دیدار: عبدالجبار عاصف
نەزیر رەمەزان ئێكە ژ هونەرمەندێن كەڤن یێن ل سالێن شێستا و حەفتیان ل دەڤەرا زاخۆ و بیە ئەگەرێ بەلاڤبوونا هونەرێ كوردی ل باژێرێ زاخۆ و دەردوران ژی و هەروەسا بیە هاریكار دگەل چەندین هونەرمەندێن گەنج ل دەڤەرێ. ئه‌ڤ هونەرمەندە دئێتە نیاسین وه‌ك موزیكژەن و ئاوازدانەر. هەروەسا رابیە ب كومكرنا چەندین موزیكژەنان و دروستكرنا تیپەكا موزیكی . لەورا مە ب فەر دیت دیدارەكێ دگەل ڤی هونەرمەندی تۆمار بكەین و ژ نێزیك ڤە بزانین كا هونەرێ كوردی ل سالێن شێستان و حەفتیان دا ب چ شێوەی بی و ئەرك و چالاكیێن وی چ بین. هەروەسا ل وی سەردەمی چ هونەرمەند و دەنگ خۆش هەبین. ئەوی ژی ب سینگەكێ بەرفرەهـ بەرسڤا هەمی پسیارێن مە دا.
پ1/ نەزیر كیە ؟
نەزیر رەمەزان : ل دەستپێكێ ئەز ژ دل و جان سوپاسیا كۆڤارا بادینان دكەم بۆ ڤێ ماندیبونێ و هاتنا هەوە ل ڤێرێ و دروستكرنا ڤێ دیدارێ دگەل من . ئەز دبینم ئەڤە تشتەكێ گەلەك باشە و پیروزە كو كوڤارا بادینان خۆ ل هونەرمەندان دكەتە خۆدان و پسیارا حالێ وان و هونەرێ وان دكەت . سەبارەت من، ناڤێ من نەزیر رەمەزان تاهرە . دئێمە نیاسین وەكو هونەرمەند نەزیر زاخۆیی . چنكو ئەز خەلكێ زاخۆ مە . ژ دایكبوویێ باژێرێ زاخۆ مە . سالا ژ دایك بوونا من ئەو ژی ل سالا ( 1953 )یه و ژ بنە مالا ( قەسابا ) ئانكو ئەم ژ بنە مالێن زاخۆیێن كەڤنین، چنكو باب و باپیرێن من ژ ئاكنجیێن تاخێ ( جوهیانە ) و هەر ل وی تاخی ئەز ژ دایك بوومە . هەتا نوكە ژی ئەم یێن ل ڤی تاخی. پ2/ هونەرمەند نەزیر زاخۆیی تۆ یێ هاتی نیاسین وەكو هونەرمەند . ئایا تۆ د چ بوارێ هونەری دا خۆ دبینی؟
نەزیر: بەلێ ئەز خۆ ب سەربلند دبینم كو ئەز هاتیمە نیاسین وەكو هونەرمەند . چنكو دەمێ من دەست ب هونەری كری، ئەو وەكو خزمەتەكێ بی من دكر بۆ ملەتێ خۆ . نە ژبەر چ بەرژەوەندیا . یان ژ بو كەسەكێ تایبەت . ل وی دەمی ئانكو ل سالێن شێستادا . دەمێ من دەست ب كارێ هونەری كری وەكو ئاوازدانەر و وەكو موزیكژەن بوو. ل وی سەردەمی ئەز رابیمە ب كارێ موزیك ژەنیێ د گەل ئێك ژ وان هونەرمەندان و ئەو ژی ( رەمەزان یوسف ) برایێ ئەیاز زاخۆیی و ئەو ژی ل سالا ( 1968 ) ئەز رابیم ب دروستكرنا بەرهەمەكێ بۆ وی. هەر دوێ سالێ دا و هەر ل سالا ( 1969 ) ئەز رابیمە ب دروستكرنا بەرهەمەكێ دی ژ بۆ هونەرمەند ( ئەكرەم جەبار ) و ئەو ژی دبیتە برایێ هونەرمەند ( حاجی زاخۆی ) . هەروەسا ل وی سەردەمی من شیا رابم ب دروستكرنا بەرهەمەكێ دی ژی ژبو هونەرمەند ( محمد سالح ) و نوكە ئەو یێ ل باژێرێ ئیستەنبولێ دژیت. ئەز بەردەوام بیم ل سەر وی كار وخزمەتا هونەری . پ3/ تە كەنگێ ب دروستی دەست ب كارێ هونەری كریە . و بوچی تە ئه‌ڤ كارێ هونەری بؤ خۆهەلبژارت؟ ئایا تە مەرەمه‌ك هەبی ژ ڤێ چەندێ. یان هەما تە حەز ل ڤی كاری هەبی؟ یان هەما تە ژ نشكەكێڤە خۆ دیت كو تۆیێ كارێ هونەری دكەی؟
نەزیر: ل وان سالێن شێستان دا ئەز گەنج بیم . و ئەز پیچپیچە تێگەهشتم و من زانی كو ئەز كوردم و وەلاتێ من كوردستان پارچە پارچە بیە. وەلاتێ مە پێدڤی ب مەیە. ئەو هەستێ نەتەویی ل ناڤ ناخێ من دلڤلڤی. من هەست كر كو وەلاتێ من پێدڤی ب من هەیە. و پێدڤی هونەری بی و پێدڤی وێ چەندێ بی كو ئەم وەكو گەنجێن كوردستانێ رابین و خزمەتێ بو وەلاتێ خۆ بكین. گەلەك جاران مە گەریان دكر ل ناڤ وەلاتێ عیراقێ ب رێكا ئەركێ لەشكەری و دەربەدەریێ و ترسێ و رەڤینێ. ل وی سەر دەمی ئەز هاتم و من قەستا برایێن خۆ یێن پێشمەرگە كر و ئەز چوومە د ناڤ رێزێن شورەشێ دا ل سالا (1976 ) و هەتا سالا (1977 ) و من پەیوەندی ب وان كر و من داخاز كر كو ئەز ژی بەژدار بم ب هەمی چالاكیێن شورەشێ، دا وەكو ئێك ژ گەنجێن كورد و ئێك ژ پێشمەرگێن كوردستانێ بم. بەلێ وان گوتە من ئەم پتر پێدڤی ب تەنە ل ناڤ مللەتی بی و ب ڤی هونەرێ خۆ یێ جوان خزمەتا وەلاتێ خۆ بكی