عەشق و رویبار
د. ئەمجەد گەڤەڕکی
ئێڤار بوو…
دەما دەلنگێن خۆ ب نازکی هلداین…
و پێن خۆ د ئاڤێ دا تەزاندین
رویبار هەڕکی و بێهۆدە بوو
دا بێژی فەرمانە
ژ هنگی وەرە هەمی نقۆڤان
ب لێگەڕیانا لاشێ دلێ من ڤە…
د موفتەلانە
ئەو رویبار ژ گەرما عەشقا من...
هەمی بۆ هلم
ئاسمانێ شین ژ عەورێن سپی مشت کر…
و بوونە باران
هاڤین بوو، بارانەکا گەرم و نەرم بوو…
نەرم بوو وەک دلێ وێ
گەرم بوو وەک عەشقا من
ژ وێ رۆژێ وەرە…
هەمی هۆزانڤان…
کەتینە خەما نڤیسینا داستانا عەشقا من.
سپێدە بوو…
بایەکێ هوین لەشێ من گەزت
بێهنا هەناسێن وێ ژێ دفڕی…
تاما ماچێن وێ ژێ دهات…
بەلگێن دارا رابوونە سەمایێ
چویچکا دەست هاڤێتە…
سترانا و لایێ لایێ
ژ هنگی وەرە دلێ من ژى…
کەتیە بەر حنگا حەولولوەلایێ
شەڤ بوو…
پێژنەک ژ وێڤە هات
نزانم کچا رۆژێ بوو…
یان ژی خویشکا هەیڤێ
بێهنا بەهەشتێ ژێ دهات
من ژ دل ب سینگێ خۆ ڤە گڤاشت
سینگێ وێ دا بەر گەزا…
و لێڤێن وێ هەلمریستن
ژ وێ شەڤێ وەره...
هەستێن من د هار و مەستن.
وەسا داستانا عەشقا مە دەست پێ کر
نزانم راستە…
یان ژی وەکو دەولەتبوونێ…
خەونەکا هاتوباتە.
26/6/2025
