دييا كوردۆ

عزيز شەمۆ ئەلیاس

دای ” شەم ” یا ناڤدار ب ” دييا كوردؤ ” ژ هەوێریێت دەڤەرا دێڕەبوونێ بوو، مالباتا مالخۆیێ وێ خودان پەز ومەر ومالات بوون، پشتی پرۆسێسا بەدناڤا ئەنفالێت ڕەش یا رژێما بەعسا گۆربوگۆر ل سالانێت 1987-1988 ول داوییا شەرێ هەشت سالان د نێڤبەرا هەر دوو وەلاتان (عیراق-ئیران)دا، گوندێ وان هاتە سۆتن وتالانکرن، خەلکێ وان ئاوارە و دەربەدەر بوون، هند مە دیت پاش نیڤرۆیەکا هاڤینا گەرم وگوڕ ل بنیا مالێت مە ل باعەدرێ کەپرۆکەک دوو دڤەداینە ل سەر وێ قادێ، ل ژێر سیها وان کەپرۆکان برەک زارو وزیچ، ژن وزەلام ئاکنجی بوون، کو دبوو هێڤار ژی کەری یەک پەز وبزن ل رەخ کەپرۆکان خرڤەدبوو..

رۆژەکێ ددوان وسێیان ژ هاتن وچۆن وهەڤناسینێ، ب رەحمەت بت بابێ من هەر رۆژ هێڤاری دێ ب دەستێ خۆ هنەک ترار وقۆتی تژی ئاڤ کربان ودادنان ناڤا فریزەرا سەلاجێ ورۆژا پێرا دێ بەفر بۆ وان شاندبا..

“ديياكوردۆ” هنجی بێژی ژنەکە ل هەڤهاتی و زیرەک بوو، هێ بەری رۆژهەلاتێ وێ پەز ددۆت وجهۆرێ شڤان کوڕێ خۆ “کوردۆ”ی دادگرت ژ نان وچی خودێ کڕی قسمەت، هن شەکر وچا ژی دناڤ کنچکەکێ دا گرێددا ودخست ناڤا پارزونک وچانتکا وی، پاشی دێ بلەز وبەز جهێ کەریێ پەز پاقژکربا وبشکول ژێ ڤەدژوارتن بۆ سۆتنێ، ژنو تەڕوون دادنا وڤێدخست، وێ هەر سبا زوو تەروونەک دوو یێت کلۆرا د پاتن بۆ سەر تاشتێ، زێدەباری هندێ ژی ئەو حەرمەت هەر دەم وگاڤ یە دەڤ کەن وخودانا سەرهاتیێت خۆش ودل ڤەکەر بوو، کو ئەو ل جڤاتێ با پڕ زەحمەت بؤ ئێکی کاری با ب ئاخڤت، ئاخڤت هەر بەهرا وێ و ژهەژی وێ بوو، هەر چەند ئەو سێ چار سال بوون مالا وان جینارێت مالامە بوو، باوەڕکەن حەیا نها ژی پشتی بۆرینا بتر ژ چل سالان تنێ بیرهاتنێت دییا کوردۆ مە ل بیر مانە، راستە زەلامێ وێ ژی پڕ ماقوول وگران وسەرخۆ بؤ بەلێ پا ئی کێم ئاخڤتن ودانوستاندن بوو، گەلەک جاری دەمژمێرەکی ددوان ل جڤاتێ رودنشت بێی ئێک پەیڤ ب ئاخڤت، زارۆیێت وان ب ڕەوشت وپڕ ئاقل بوون، د هەیاما وان چار سالان دا تنێ ژ باشی و رێزگرتنێ مە چووی دن ژ وان نە دی، بۆ خودێ تنێ بۆ جارەکێ ژی مە ئێک پەیڤا تەعل وکرێت ژوان گوهلێ نەبوو یان هەلوێستەکا مرۆڤ ژێ شەرم بکەت ژوان نەدیت، لێ بەلێ وەکو من ئامەژە پێدای “شەم” بۆ گەلەک جاران د هاتە جەم دییا من، بۆرا باسێ دابونەریت وبویەرێت دەڤەرا هەوێرییا وژیانا وانا قورس و پڕ زەحمەت دکرن…

هەر چەند وەکو ئەز تێگەهشتیم یان ل پەی شیکرنا من بۆ رەوشا وان وکەساتی و تایبەتمەندیێت وان، بۆ من پشت ڕاست بوو وێ بێی دلێ خۆ شووکر بوو..

هەر جار کو وێ بانی قیزا خۆ یا هێ حەفت هەشت سالی کربا، ئەو قیزا رندک وپاقژ، روهسپی مینا ناڤکا نێرگزێ، توو بێژی بەفر وخوون بو، چاڤێت زەر ژ رەنگێ هنگڤ، برهۆ وبژوانگێت سیس، بسکێت شۆڕ دبوون سەر رووکان مینا تیرۆژکێت ڕۆژێ، وێ دێ ب دەنگەکی زەلال وبلند باکربایێ :

“زەرێ” کەزەبا من. سۆز بە ئەز نە دبێژمە کەسی ئەرێ.. زێڕینا من دە وەرە.. “.

کو ئەز ژ دەیکا خۆ د پرسیم رامانا گۆتنا شەم-ێ، دییا من سەر زارێ وێ د گۆت :

شەم-ێ سەد جاری بۆ من وا گۆتی وڤەگۆتی، ئەو بێی دل زەرێ نادەت شو، بلا زەرێ ب دلێ خۆ بۆ خۆ لاوەکی هەلبژێرت، هەکە خودێ عەمر دا من وئەز مام ساخ، سۆز بە (دای بوهار) ئەز نە بێژمە چوو جوامێرا ئەرێ، بلا چەند ڕێزدار ومالبات خانەدان بن.. “.

  دییا من گۆت :

” من بۆ یاری وتەماشا ئەو دئاراند :

 ” شەمێ رەبەنێ ئەڤ تۆ چی دبێژیە، دبت بابێ وێ بدە مێر وهەر تە هایژێ نه‌ی”.

وێ ب پچەکە تۆڕەبوونێ ڤە وەها بەرسڤ دا :

” مخابن دای بوهار تۆ وەها من دبینی?

گەلۆ کەنگی” بابێ کوردۆ ” کارەک کریە یان بریارەک دایە بێی کو ئەو پرسا خۆ ب من بکەت بەری هەر کەس..? “.

ئەو بەردەوام دبوو:

” نا نە.. نا نە دای بوهار..

ئەز هیڤی دکەم جارەک د تۆ چوو تشتی وەها نە بێژی.. ” دای بوهار” قیزا من زەرێ پڕ ئاقل وهێژایە وب دلێ خۆ ئەو وێ ژ خوەرا لاوەک هەژی هەلبژێرە، ئەو ئازادە ل خواست ودەربرینا خوە، سۆز بت ئەز مینا خەلات و دیاریان ” زەرێ ” پێشکەشی وی بکم”.

مخابن ئیرۆ د ناڤا نووچە وپەیامێت پڕ نەخۆش دا من بیهست هەڤالێ ” زەرێ” بۆ خۆ هەلبژارتی ب دەستێ رەشەکێت  “داعش ” یێت تاوانبار هات تیرۆر کرن وگیانێ خۆ ژ دەست دا، کو ئەڤ نووچەیا دلتەزێن من گوهلێدبوو، ئەز گێژ و ماژ دبووم، سەر ژنو بیرهاتن ورۆژانێت مە دگەل مالباتا هەوێری دهاتن بیرا من..