و هاریكار بی دگەل مە د ناڤ باژێرێ خۆ دا و دێ پتر خزمەتا وەلاتی ئێتە كرن و دێ ب تە سەر بلند بین . هینگێ بو من پتر حەز چێبی كو ئەز رابم ب خزمەتكرنێ ب هونەرێ خۆ . لەورا ئەز رابیم ل ناڤ مالا خۆ من ژورەك بچویك دروست كر و من تەرخانكر تایبەت ژ بو كارێ هونەری و كومكرنا ئامیرێن موزیكی و موزیكژەنان . ئەو موزیك ژەن ل وی سەر دەمی دهاتن ل نك من و پێكڤە ئەم رادبین ب دروستكرنا كارێن هونەری ژ لایێ موزیك و هوزان و ئاوازان ڤە . مە دەست ب كارێ هونەری كر و دل ئارامی و سەر بلندی و ل ناڤ جەرگێ بەعسیان. پ4 / تە گوت ل سالێن شێستا و حەفتیان. باشە ل وی سەر دەمێ بەرێ ئانكو ل سالێن شێستا و حەفتیان دا ئانكو ژ بەری دیاربوونا هەردو هونەرمەندێن بناڤ و دەنگ ئەردەوان زاخۆیی و ئەیاز زاخۆیی، چ هونەرمەند هەبین ئانكو سترانبێژ ؟ و ته بۆ وان هونەرمەندان چەوا هونەرێ خۆ ددا دیار كرن ؟ چ هاریكاری بو وان هەبی ؟
نەزیر: ل وان سالان یێن دهاتنە ل نك من مینا ( علی سندی و ئەحمەد گوندی و نعمەت حەسەن و رەشید رەمزی) بوون و گەلەك هەڤالێن دی ژی ب مخابنی ڤە ناڤێن هەمیان نائێن بیرا من. دهاتنە ل نك من و ل ناڤ وێ ژورێ مە كارێ هونەری دكر پێكڤە و هەر دەمێ ئێك ژ وان هاتیبا نك من ئەز دا رابم ب فێركرنا وان و ژەنینا ئامیرێن موزیكی. هەروەسا من ئەو فێر دكرن چەوا ئاوازا دروست بكەن. دیسان من ئەو هانددان ژبو گوتنا سترانان. هەر روژ ئەم كوم دبین و مە بەردەوام پروڤە دكرن . هەلبەت ل وی سەردەمی چ باسی ئەردەوان زاخۆی و ئەیازی نەبین . پ5 / هونەرێ وان و سترانێن وان و بەرهەمێن وان چەوا دهاتنە دیار كرن ؟ ب چ رێكێ خەلكێ گوهێ خۆ ددانە بەرهەمێن وان و ئەوان چەوا بەرهەمێن خۆ بەلاڤ دكرن؟
نەزیر: باوەركە كاك عبدالجبار ل وی سەردەمی چ هاریكاری نەبی ژ لایێ هوزانڤانان ڤە. لەورا هەما هەر سترانەكا هەبا یێن هونەرمەندێن ب ناڤو دەنگ مینا ( تەحسین تاها و بشار زاخۆی ) و گەلەكێن دی مە دگوتن و مە پروڤە ل سەر وان سترانان دكرن . ب تایبەت ل شەهیانا و ل ناڤ كوچك و دیوانان. سترانبێژا هەما ب دەنگی دگوتن ئانكو بێی موزیك. بارا پتر ب رێكا داوەت و شەهیانا بی . و یان دەسترەشا هەڤالەكێ با . ئەم پێكڤە دا چین و ب ئەركێ وی رادبین و مە هونەرێ خۆ پێشكێش دكر. و یان ل ناڤ هەڤالان. چنكو وەكو تۆ دزانی ژی چ ئامیرێ تێلەڤزیونێ نەبی و ئەنترنێت نەبی و هەتا ئامیرێ تۆماركرنێ ژی گەلەك كێم بی ل زاخۆ و كارێ مە ژی نە ژبۆ چ بەرژەوەندیا كەسایەتی بی . ئانكو ئەم رابین و پارا ب دەست خۆڤە بینین نەخێر . هەما ئەو ژی مینا حەزەكێ و ئەركەكێ بی ل نك مە. پ6 / ل وی سەردەمی كی هاریكار بی دگەل هەوە . مینا هوزانڤان یان ئاوازدانەر. وەكو موزیك ژەنی و هەر هاریكاریەكا دی؟ كی ب ڤی ئەركی هەمیێ رادبی؟ نەزیر: وەكی مە گوتی مە چ كەس نەبی كو هاریكار بیت دگەل مە مینا هوزانێ و ئاوازێ ژی . لەورا هەر سترانەكا هەبا مە پروڤە ل سەر دكر و مە دگوت.
پ7 / ل وی سەر دەمی چ سترانبێژ هەبین ل زاخۆ و ل دەوروبەرێن زاخۆ ژی . ئانكو چ سترانبێژ دهاتن ل ناڤ زاخۆ و ستران دگوتن ل ناڤ داوەت و شەهیانا؟
نەزیر: باوەركە كاك عبدالجبار. سترانبێژ گەلەك هەبین. بەلێ نە وەسا یێن ب ناڤودەنگ بین. ئانكو نە ددیار بین. چنكو هینگێ دەمێ ترسێ بی و دەمێ حكومەتا بەعس بی. چ ئازادی وەكی نوكە نەبی. سترانێن مە ژی بارا پتر یێن سیاسی بین و ب شورەشا كوردی ڤە دگرێدای بین . هەكە هات و ستران بێژەك هەبا ژی، زوی ب زوی وی نە دشیا خۆ بدەتە دیار كرن . بەلێ ل باژێرێ دهوكێ و زاخۆ ژی ستران بێژ هەبین ب تایبەت زاخۆ دئێتە نیاسین مینا كانیكا هونەری ل دەڤەرێ.
پ8 / گەلەك جاران ل ناڤ چافپێكەفتنان ل ناڤ كەنالێن تێلەڤزیونێ و رادیوا و ل ناڤ خەلكێ ژی مە گوه لێ بیە كو تۆ دبێژی دەستپێكا ئەردەوان زاخۆیی دگەل من بی . ئاكو ئەو ب رێكا تە یێ بیە هونەرمەند وسترانبێژ.
