جڤاتا سەرخۆشان

ئه‌حمه‌د ياسين

پێلاڤا خۆ، وەكی هەر جار، یا كریە شەكال و دایــە سەر پێیێن خۆ، ژێهەل یێ ژ بەتەنێ ب سەردكەڤیت و گەهشتە دەرگەهێ دكانێ و سلاڤ كر، دولكێ خۆ تژی مەی كر و ل بن كەفشێ خۆ دانا و خۆ هاڤێتە د دكانا ب رەخڤە، بەری سلاڤ كــەت، ئەبو كــاروی گۆتێ”ئوهوو دیسا ئەڤە توی؟!“ ئەوی ژی نە كرە نە مەردی گۆتێ” دێ حەقێ خۆ دەم، كا بۆ من ماعونەكا زەیتۆنان و هندەك تڤران بدانە سەر“ سالۆی قەستا هەڤالێن خۆ كر، یێن كو ل وێڤەی دەرێ هەردوو دكانان شەڤانە دروینن و دنیایێ سەروبن دكەن، پرتەكا كارتونێ پەیدا كر و ل سەر روونشت، چوار پێنچ ب خێرهاتن بۆ ژ هەمی لایەكیڤە هاتن، ئەوی ژی دولكێ خۆ بلندكر و دا سەر دەڤێ خۆ و قۆرچا ئێكێ بەرێڤەكر و گــۆت“وەی بابۆ، قەیماغە، شیرێ میهانە“.

ئــەو ســەرێ شــەش رۆژان بــوو، سەیدای كــربــوو دلـــێ خــۆ كــو شــەڤــەكــێ دگـــەل وان روینیت، هەر چەندە كەس ژ وان نە دنیاسی و سەروسیمایێ تاكێن وێ جڤاتێ ژی هەمییان، یێن مرۆڤێن هەژار و بەلنگاز بوون، شەڤێ نوو دەستپێكربوو، ئەوی ژی دولكێ خۆ هەلگرت و سلاڤــی جڤاتێ كر، بــەری بەرسڤا سەیدای بدەن، هەر ئێكی تەماشەی یێ دی كر، سەیدای گۆت“روخسەتە ئەز ژی دگەل هەوە روینم؟“  سەعۆی گۆت“بەلێ .. بەلێ سەیدا كەرەمكە تو ب خێرهاتی“ سالۆی گۆت“روینە بابۆ مرۆڤان

مــرۆڤ نەخوارینە“ ئەبو دلــۆی بریێن خۆ بادان و دبن لێڤلڤكانڤە گۆت“هم.. هەما تو یێ ژ مە كێمی“ بــەدوی گــۆت“دێ كەرەمكە. تو بخێرهاتی“ سەیدا ژی روونشت و بازنێ خۆ یێ جڤاتێ فرەه كر وسالۆی ب هێز مستەك ل دەستێ خــۆدا و ب دەنگەكێ بلند گــۆت“بـ ـخــۆدێ دێ كوژم“ جرفەك ب سەیدای كەفت و ئەبۆ دلۆی ل وێڤە گۆت“لەحنا هەر شەڤە“ بەدو لێ زڤڕی و گۆتێ”هەی خولیسەر ماتۆ چ سحبەتێن دیةنزانی؟ هەر شەڤ تو ڤێ دبێژی“ سەیدای دەڤێ خۆ برە بن گوهێ ئەبو دلۆی و گۆت“خێرە؟ چ چێ بوویە؟“ ئەبۆ دلۆی گۆت“ئێكی تەشقەلەكا لێكری و پارێن وی یێن برین. “

