سەربۆرا گرەکی

شڤان شكرى هرۆرى

بــۆ ڕێڤنـگـا

بـــۆ ڕەفێن قـاز و قولنگـا

بــۆ کاروانچییــا

بــۆ قۆناغێـن داوەتـییـا

خالەکا دەستنیشان بووی      

بێ ھــەڤــڕک

ل سەر ئـاڤـا چل کانیـکا

بەرانبەر ھشارا قەشەفڕێ

خودان ئاڤـا سڕک

و گــەلیێ زڕک 

و ھـەردو مـاسیـکـا…

باغێـن تە بوون

بیستانێن بـاجـانسۆرک

ل سەردەمێ پەتۆی و ھۆمێ⁽¹⁾

تـان و پێژانێن تـە…

گیا جەڕیفک بوون و گەنمـــۆک

ل گەل ھێــلا نــازێ و شـۆنــێ⁽²⁾

ل سـەر داددا

زەرزویرییا و سیڤـاندۆک

نـــە خــوەزایا تە 

دئێتـە گوھارتـن

نــە کـەس د ھـەوارا تـە دئێتـن

بــەڤلێـن بـەژنا تــە

کـەربـەشک بوون و کیـڤـارۆک

سەمفۆنییا تـە ھوڕەبایـە

دبیتە پیرەپایزۆک

دکەڤن جـدیـدانێ بووک و بـەربووک

و دگۆت:

( ھای مە بروو، مــە بـروو

مە حیلا خوە ل وە کـروو)⁽³⁾

ب ڕیتم و سەلیـقـەکـا خشکۆک

ئـەزێ دتـرسـم

تــو نـاتـرســی

ئــەز يێ دپـرسم

تــو نـاپـرســی

تـرسـا مـن ئەنیا تـە یا بلـند

ئێدی ڕێڤنگ سلاڤ نەکنێ

ب بـڕیـارەکا دژوار و تـونـد

ئێدی ئەم قەست نەکنـێ

شـەڤەکێ ژ خەو رابین

تـــو نـەمــایـى گــر

کۆمپانییەکێ یێ ل بەر تە ڤەداین…

کـابینە و چـەتــر

تــو وێ کرییـە

گۆڕەکـێ کـویر و قەبــر

رۆژھەلاتێ تــە ژ شوقەیان

وەکی کێزما

یــا  بوویە چیــت

سلاڤ ناکی کێــلیا

فیرعۆنی و شەدایێ

و شکەفتـا ئێتویــت

ئاڤاھییـا باشوور

 ل تـە کرییە شـریـت

بێـھنـا پـەیـکەرێـن

شـکەفتـا ھـەلامەتـا⁽⁴⁾

یا چک بووی

 بـا د بـەر ڕا ناچیــت

پـرسا مـن ئـەوە

کـی دێ ڤـێ خـەمێ

ژ تـە ھـەلگریـت؟

کـو قـامـەتا تـە

پێڤــە نـەچـەمیــت

دەستێ نێزیکی تـە دبن

د زڤــر و دڕ

دبینم دێ تـە ڕاست کـن

نـامـینــی گـــر

بـەرێن تـە کـۆم کن و…

کنـــە کـۆمــڕ

ئێـتوینەکـێ ل سەر پشتـا تـە ھلکن و…

کنە ئاگر

جـاران ھـەسپێن

ھۆلاکـۆی و قـاجاران

دەستکۆل

ل بـەر سینگێ تـە دکــر

جار تانکێـن ئەنـفالان

زەڤیێـن ل بـەر

کـەپیێ تە دکـۆلان

ب زنجیــرێـن گــــڕ

تــە کـراسـێ ھــەمی

وەرزان یـێ تاقی کــری

بـھـار و پـايیــزان

جـار ژی…

شـەڕگەھا گـەرمێ و ســـڕ

گــڕێ بــەربـووی گــرا

ھێشتا تــو گــری

دڤێـن چیڕۆکـا تە بدزن

ھێشتا تـو یێ ئاڤـاکــری

وان سـەلیقه‌يـا تــە

( مـالتـایێ ل سەرێ گری

مـە حیلا خوە ل وە کری)⁽⁵⁾

یا بۆ خـوە مشکانـەکــری

گــەڕۆک دبێژن:

گـرەکێ ھـەی

ل دەر گـەلییـەکـی

نـزانن سـەر ب مـالتـا سەری ڤەیە 

ئان یا بنی

بـەژنـا وی…

ب بـەرا نژانـدییە و ھلچنــی

ئان یا ب ئاخێ ھـونـی

وەکــو جـەڕێن درگنــی

دیـدەڤـانـێ گورزێ زەینەفۆنـی

دەمـێ سـەر و گولیێن گـەنمـی

 ل دەڤـەرێ دچنــی

ل سـەمتا د ناڤـبەرا…

تـە و دێـرا بـەڕانــی دا

سـار نـەبوویە دەڤێ شیـرێ…

میـر جەعفەرێ داسنــی

دەمـێ بـۆ عەباسییان

راستبووی و ژ کاڤلانـی ھلانی

ژێرییا تە چـەپـەر بوو

دژی بـەعسییـان

خـورتـا شارانـدی

ب خوینا شەھید ماجـدی⁽⁶⁾

خەملانـدی و رەشانـدی

د گـەل گـڕگـڕا

ترۆمبێــلا برەھیـم سەعـدی⁽⁷⁾

زیڤەبەر و گـومتلێـن شێڤا ژی

بـوونە دوربـێ ئاسنـى

خـەمـا مـن تـە بکنـە پــر

تـە بـۆ جـاشـا…

بکن شوقە و ڤلە و ھافـڕ

ل سەر نـەخشـەی بمینـی

و ل سەر ئـەردی ببی پنــی

20/8/2022

ـــــــــــــــــــــــــــــــــــــــ

^{1ـ  پەتو و ھۆمێ: دو برایێن کرستیان بوون مەسلەحەیێن  باجان سۆرکا دکرن ل مالتایێ.}

^{2ـ  نازێ و شۆنێ: دو ژنێن دەستھەل و شارەزا و رێنجبەر بوون د چاڤدانا زەڤیێن باجان سۆرکان دا.}

^{3ـ پارچەیەکە ژ سترانەکا فۆلکلۆری کچکان ل داوەتان دگۆت.}

^{4ـ شکەفتا ھەلامەتا: شکەفتەکە ل چیایێ زاوا ل ھنداف دھۆکێ ،بەرانبەر گرێ مالتایێ.}

^{5ـ پارچەیەکە ژ سترانەکا فۆلکلۆری.}

^{6ـ شەھید ماجد ئۆرەیی: خورتەکێ تازە و دەلال بوو ل رۆژا سەرھلدانێ ل بنێ گرێ مالتایێ شەھید بوويه‌.}

^{7ـ برەھیـم سەعدى :کەسایەتییەکێ ناڤدارێ مالتایێ یە.}