| هندی ئەز چووبام ل بەر لێڤا خابیری من ئەردەوان و ئەیاز ددیتن ل وی جهی. گەلەك جاران مە یاری دكرن ل وێرێ مینا تەپا پێی و گەلەك یاریێن دی یێن كەڤن. هینگێ من زانی كو ئەڤان هەردوو كەسان حەز ل سەر هونەری هەيە. |
نەزیر: بەلێ سەبارەت هەردوو هونەرمەندێن ب ناڤودەنگ ( ئەردەوان زاخۆی و ئەیاز زاخۆی ) وەكو ژ بەری نوكە من گوت ئەز ئاكنجیێ تاخێ جوهیامە. هەلبەت ئەردەوان و ئەیاز ژی هەر ل وی تاخی بین . ئانكو ئەم هەمی ئاكنجیێن ڤی تاخی بین و ئەم جیرانێن ئێك بین و ئەم هەڤالێن ئێك بین و مە هەر روژ ئێك و دوو ددیت و پەیوەندیێن مە دگەل ئێك و دوو هەبین . لەورا هەڤالینیا مە و ناسبینیا مە نە ب رێكا هونەری و ستران بێژیێ بی . ئەڤجا وان زانی كو ئەز یێ رادبم ب كارێ هونەری و خزمەتەكێ دكەم بۆ باژێر و وەلاتێ خۆ ب رێكا هونەری و وان زانی كو گەلەك هەڤال و هونەرمەند یێن دئێن ل نك من، ژبەر كو ئەوان ژی حەزێن هونەری هەبین لەورا ئەوان ژی حەز دكرن بێنە ل نك من و ل ناڤ مالا من و ل ناڤ وێ ژورا من یا هونەری . گەلەك هەول ددان كو بێن و نێزیكی من ببن پتر و پتر و ژ بەركو ئەم ل ناڤ تاخێ جوهیان بین و ل دورێن ڤی تاخی رویبارێ خابیری دبەررا دبوریت لەورا گەلەك جاران ئەم ل سەر لێڤا خابیری كوم دبین و مە ئێك و دوو ددیت. هندی ئەز چوبام ل بەر لێڤا خابیری من ئەردەوان و ئەیاز ددیتن ل وی جهی . گەلەك جاران مە یاری دكرن ل وێرێ مینا تەپا پێی و گەلەك یاریێن دی یێن كەڤن ژی. هینگێ من زانی كو ئەڤان هەردوو كەسان حەز ل سەر هونەری هەنە و حەز دكەن بێنە د ناڤ گورەپانا هونەری دا . بەلێ ئەوان نە دزانین چەوا ب ڤی كاری رابن و ل سەر دەرگەهی هەل نەببین و چ هاریكاری نەبین بۆ وان . لەورا ل دەستپێكێ من ئەو پێشنیارە كر و من گوتە وان هەكە هەوە حەز ل سەر هونەری هەبیت وەرنە نك من . چنكو من ژورەكا تایبەت هەیە بو ڤی كاری . من گوتە وان هونەرمەندێن دهێنە نك من و ئەز هاریكارم دگەل هەمیان؟ ب راستی من دیت كو ئەردەوان گەلەك كەیف خۆش بی ب ئاخفتنا من و گوتە من:هیڤیا من ژی هەر ئەڤەیە . ئەڤە كەرەمەكا مەزنە بۆ مە هەكە تۆ هاریكار بی دگەل من و ئەز دێ سوپاسیا تە كەم . من گوتێ ئەز دێ هاركاریا تە كەم بەلێ ب مەرجەكی. وی گوتە من بلا . بەلێ ئەو چ مەرجە ؟ من گوتێ هەكە تۆ بێی ل نك من پێدڤیە تۆ گوهێ خۆ بدەیە من و تشتێ ئەز بێژمە تە تۆ بكەی . و وەكی تۆ دزانی ئەم یێن ل ناڤ كاودانێن نە خۆش و نە ئارام . لەورا پێدڤیە هەمی كارێن مە ب نهێنی بن و هەمی كارێن مە ب شێوه‌یێ ڤەشارتی بن . هەر كارەكێ ئەم بكەین بلا نە ب ئاشكەرایی بیت . هەكەر تە گوهێ خۆ دا من، ب ئانەهیا خۆدێ ئەم دێ پێنگاڤێن باشتر هاڤێژین و دێ تە گەهینمە قوناغێن باش و تۆ دێ بیە هونەرمەندەكێ بناڤو دەنگ و دێ بیە ستێرەكا گەش ل ئەسمانێ هونەرێ كوردی ل كوردستانێ . و چێدبیت تۆ ببیە قوتابخانەك بۆ هەمی هونەرمەندێن كوردستانێ نە بتنێ ل زاخۆ. .
پ9 / ئەڤە دەستپێكا تە بوو كو تە ئەردەوان دیتی و دگەل ئاخفتی . بەلێ تە چەوا زانی كو دەنگەكێ خۆش هەیە كو گونجایی بیت ژبو سترانگوتنێ؟
نەزیر: بەلێ هەما هەر ل بەر لێڤا خابیرێ زاخۆ و ل وان روژان و ل دەمێ ئێڤاریا ئەم كوم دبین و دەمێ مە دگەل ئێك و دوو دئاخفت و من بۆ وان باسی هونەری و ژورا خۆ و ئەركێ خۆ یێ هونەری دكر و من پسیار ژ ئەردەوانی دكر و من دگوتێ : نوكە تۆ دشێی بو من پارچە سترانەكێ بێژی دا كو ئەز دەنگێ تە گوه لێ ببم و بزانم كا دەنگێ تە یێ چەوایە . هەما ئەوی ئێك سەر شەرم كر و سەرێ خۆ نزم كر . من گوتێ بو تە بێژم ئەردەوان: شەرم نەكە . هەكە تۆ حەز ژ هونەرمەندیێ و هونەری دكەی و تە بڤێت تۆ ببیە ستران بێژ پێدڤیە تۆ شەرمێ ژ خۆ دویر بئێخی . مە چ تێلەڤزیون نینن و مە چ رادیو نینن . بتنێ هەما ئەز و تۆنە . ب راستی ب ڤێ چەندێ شەرما وی ڤەرەڤی و هەما رابی و ئێك سەر سترانەك یا هونەرمەند تەحسین تاهای گوت . ئەو ژی سترانا ( بهێرە دستار بهێرە ) . بتنێ بو من پارچەك بچویك گوت . ئێك سەر من گوتێ راوەستە . بەسە . وی گوتە من بوچی تە گوتە من بەسە ؟ من گوتێ ب راستی كاك ئەردەوان دەنگێ تە گەلەك یێ خۆشە پێدڤی نینە تۆ پتر بێژی . ئەڤە من دەنگێ تە گوه لێ بی . ئەڤجا هەكەر تە بڤێت تۆ سترانا بێژی، پێدڤیە تۆ بێیە نك من ل ناڤ مالا من و ژ نوی ئەز و تۆ ئەم پێنگاف پێنگاڤ دەست پێ كەین . ب حێبەتی ڤە گوت: بەرعاقلە ئەز بێم ل ناڤ هەوە ؟ باشە ما ئەو هەڤالێن دئێن ل نك تە تۆرە نابن؟ من گوتێ تە پەیوەندی ب ڤێ چەندێ نینە. هەر هەڤالێ باش بیت و خۆدان دەنگەكێ باش بیت ئەو دێ بسەر كەڤیت . دەنگێ تە گەلەك یێ خۆشە و من پتر حەز ژ دەنگێ تە كر. هەكە تە بڤێت كو تۆ ڤی دەنگێ خۆ بو من ب دەیە دیار كرن . باوەركە ئەز دێ ب هەمی شیانێن خۆ هاریكار بم و پەشتەڤانێ تە بم .هەر وەسا دێ بو تە كارەكێ باش كەم . ب راستی گەلەك كەیفا وی هات .
پ10 / ژبەری ڤێ سوحبەتا تە دگەل ئەردەوانی . ئانكو ئەوی ل هندەك جهان ستران گوتی بین ؟ نەزیر: نەخێر. چ جاران و چ ستران ل چ جهان نەگوتی بی.