جەجۆ زەالمــەك بــوو، خۆ نــەددا ب سەد زەالمــــان، هەكو نــاڤــێ وی دهـــات، ترسێ گۆهێن مرۆڤی دگــرت، هەكو ژێ دگــۆت؛ چ ژنێن وەكی ژنا وی د جــوان نەبوون، سەرا مەیڤەخوارنێ ، شەش زارۆك بۆ هێلابوونە د خانیڤە و خۆ ژێ دابوو بەردان، شەلوالەكێ دبەر پترییا كوریشكێن وی یێن بۆ رەخێ چەپێ چووین، شەش حەفت كونێن تێبووین، مرۆڤی دزانی جگاران ئەو كونێن تێڤەكرین، ئەو ژی گەهشتە جڤاتێ و ل سەر كماخێن خۆ روونشت و دؤلكێ خۆ ژ بەریكا خو ئینا دەر، هەر زوی سەعۆ گەهشتێ و ب خیر هاتن لێكر و جگارەك بۆ بەردایێ و گۆتێ”هشیار بی، ئەڤ شەڤە مە مێڤانەكێ هەی“ جەجۆی چاڤێن خۆ گێراندن و خۆ متكر و دبن لێڤانڤە گۆت“هم … مێڤان“، دیوان گەرم بوو، سوحبەتێ دگۆتە سوحبەتێ وێڤە هەڕە، هندەك جاران چوار پێنج سوحبەت تێكهەل دبوون، هەبوو، بتنێ مەدحێن خۆ دكرن، هەبوو ژی گەف دكرن، هــەبــوو ژی ســتــران دگــۆتــن، ســالــۆی دیسا گۆت“ما دێ كیڤە رەڤیت، خۆ ناچیتە د شاخێن گای دا“، ددەلیڤەكێدا، جەجۆ ل سەر كماخێن خۆ رابووڤە و راهژیا و ب ئەزمانەكێ لالۆتەیی گــۆت“ ب حــەلال و حـــەرام یــێ ئاخڤت من كوشت“، دیوان بێ دەنگ بوو، سەیدا ترسییا و ل چاڤێن جەجۆی نێــڕی، ب راهژیانڤە، جەجۆی قەستا سەیدای كر و گۆت“ هوین خولامێن سەیدای بن، هەكە هەوە ئەڤ شەڤە كەس ژ خۆ كرێتتر نەددیت“، پیچەك بێهنا سەیدای هات و زەیتۆنەك هاڤێتە د دەڤێ خۆدا، ددەلیڤەكێدا، ئەبۆ دلۆ دخــەو چــوو، جەجۆ گەهشتێ و ب هێز پێهنەك ل بنێ پێ وی دا و گۆت“قوندەرە، تۆ شەرم ناكەی، مە مێڤانەكێ عەزیز هەی و تۆ دنڤی“ ئەبۆ دلۆ جارەكا دی ل سەر پرتا كارتۆنێ روونشت و بتنێ گۆت“ ئەز خولامێ تەمە“ جەجۆ زڤڕی و گۆتە سەیدای“ ل سەر من حساب كە“ و دیوان و سوحبەت بتنێ بۆ جەجۆی ما و گۆت“سەیدا تۆ بۆ ڤان حزبێن…“ هێشتا ئاخفتنا جەجۆی د دەڤیدا، سالۆی دولــكــەك تێــوەركــر و گۆت“هشیار بــی، بەحسێ سیاسەتێ نـــەكـــەی“، جــەجــۆ ئێكسەر رابووڤە و گــــۆت“وەی!  