب ریێا خوە چۆبام، من بزاڤا ڤەجەماندنا بیرهاتنێن تە و خوە د دلەکی ڤالا دا نەکربا.
نهۆ ل بەر خودیکێ ل داڤێن پرچا خوە یا سپی دنێرم، بۆیاغ ژی نەشێت شوونوارێن وان ڤەشێرت. دووراتیێ چ ل مە کر؟ تو چۆی و تە ب گەرمی خاترا خوە خواست. تە هیڤیەک بۆ زڤڕینێ ل پشت خوە هێلا! نوزانم چ چێبوو؟ چ روودا؟ ئەو هەموو هەستە ب ئێکجاری د دلێ تە دا هاتنە کوشتن. من باوەر نەدکر دێ مینا شەمالکەکێ ب ئێکجاری ڤەمری و رۆناهیا هەستێن مە دگەل دێ حەلیێن. ب ڤی ئاوایی توخیبێ دووراتیێ د ناڤبەرا دلێن مە دا دوورتر لێ هات، ب پشتگوهاڤێتنا تە و دلێ من یێ پتر شیانێن خوه‌لبەرگرتنێ نەی، هەر تشت ب داوی هات. من خوە دوور ئێخست و دوبارە خوە ل خالا دەسپێکێ ددیت.
چ گونەها دلێ من نەبوو تە ئێخستیە د ناڤ ڤێ هەموو گرفتاریێ دا، نە گونەها من بوو ب هەموو هەستێن خوە ب تە ڤە بهێمە گرێدان، تا وێ رادەیێ ل عشقا تە ئالۆدە ببم، من چ جاران شەرم ژ لاوازیا هەستێن خوە بەرامبەر تە نەکریە، لێ نهۆ شەرم ژ پشتگوههاڤیتنا تە دکەم، تو ئێکانە نهێنی بووی من ژیەک دگەل بۆراندی، بێی دودلی ل نک من پەیدا ببت. من چ جاران چاڤێن خوە نە داناینە سەرئێک و هزر د وێ ژیانێ دا کریە کو تو د ناڤ دا نەبی. ب کورتی، من ژیانا خوە بێی تە چ جاران د خەیال و ئاشۆپان دا ژی هزر تێدا نەکریە، وەسا هزر دکەم تشتەک هەبوو ژ حەزکرنێ مەزنتر بوو ئەز ب تە ڤە گرێدایم. نهۆ ژی هەست پێ دکەم دلێ من یێ ژ ڤان جۆرە هەستان ڤالا بوویی، ب تنێ کەرب و کین تژی دەماران بوویە. تە جوانی و بێگونەهیا دلێ من، ب دوورکەتنا خوە کوشت.
بهانا تە مینا دبێژن، ژ قوبحەتێ مەزنترە. پێخەمەت مانا ل وێرێ تە دەست ژ من بەردان و کەسەکا دی تێکەلی ژیانا خوە کر. من شیان نەبوون ڤێ هەموو ئاژاوەیا ژیێ من ڤەدگرت رێک بێخم. ئەڤە ژی هەموو تو ئەگەر بووی، من چ شرۆڤەکرن بۆ هەلویستێ تە نەبوون، من گەلەک بزاڤ کرن بهانەيه‌کێ بۆ تە ب ئافرینم، ئەڤ هەموو توندتیژیە بوو ئەگەر هەمبەر هەستێن خوە بێ دەنگ ببم.
ل وێ پایزا من خەون ب هەبوونا تە ڤە ددیتن و نەخشە بۆ ئاڤاکرنا هێلینەکا تژی بەختەوەری ددانان، تو ب ئێکجاری بەرزە بووی. ئەز ژی د ژیانێ دا مری، بێ هەست و سۆز و هەناسە، د نقرۆسکێن مانێ دهلنگڤتم.
د وێ رێکا درێژا پێیێن وێ د هلچندنە ناڤ پەراسیێن خوە، پایزێ بەلگێن خوە یێن زەر و پێتی، ب سەر کەلەخێ هزرێن وێ یێن وەستیایی دا وەردکرن و رۆژ ژی ب لەزتر ئاڤا دبوو.