پ11 / ئێكەم جار چەوا وی ستران گوت؟
نەزیر: ئێكەم جار یێ هاتیە نك من ل مالا من و ل بەر لێڤا ئاڤێ ئەو پارچە سترانا تەحسین تاها یێ گوتی. بەلێ پشتی باوەری بو وی چێبوی و هاتیە ل نك من ل مال و ل گەل هەڤالا روینشت خۆارێ. دەمێ وان سترانبێژان ستران دگوتن، ئەردەوان دبیە وەكو كورس ل پشت وان . دەمێ بیە كورس . ئێك سەر من دەربەك كرە ددەستی دا و من گوتێ دەربەكێ لێدە . لێ ئەوی ستران نە دگوتن . ژ بەر كو من گوتێ ل دەست پێكێ دێ تە فێركەم سالوخەتێن سترانگوتنێ دێ چەوابن . ناچێبیت هەما ئێك سەر تۆ بێی و دەست ب گوتنا سترانا بكەی. هەما هێش هینگێ من گوتە وان هەڤالان هەكەر هوین تۆرە نەبن و هەكەر هوین گوهێ خۆ بدەنە من ئەڤە كاك ئەردەوان زاخۆی دەنگێ وی گەلەك یێ خۆشە. ئەز حەز دكەم هوین ژی دهاریكار بن و ئەم پێكڤە خزمەتەكێ بو وی بكەین. نە رامانا وێ ئەوە كو دێ پشتا خۆ دەمە هەوە . بەلێ بەروڤاژی دێ هاریكار بم دگەل هەوە. هەمی هەڤالان پشتەڤانیا من كرن و تۆرە نەبین . ئەڤجا من گوتە ئەردەوانی : برایێ من ئەڤە روژا تە هات و پێدڤیە تۆ دەربەكێ دانی لایەكێ . كەیفا وی هات و گوت پا ئەز چەوا دەربەكێ دانم ؟ من گوتێ بەلێ . گوت پا ئەز نوكە چ بكەم ؟ من گوتێ برایێ بەرێز هەما كا ئەز چ بێژمە تە تۆ دێ وەكی من كەی و مە دەست ب خزمەتێ كر .
| ئهردهوان ئێكەم جار یێ هاتیە نك من ل مالا من و ل بەر لێڤا ئاڤێ ئەو پارچە سترانا تەحسین تاهای بهێره دستار یا گوتی. |
پ12/ ئێكەم ستران ئەردەوان زاخۆیی گوتی وەكی ئەو سترانبێژ . ئەو چ ستران بی ؟ و كێ ئەو سترانە بۆ وی دروست كر بی ؟
نەزیر: تۆ دزانی برایێ عبدالجبار .. ئەڤە هێش ئەم نە گەهشتینە وێ قوناغێ . ئەڤە ئەم یێن ل ناڤ مالا من و ئەم یێن خۆ بەرهەڤ دكین ئەم ئەردەوانی فێری سترانگوتنێ بكەین و مە ئەو فێركر سترانگوتنێ . من ئەو تاقی كر و من گەلەك پروڤە دگەل وی كرن . و پشتی ئەز ژ دەنگێ وی رازی بیم . من گوتێ : ئەردەوان ئەڤە دەنگێ تە یێ خۆشە و یێ دروستە بۆ سترانگوتنێ . بەلێ ئەز چ سترانا بێژمە تە بێژە پێدڤیە تۆ بێژی . و من گوتێ تۆ سترانێن تە ژبەر كرین ئەوان هەمیا بدە لایەكێ . نوكە ئەم پێدڤی سترانێن نوی نە. بەرهەمەكێ نوی. ئەوی گوت پا چەوا تۆ دێ چ كەی بو من ؟ من گوتێ ئەڤە ل قوناغا ئێكێ مە دەنگێ تە دروست كر و مە بەرهەڤ كر. وی گوتە من باشە پا نوكە قوناغا دووێ چیە ؟ من گوتێ قوناغا دووێ ئەوە كو ئەز تە بەربەلاڤ بكەم . تە بدەمە نیاسین ل ناڤ خەلكێ. من گوتێ ما كی تە ناس دكەت نوكە ؟ من گوتێ نوكە پێدڤیە ئەز تە ببەمە ئێزگەیێ كوردی ل بەغدا. وی ب حێبەتی ڤە گوتە من. تۆ دێ چەوا من بیە بەغدا ؟ من گوتێ خەما نەخۆ . من سوزێ دایە تە ئەز پێنگاف پێنگاف تە بگەهینم . بەلێ بتنێ دێ گوهێ خۆ دەیە من . بتنێ نوكە تۆ هەرە و رازیبوونا خێزانا خۆ بینە كو تۆ دگەل من بێیە بەغدا.
پ13/ هەتا هینگێ ژی ئەوی چ ستران نەگوتی بین ؟
نەزیر: نە خێر ئەوی چ ستران نەگوتی بین . هندەك جاران ئەوی سترانێن تەحسین تاهایی بۆ من دگوتن بەس دەنگێ وی یێ باش بی.
پ14/ برایێ نەزیر . پشتی هوین گەهشتینە بەغدا و ل ناڤ ئێزگەیێ كوردی . چ هاتە رویدان و هەوە چ كر و بوچونێن وان چ بین دەمێ وان گوهداریا دەنگێ ئەردەوانی كری؟
نەزیر: هەلبەت پشتی من گوتیێ هەرە و رازیبونا خێزانا خۆ بزانە كا دێ چ بێژن . كا دێ رازی بن تۆ بێیە دگەل من یان نە . روژا دی هات و یێ كەیف خۆش بی و گوت دروستە و خێزانا من هەمی درازینە كو ئەز دگەل تە بێم بەغدا. ل روژا پاشتر من هزرێن خۆ كر و من گوت پێدڤیە ئەز بچم بەغدا ب رێكا كەسەكێ ناڤدار . چنكو ل وی دەمی كەسەكێ نەدشیا هەما ئێك سەر بچیت ل ناڤ ئێزگەیێ بەغدا و ب تایبەت بەشێ كوردی . ل وی سەردەمی كەسەك هەبی و ناڤێ وی سەیدایێ ( عبدالكریم ) برایێ ( عبد الالە ) رێڤەبەرێ بەشێ كوردی بی ل ئێزگەیێ بەغدا. ئەڤجا عبدالكریم ماموستایێ من بی ل خۆیندنگەهێ ل زاخۆ . من گوت پێدڤیە ئەز ب چەك بچم نە هەما هوسا بتنێ بچم و كەسەك چ پویتەیی ب مە نەكەت . لەورا ئەز چوومە ل نك سەیدایێ ( عبدالكریم ) و من گوتێ بەرێز ئەم دێ چینە بەغدا و پێدڤیە تۆ نامەیەكێ بدەیە مە بۆ برایێ تە دا ل وێرێ ب ئەركێ مە رابن . ب راستی ئەوی ژی گوتە من ل سەر هەردوو چاڤێن خۆ و نامەیەك بۆ برایێ خۆ عبدالالە نڤیسی و دا من . ئەردەوانی گوتە من تە چ كر. من گوتێ خلاس من نامەیەك یێ ئینایی و ئەم دێ چین. چنكو بێی وێ نامەیێ ئەو پولیسێن ل بەر دەریێ ئێزگەیی ناهێلیت ئەم بچین ل ناڤ ئێزگەی. مە