ئــەز جەجۆ بم و ئێك دولكا د من وەربكەت“، بەزینە ئێك و دوو، هەمییان پێــكــڤــە خـــۆ دا دگــەل جەجۆی و ب سالۆی وەرهاتن و جلك دبەردا دڕاندن، سەیدا كەفتە نیڤەكا وان و ڤێ بگرە و یێ دی بگرە، چام ژ ئێك و دوو چێكرن، هندەك جوامێر ژ وێڤە هاتن و ژێكڤە كرن و گۆتنە ئێك و دوو“هــەر شەڤ حالێ ڤان ئەڤەیە“، بیست خەبەران بێهنا خۆ ڤەدان، جەجۆی ب هەردوو چاڤان كرە گری و چوو ب سەرێ سالۆی ڤە ماچی كر، پێكهاتن، جارەك دی روونشتن، لێ هەر دولكەكێ بۆ خۆ چووی و مزە ژی یێ ب وارا وەربووین، جارەكا دی؛ هەر ئێكی ژ رەخــێ خۆڤە، خۆ د دكانێن مەیێ و مزا قوتاڤە و هاتن ل جهێن خۆ روونشتن، سەیدای كــارێ چوونێ كر، جەجۆی گۆتێ” ب شەرەف و نامیس تو ناچی، عەیبە تو مێڤانێ مەی“ سەیدای كر و نەكر، نەشیا خۆ ژ دەستێن وان بینتە دەر، شەڤ درێژ بوو، جەجۆ ل سەر ملێ خۆ زڤڕی و ب كوتەك شیا بێژیتە سەیدای“تو بێژی وەزعێ مە چ لێبهێت؟ ئەمریكا دێ چ بۆ مە كەت؟“ سەیدای نە ب دلەكی ب هزار دلان بەرسڤ دا و گۆت“ئەمریكا نە جهێ بــاوەریــێ یە، مەزن دبێژن؛ رەشۆ ب دەستێن خۆ، هەكە دێ ئاڤ تە بەت“ ئەبۆ دلۆی ل وێڤە گۆت“ئاها ئافەرین، تە یا دروســت گــۆت“، بــەدوی ل ســەر ئاخفتنا ئەبۆ دلــۆی زێدەكر و گۆت“نە بابۆ نە.. ئەمریكا یا بابێ خــۆ نینە“، پشتی سالۆی جهێ ئەو كولمێن ڤێكەفتین، ڤەمالین، گۆت“كا دێ ڤـــەخـــۆن، وە شــولــەژ ڤــان شولانە، هوین بۆ من بوونە خەبیر“، جـــەجـــۆی پێـــكـــێ خۆ بلند كر و كــرە قۆرچەك، ســەیــدا ئێــكــســەر رابــووڤــە و گــۆت“دیــارە هــەوە ئنیەتا مــال نینە؟ روخسەتا هــەوە بیت ئەز دێ چم“ سالۆی گــۆتــێ”ڤێــرێ جهێ مەیە و ئــەم چ جــاران بەرنادەین“ جەجۆی دەستێ سەیدای گرت و ب لالۆتەیی گۆت“هێشتا فلمێ مــای، ب حەلال و حەرام تو ناچی، تە دیوانا مە یا ب رەوش ئێخستی“، جەجۆی گۆتە بەدوی“ یەلا هەڕێ”، بەدوی ژی دەستێ خۆ دا بن گوهێ خۆ و قێر كرە سترانەكێ ، هێدی هێدی، هەر ئێك ژ جهێ خۆ رابووڤە و دولكێن خۆ بلندكرن و دەست ب رەقاسێ كر و پاشی دەواتــا خۆ گرێدان، سەیدای ژی دەست بۆ قوتان و ئەو پتر گەرم بوون، بیست خەبەران دەواتا وان ڤەكێشا و زڤڕینە جهێن خۆ، سالۆی گۆت“دنیا ب زەوقی یا خۆشە“ بەدوی گۆت“دنیا بەر چ ناكەڤیت“ جەجۆ هندی هاتێ ئاخفتن ژێ نەهات و ستۆیێ وی كەفتە ل سەر ملێ چەپێ و دخەو چوو، ئەبۆ دلۆی پرتەكا بلۆكێ دانا ل بن سەرێ خۆ و ل سەر تەنشتا چەپێ نڤست، سەعۆ یێ سترانان بۆ خۆ دبێژیت و رابوویە چەپان، سەیدای ژی ب هێجەتا دەستئاڤێ چەپەك ل خۆدا و غەوارە بوو.