ناما خۆ بر و ئەم چوون بو باژێرێ ( مویسل ) و ئەم ل شەمەندەفرێ سوار بین و مە قەستا بەغدا كر. دەمێ ئەم ل ناڤ شەمەندەفرێ و هەتا ئەم گەهشتینە بەغدا تەمبورا من ددەستێ من دا بی و من دژەنی و ئەردەوانی ستران دگوتن و پروڤە دكرن. من گەلەك ئاموژگاری ددانێ كو شەرم و ترسێ ل نك خۆ نەهێلیت و خۆ زیرەك بكەت چونكو دێ هەمی خەلك گوهێ خۆ دەنێ. دەمێ ئەم گەهشتینە بەغدا مە قەستا ( جادا سەعدون ) كر و ل ناڤ ئوتێلا ( شبرا ) بینە مێهڤان. روژا دی و سپێدێ ئەم رابین و مە قەستا ئێزگەیی كر، دەمێ ئەم نێزیكی دەرگەهێ ئێزگەی بین ئەو زێرەڤانێن ئێزگەیی ل مە حەیتاند و تەمبورا من ژی یا ددەستێ ئەردەوانی دا و من گوتە ئەردەوانی نەترسە ما مە چ كریە ؟ مە چ تشتێ شاش نە كریە. بۆ ماوەیەكێ ئەم مان و پاشی من قەستا زێرەڤانان كر و من گوتە وان: ئەم هونەرمەندین و ئەڤە نامەیا برایێ رێڤەبەری یا ل گەل مەیە فەرمون بخۆینن . دەمێ ئەو نامە خۆاندین ئێك سەر گوتن بلا بچنە ژۆر. ئەم ژی چوونە پرسگەهێ و مە گوتە وان ئەم یێن ژ زاخۆ هاتین و مە هندەك كەسێن نیاس دیتن مینا ( جەمال بەرواری ) و هندەكێن دی یێن كورد و گەلەك كەیفا وان ب مەهات و گوتن هەوە خێرە ؟ مە گوتە وان مە دڤێت بچینە نك رێڤەبەری . ئەوان ژی ئێك سەر پەیوەندیا رێڤەبەری كرن و گوتنێ ئەڤە دوو كەسێن ژ زاخۆ هاتین و حەز دكەن بێنە نك جەنابێ تە. ئەم چوونە ل نك رێڤەبەری و ئەوی گەلەك كەیفا خۆ ب مە ئینا و بخێر هاتنا مە كر و گوت كەرەمكن هەوە چ دڤێت ئەز بو هەوە بكەم ؟ من گوتێ ماموستا ئەڤە گەنجەكە ژ باژێرێ زاخۆ و من دەنگێ وی یێ تاقی كری و دەنگێ وی گەلەك یێ خۆشە و ئەز ژی موزیك ژەنم و ئەم یێن هاتین كو ئەم ژی خزمەتەكێ بكەین و خەلكەك وی ناس بكەن هەكەر هوین هاریكار بن . رێڤەبەری گوت ل سەر چاڤا هەما ئەڤە بەشێ كوردی ل بەر هەوە ڤەكریە. ئەوی پەیوەندیا ستۆدیوێ كر و گوتە وان دهاریكار بن دگەل ڤان هەردوو كەسان هەردەمێ ئەو دبەرهەڤ بن. ئەم جارەكا دی ڤەگەراین بو ئوتێلێ و هەتا بی سپێدە مە گەلەك پروڤە كرن. ل روژا دی ئەم چوون د ناڤ ئێزگەیی دا بەشێ كوردی و ل وێرێ من پسیارا هونەرمەند ( سمیر زاخۆیی ) كر و مە دیت. وی گوت هەوە خێرە ؟ من ژی گوتێ ئەم یێن هاتین هوین چافپێكەفتنەكێ دگەل مە بكەن و ئەڤە ژی هونەرمەندەكێ خەلكێ زاخۆیە و دەنگێ وی گەلەك یێ خۆشە و ناڤێ وی ئەردەوانە. گەلەك كەیفا سەمیر زاخۆیی هات. هەروەسا مە هونەرمەند ( عیسا بەرواری ) ژی دیت چنكو ئەوی ژی چافپێكەفتنەك هەبی ژ بەری مە وهەروەسا چافپێكەفتنەك دگەل هونەرمەند ( شاكر ئاكرەیی ) ژی هەبی. دەمی چافپێكەفتنێن وان ب دوماهیك هاتین، بی دورا مە. ل ڤێرێ هونەرمەند سمیر زاخۆی گوت ما هوین حەز دكەن ئەز ژی بێم دگەل هەوە؟ ب راستی كەیفا مە هات و من گوتێ بوچی نە؟ هەما كەرەمكە تۆ ژی وەرە دگەل مە. دەمێ ئەم چووین بۆ ناڤ ستۆدیووێ ئەم روینشتین و سەمیر زاخۆیی روینشت دگەل مە و من تەمبورا خۆ گرت و ب دەنگێ ئەردەوان زاخۆیی مە چەندین ستران تۆمار كرن كو نێزیكی ( 8 ) سترانان بوون. ب سەرفەرازی ڤە، سەركەفتنەكا باش مە ب دەست خۆڤه ئینا و گەلەك كەیفا هەمیان هات و هەمیان بۆ مە دەست قوتان. ئەڤجا من گۆتە وان ئەم نوكە چ بكین ؟ وان كارمەندان گوتنە مە هەما هوین دێ ل ڤێرێ ل ناڤ ئێزگەیی دا ئێنە دامەزراندن هوین هەردوو ژی وەكو فەرمانبەر. من گوتە وان ل مە ببورن ئەم نە هاتینە ژبو دامەزراندنێ. ئەم نەشێن ژ باژێرێ خۆ زاخۆ ژی دویر بكەڤین . مەرەم ژ هاتنا مە ئەوە بتنێ ئەم دەنگێ ئەردەوانی تاقی بكەین و ئەم دەنگێ وی بۆ خەلكێ بەلاڤ بكەین و خەلكەك وی ناس بكەت . بتایبەت و ژ بەری هەر تشتی مە دڤێت ئەم بزانین كا هوین ژ دەنگێ ئەردەوانی رازینە یان نە ؟ هەمیان گوتن ئەم گەلەك ژ دەنگێ وی درازینە و دەنگێ وی گەلەك یێ خۆشە.
پ15/ باشە ئەو چوونا هەوە بو بەغدا و چاڤ پێكەفتنا هەوە ل ناڤ بەشێ كوردی دا ل كیش سالێ بی؟
نەزیر: ئەز دبێژم ل سالا ( 1971 ) بی. هینگێ پشتی ئەم ب دوماهیك هاتین رێڤەبەری گوتە ژمێریاری كا بۆ وان بمەزێخن . چنكو هینگێ هەر كەسێ هاتیبا و چافپێكەفتن دگەل كری بان كوژمەكێ پارەیی بۆ دمەزاختن. دئێتە ل بیرا من هەر ئێك ش مە ( 17 ) دینار بۆ مە مەزاختن. پشتی ئەم هاتین ل ناڤ ئوتێلێ، ئەردەوان یێ حێبەتی بی ژ كەیفا و گوت: ئەڤە خەونە ئەز تێدا . ئەڤە ئەز بیم هوسا من ستران گوتین ؟ من گوتێ بەلێ ئەڤە تۆیی. ما من چ گوتە تە؟ من سوز دا تە كو ئەز تە ب سەر بێخم و ئەڤە سوزا من دگەل تە من ب جهـئینا.
پ16 / پشتی هوین ڤەگەرایین بو باژێرێ زاخۆ. هەوە دەست ب سترانگوتنێ كر یان نە؟ تە و ئەردەوانی هەوە هەول دا كو هوین بۆ خۆ هوزانا بینن و ئاوازا دانن ل سەر و پروڤان ل سەر بكەن و تۆمار بكەن؟ هەوە هندەك بەرهەم بۆ وی دروست كرن؟
نەزیر: بەلێ. پشتی ئەم ڤەگەراین بو زاخۆ، هەلبەت خەلكێ زاخۆ هەمیان گوه لێ بی كو مە چافپێكەفتن یێ كری ل بەغدا. براستی چنكو بتنێ خەلكێ گوهداریا رادیوێ دكرن . چ تیلەڤزیون و سینەما و تۆ پێشكەفتن نەبی. هەما بتنێ رادیو هەبی. لناڤ هەمی چایخانا و ل ناڤ بازاری بتنێ دەنگێ رادیوێ دهات . لەورا خەلكێ هەمیێ گوهداری لێ كر و هەمیان زانین كو ئەردەوانی ستران یێن گوتین ل ناڤ ئێزگەیی. دەمێ ئەم گەهشتین زاخۆ، گەلەك خەلكێ هاتن و قەستا مە كرن و ب كەیف و خۆشی ڤە و دەست خۆشی ل مە دكرن . دەرگەهێ مالا مە نە دهاتە گرتن ژ هاتنا خەلكێ زاخۆ و دوست و هەڤالان و هەمیان حەز دكرن ئەردەوانی ببینن. ئەڤجا من گوتە ئەردەوانی . ئەڤە دەمێ قوناغەكا دی هات. گوت : ئەم چ بكین. من گوتێ : نوكە ئەم پێدڤی ب هوزان و ئاوازانین و بۆ تە سترانا دروست بكەین، دا بۆ تە تۆمار بكەین ما دێ هەر سترانێن كەڤن بێژی؟ ئەوی گوتە من : بریار بریارا تەیە كا تۆ چ فەرمانێ بدەی ئەز دێ وەك تە بم. من گوتێ : باشە ئەز دێ رابم و لێ گەرهم و كا كی ل باژێرێ زاخۆ هوزانا دنڤیسیت . پشتی من پسیار كری من زانی كو كەسەك یێ هەی و هەڤالێ منە و هەر كەس و ناسێن منە و ئەم هەڤال ژی بین، خۆدێ ژێ رازی ناڤێ وی ( خالص خەلیل ) بی. ئەو هینگێ فەرمانبەر بی ل ناڤ فەرمانگەها ( مالیێ ). ل روژا پاشتر ئەز و ئەردەوان ئەم چووین و مەقستا خالص خەلیلی كر ل ناڤ فەرمانگەهێ و ئەم روینشتین ل نك و من باسی ئەردەوانی كر. ئەوی ژی گوت راستە من یێ گوه لێ بی . دەنگێ وی گەلەك یێ خۆشە . هوین چوویبین بەغدا ؟ من گوتێ بەلێ راستە . بەلێ نوكە ئەم یێن هاتین ل نك تە و ئەم پێدڤی بتەنە . گوت خێرە ما هوین چەوا پێدڤی ب منه ؟ من گوتێ ئەم پێدڤی ب تەنە تۆ بۆ مە پەیڤا بنڤیسی و دا ئەم ژی ئاوازا دانین ل سەر و بێنە گوتن ب دەنگێ ئەردەوانی . ئەوی ژی داخاز كر كو ئەردەوان پارچە سترانەكێ بۆ بێژیت . ئەردەوانی ژی پارچەك بچویك بو گوت . گەلەك كەیفا خالص خەلیلی هات و گوت دروستە هەما ئەڤە ژ ئەڤرو و پێڤە ئەز دێ دگەل هەوە كار كەم . من گوتێ برایێ خالص هەما ب چ شێوەیی بیت ئەم پێدڤینە. هوزانێن سیاسی بن یان یێن ئەڤینیێ بن.
| كاك خالصی دەست ب نڤیسینا سترانا كر و ئێكەم ستران نڤیسی بۆ ئەردەوانی. سترانا ( زاخۆ شەنگێ و شرینێ ) بوو. |
پ17/ پشتی خالص خەلیل رازی بی و هاتە دگەل هەوە ئێكەم ستران یان ئێكەم بەرهەم بۆ ئەردەوانی نڤیسی چ بی؟
نەزیر:بەلێ. پشتی هینگی . كاك خالصی دەست ب نڤیسینا سترانا كر و ئێكەم ستران نڤیسی بۆ ئەردەوانی . ئەو ژی سترانا ( زاخۆ شەنگێ و شرینێ ) ئه‌ڤ سترانە پێك دهات ژ پێنج بەیتا و پشتی من ئەو سترانە ژ وی وەرگرتی . ئەز هاتم مالا خۆ و من گوت دێ ئاوازەكێ دانمە ل سەر. بەلێ ئەز چوومە ل نك خالص خەلیلی و من گوتێ ئه‌ڤ سترانە گەلەك یاخۆشە بەلێ من هزرەك یێ هەی هەكەر تۆ رازی بی. وی گوت خێرە. ئەو چ هزرە تە هەی؟ من گوتێ پێدڤیە ئەم ناڤێن هندەك باژێرێن دی ژی لێ زێدە بكەین . خالصی گوت چەوا ؟ من گوتێ ئەم دێ ئاكرێ و ئامێدیێ و دهوكێ ژی لێ زێدە كەین. خالصی گوت: و الله دروستە و خۆش هزرە. ئەڤجا من گوتێ پا باشە هەما ب خێرا خۆ تۆ ڤان ناڤان لێ زێدە بكە و دروست بكە.
پ18/ ل وی سەردەمی و ل دەمێ دروستكرنا وی بەرهەمی و وێ كاسێتێ وەكو موزیكژەن كی بین دگەل هەوە؟
نەزیر: وەكو موزیكژەنێ سەرەكی ئەز بیم . بەلێ هینگێ دەمێ خالصی داخاز كری كو ئەم رابین و وێ كاسێتێ تۆمار بكەین هینگێ من هزر كر كو پێدڤیە ئەم هندەك موزیك ژەنێن دی ژی بینین. ئەڤجا ئێك هەبی و ناڤێ وی ( عبدالرزاق ئەحمەد ) بوو، ئەوی كەمان دژەنی.
پ19/ پشتی هەوە ئەو كاسێت تەمام كری. هەوە چەوا دیت؟ یا سەركەفتی بی؟ بوچونێن خۆدانێ تۆمارگەهێ چ بوون هەروەسا خالص خەلیلی چ گوت؟
نەزیر: بەلێ. مخابن. دەمێ مە ئەو كاسێت تەمام كری . ئەز روینشتم و من گوهداریا وێ كاسێتێ كر. دلێ من سار بی. چنكو ئەو كاسیت نە بدلێ من بی.
پ20/ بوچی دلێ تە ژێ سار بی . ما كێماسیەك هەبی ل دەنگێ ئەردەوانی ؟
نەزیر: باوەركە كاك عبدالجبار پشتی مە تۆمار كری و من گوهداری لێ كری ژ ئەردی هەتا ئە سمانا نە بدلێ من بی . هەڤالا گوت: بوچی برا خێرە؟ ما چ چێبویە ؟ من گوتە وان برایێن بەرێز باوەركن هەكەر هات و ئه‌ڤ كاسێتە هاتە بەلاڤكرن . ئەو زەحمەتا مە و ئەو ترس وچوونا مە بۆ بەغدا و بەشێ كوردی، هەمی دێ ب هەروە چیت . هەچەكو مە چ تشت نەكری . وان گوتن بوچی ؟ من گوتە وان گەلەك نەشازی یێ د موزیكێ دا . ئانكو پێدڤیە ئەم باش پروڤان بكەین و پاشی تۆەمار بكەین . ئه‌ڤ ئامیرەتێن موزیكێ نە یێن ددروستن . یا دووێ ژی تۆمار كرن نە زەلالە و نە سافیە . وان گوتن پا نوكە ئەم چ بكەین . من گوتە وان پێدڤیە ئەم ڤێ كاسێتێ هەلگرین و بەلاڤ نەكەین .
پ21/ ئانكو هەوە كارێ خۆ راوەستاند . و ئەو ێ كاسێتێ سەركەفتن نەئینا.
نەزیر: نەخێر ئه‌ڤ چەندە هەمی بۆ مە نەبی ئاریشە. بەلێ بتنێ من دڤیا وەكو بەرهەمێ ئێكێ بلا ب شێوەكێ جوان بێتە خۆارێ نە ب ڤی شێوەیی . بەلێ پشتی هینگێ جارەك دی ئەم كوم بین ل مالا من و مە دەست ب پروڤان كر. بەلی ل دەمێ مە خۆ بەرهەڤ دكر دەنگوباسێن مە گەهشتن گوهێ ( ئەبو مێهڤانی ) خۆدانێ تۆمارگەها زاخۆ . ئەو گەلەك هەڤالێ من بی چنكو هەر شەڤ ئەم ل بەر لێڤێن ئاڤا خابیری كوم دبین و مە دئاخفت . لەورا من گوتە ئەردەوانی: ئەز حەز دكەم ئەم ڤێ كاسێتێ بۆ ( ئەبو مێهڤانی ) تۆمار بكین تۆ چ دبێژی ئەردەوان ؟ ئەردەوانی گوت بلا وەكی تە بیت. ب راستی سەبارەت ئەبو مێهڤانی پسپوری هەبی د كارێ تۆمارگەهێ دا و یێ شارەزا بی و ئەوی دزانی چەوا ب شێوەكێ باش و سافی تۆمار بكەت . پاشی ئەبو مێهڤانی ژڤان دامە ل مالا هەڤالەكێ مە ئەو ژی ( هیشام حەسەن ) و ئەم كوم بین هەمی موزیكژەن و ئەبو مێهڤان و ئەردەوان .هینگێ مە دەربەك كرە ددەستێ خۆدێ ژێ رازی هیشام حەسەنی دا و من گوتێ تۆ دێ دەربەكێ دگەل موزیكێ لێدەی. مە دەست ب ستران گوتنێ كر و مە تۆمار كر. پ22/ ئانكو ئەو ئێكەم كاسێت و ستران بین كو هاتنە دروست كرن بۆ ئەردەوان زاخۆیی ب هاریكاریا تە. نەزیر: بەلێ و ژبیر نەكە چەندین شاهد بۆ ڤێ چەندێ هەنە و هندەك ژ وان هێشتا دساخن. پ23/ بوچونێن خەلكێ چ بین ؟ خەلكێ گوهێ خۆ ددان وێ كاسێتێ؟
نەزیر: بەلێ. پشتی مە تۆمار كری ئەبو مێهڤانی ئەو كاسێت دگەل خۆ بر و ئەم ژی هەر ئێك ژ مە چو مالا خۆ. بەلێ سپێدێ من ژی گوت دا بچم بازاری و بەرێ خۆ بدەمێ كا چارەنوسێ ڤی بەرهەمی چ لێ هات و كا ئەبو مێهڤانی چ كر و كا خەلك ڤی بەرهەمی دكڕن یان نە. ئەز ژی چووم و مە قەستا بازاری كر و گەهشتمە سەرێ كولانا مە . هینگێ تۆمارگەها ئەبو مێهڤانی ل سەر پرێ بی. من گوه لێ بی دەنگەكێ هەری بلند یێ دئێت و ل سەر وان سەماعێن مەزن . من زانی كو ئەڤە دەنگێ ئەردەوانی یە و كاسێتا مەیە . ل وی سەردەمی دەمێ هێك یان مریشك بەلاڤ كریبان خەلكێ دورا خۆ دگرتن ( سرا )، من هزر كر ئەڤە ژی رێزا هێكا یان مریشكانە . دەمێ ئەز نێزیك بیم . من دیت كو ئەڤە خەلك هەمی دراوەستاینە ل پشت ئێكو دوو داكو بتنێ كاسێتا ئەردەوانی بكڕن.
| دەمێ مە ئەو بەرهەم دروست دكر بۆ ئەردەوانی، ئەیاز ژی بەردەوام دهاتە نك مە و پشتی دیتی كو ئەردەوانی سەركەفتن ئینا ب وێ كاسێتێ. حەزا سترانگوتنێ ل نك وی ژی گەلەك زێدەبی. |
| من گوتێ كەرەمكە برایێ ئەیاز ئەڤجا دورا تە هات. پێدڤیە تۆ ژی سترانا بێژی. چنكو دەنگێ تە ژی گەلەك یێ خۆشە و نوكە تە شیان هەنە كو تۆ سترانا بێژی. بەلێ ئەیاز رازی نەبوو سترانا بێژیت ژ بەر ئەردەوانی. |
پ24/ باشە برایێ نەزیر تە ل دەست پێكێ گوت ئەیاز یوسف ژی هەڤالێ مە بی و دهاتە نك مە. ئایا تە هەول نەدا كو تۆ رابی ب دروستكرنا بەرەهەمەكێ بۆ وی ژی؟
نەزیر: ل دەمێ مە ئەو بەرهەم دروست دكر بو ئەردەوانی ئەو ژی بەردەوام دهاتە نك مە و پشتی دیتی كو ئەردەوانی سەركەفتن ئینا ب وێ كاسێتێ. حەزا سترانگوتنێ ل نك وی ژی گەلەك زێدەبی. و دهاتە نك من ل ناڤ مالا من . هەروەسا من دگەل وی ژی موزیك دژەنی و من پروڤە دگەل دكرن و من ئەو فێری سترانگوتنێ كر . و پشتی من باش فێركری سترانگوتنێ . من گوتێ كەرەمكە برایێ ئەیاز ئەڤجا دورا تە هات. پێدڤیە تۆ ژی سترانا بێژی . چنكو دەنگێ تە ژی گەلەك یێ خۆشە و نوكە تە شیان هەنە كو تۆ سترانا بێژی . بەلێ ئەیاز رازی نەبوو سترانا بێژیت ژ بەر ئەردەوانی. گوت هەتا ئەردەوان باش دەلیڤا خۆ ببینیت و بێتە نیاسین، پاشی بلا ببیتە دورا من. بەلێ گەلەك جارا دەمێ ئەم دروینشتین وەكو هەڤال و دگەل هەڤالان، ئەیازی سترانێن كەڤن دگوتن و من ژی بۆ وی ب تەمبورا خۆ موزیك دژەنی . چنكو هەڤالێ من بی و جیرانێ من بی و كورێ باژێرێ من بی و بەردەوام ئەردەوان و ئەیاز دگەل ئێك و دوو بین وەكی دوو برا و هەر شەڤ دهاتن نك من ل مالا من.
پ25/ پشتی وی بەرهەمی . بوچی هەوە بەردەوامی نەدا كارێ خۆ یێ هونەری. تۆ و ئەردەوان زاخۆی ژبۆ دروستكرنا سترانا و بەرهەمێن نوی؟
نەزیر: من دەست ژ ئەردەوانی بەرنەدا . چنكو ل سالا ( 1977 ) ژی من بەرهەمەك من بۆ وی دروست كر و ب هاریكاریا هوزانڤان خالص خەلیل و ژ ئاوازێن من. ل سالا ( 1978 ) ژی هەر من ئەو بەرهەمە یێ بۆ وی دروست كری. و ل سالا ( 1979 ) ژی هەر من بۆ وی ئەو كاسێتە یێ دروست كری.
پ26/ پشتی ئەردەوانی . تە هەول دا كو تۆ رابی ب هاریكاریا هونەرمەندەكێ نوی و تۆ وی بینیە د ناڤ گورەپانا هونەری دا. نەزیر: بەلكو دئێت ل بیرا تە دەمێ ئەم ل ناڤ مالا تە كوم بین. ئەز و هونەرمەند عبدالحكیم زاخۆیی و عبدالعزیز سلیمان و حسین عبدالكریم و دلوڤان زاخۆیی و تۆژی هەر دگەل مەبی. مە كاسێتەك بۆ هەنەرمەند عبدالحكیم زاخۆیی تۆمار كر و ب هاریكاریا تە. چنكو هینگێ تە تۆمارگەهـ هەبی . هەروەسا من هاریكاریا گەلەك هونەرمەندان یا كری و من گەلەك ستران یێن داینە گەلەك سترانبێژان.
| ب راستی هندەك كەس بێن و خۆ ل وێ زەحمەتێ و وێ خزمەتا تە كری و وان بەرهەمێن ب بەلگە بكەتە خۆدان و رابن و بو خەلكه‌كێ دی بدەنە دیاركرن ب فیلبازی و دەرەوا. ب راستی ئه‌ڤ چەندە دبیتە جهێ نەرازیبونا مروڤی و جهێ دل ئێشیا مروڤی. |
| ل سالا ( 1992 ) ئێكەم تێلەڤزیون ل باژێرێ زاخۆ و ل دەڤەرێ ڤه‌بوو. ئێكەم هونەرمەند ئەز و هەڤالێن من بین ئەوێن موزیكژەن، ئەم رابین ب خزمەتكرنێ ل ناڤ ڤی كەنالی. |
پ27/ تۆ وەكو هەنەرمەند وەكو موزیكژەن و ئاواز دانەر پشتی هینگێ و هەتا نوكە ئایا تۆ یێ بەردەوامی ل گه‌ل كارێ هونەری یان چێدبیت تە حەز نەمابیت ل سەر كارێن هونەری؟
نەزیر: باوەركە هەكە تە راستی بڤێت. دەمێ كەسەك رابیت و ژ دل و جان و ب دل سوزی خزمەتەكێ بكەت و ل سەردەمێ حزبا بەعس دا و ترسێ و دەستەسەركرنێ و دەربەدەریێ و هینگێ و وان رەفیقێن حزبێ ئەوێن چ حال بۆ مە نەدهێلان .ل وی دەمی مروڤ رابیت و خزمەتەكێ بكەت و یا بەرچاف بیت و نە ئێتە ڤەشارتن و ل دویف چەندین بەلگە و شاهدان. پاشی هندەك كەس بێن و خۆ ل وێ زەحمەتێ و وێ خزمەتا تە كری و وان بەرهەمێن ب بەلگە بكەتە خۆدان و رابن و بو خەلكێ بدەنە دیار كرن ب فیلبازی و دەرەوا و مەرەم ژ هندێ بیت كو هاریكاری بو وان بێتە كرن. ب راستی ئه‌ڤ چەندە دبیتە جهێ نەرازیبونا مروڤی و جهێ دل ئێشیا مروڤی و بێ ئومێدیا مروڤی . سەرەرای ڤێ چەندێ هەمیێ و وێ ماندیبونا من دگەل سەركەفتنا دەستپێكا هونەرێ كوردی ل دەڤەرا زاخۆ و هەروەسا دگەل سەركەفتنا هونەرمەند ئەردەوان زاخۆی ژی، چ تشت بۆ مە نەهاتیە كرن .
پ28/ وەكو تۆ هونەرمەند و ئاواز دانەر و موزیك ژەن و ژ سالێن شێستا و هەتا نوكە . تۆ خۆ دبینی كو تۆ یێ مەغدوری و مافێ تە هاتیە خۆارن یان نە ؟
نەزیر: باوەركە نە ئەز دبێژم ئەز مەغدورم . جەماوەرێ زاخۆ و خەلكێ زاخۆ و هەمی هونەرمەندێن زاخۆ دزانن كو ئەز یێ مەغدورم . هەمی دزانن، چنكو هەكەر ئەز نە مەغدور بام . هەمی دا زانن كا چ تشت بۆ مە هاتیەكرن.
پ29/ پەیڤا تە یا داویێ چیە ؟ ئانكو تە چ هەیە تۆ بو خۆیندەڤانان بێژی؟
نەزیر: ژبەری ئەز ئاخفتنا خۆ ب دوماهیك بینم، ل سالا ( 1992 ) ئێكەم تێلەڤزیون بی ل باژێرێ زاخۆ و ل دەڤەرێ ڤه‌بوو. ئێكەم هونەرمەند ئەز و هەڤالێن من بین ئەوێن موزیكژەن. ئەم رابین ب خزمەتێ ل ناڤ ڤی كەنالی. پەیڤا من یا داویێ ژی، ئەز داخازا سەركەفتنێ بۆ كۆڤارى و خانده‌ڤانان و هەمی هونەرمەندان دكه‌م.
