ژنێن بوێر و بهێز
ئا: عزه‌ت يۆسف
كریستینا فێرنانديز:
ل 19 شواتا سالا 1953 ل دەڤەرا تولوسا ل رۆژئاڤایێ لاپلاتا، سەر ب بوینس ئایرس هاتیە دونیایێ. بابێ وێ د گوتنێ ئێدواردو فێرناندز و دایكا وێ ئوفیلیا ولیەم. دەرچوویا بەشێ یاسایێ یە ل زانكویا لاپلاتا یا نیشتمانی. ل دەمێ گەنجاتیێ گەلەكا ئەكتیڤ و ب بزاڤ بوو. ل سالا 1975 ژیانا هەڤژینی ل گەل نستور كیرشنەر پێكئینایە و خۆدانا دوو زاروكانە (مەكسیمو و فلورنسیا ).
ل هەلبژاردنێن گشتی یێن سەروكاتیێ ل ئوكتوبەرا سالا 2007 ێ وەكو بەربژێرا پارتا دادوەری، شیا 45% ژ دەنگان مسۆگەر بكەت و ل دیسەمبەرا هەمان سال بوویە سەرۆكا ئەرژەنتینێ.ل دویڤ پولینكرنا گۆڤارا “فوربس” یا ئەمەریكی ل 8 ێ ئوكتوبەرا سالا 2010، بۆ ئێك ژ 100 ب هێزترین ژنێن جیهانێ. كریستینا فێرناندز، ژبەر شارەزایی و سەرەدەریكرنا وێ بۆ باشكرن و سەقامگیریا رەوشا ئابوری و جڤاكی یا خەلكێ ئەرژەنتین، ل رێزبەندا 11 ێ دهات.
كریستینا حەز ژ وەرزش و وەرزشڤانان دكەت. ل یاریگەهێن جودا جودا مشە بەرهەڤ دبیت و ئارەزویا وێنەگرتنێ ل گەل ستێرێن وەرزشڤان هەیە.
گلۆریا ئه‌ڕۆيۆ:
(گلوریا ماكاپاگال ئارویو) ل 5 ێ نیسانا سالا 1947ل سان جوان، رزال ، فلیپین هاتیە سەردونیایێ. سەروكا 14 ێ یا فلیپین بوو. ژنا دوێ بوو پشتی (كورازون ئەكینو) پوستێ سەروكاتیێ وەردگریت. كچا سەروكێ بەرێ یێ فلیپینێ (دیوسدادو ماكاپاگالە) بوو كو ل ( 1961 – 1965 ) سەروكێ فلیپینێ بوو .
خواندنا خۆ یا بنەرەتی ل مانیلا ب دوماهیك ئینا و ئامادەیی ژی هەر لوێرێ ل سالا 1964 ێ ب زیرەكی تمام كر. پاشان بۆ ماوەیێ دوو سالان ل زانكویا جورج تاون ل ئەمەریكا بەشێ ئابوری خواند.ل سالا 1968ێ بەكالوریوس ب ئابوری ل مانیلا ئینا. پلا ماستەر ل سالا 1978 ل زانكویا ئاتینو دی مانیلا و دكتورا Ph.D ل سالا 1985 ل زانكویا فلیپین ل باژێرێ قویزونو وەرگرت. گەلەكا رەهوانە د زمانێ ئنگلیزی و ئیسپانی و زمانێن سەرەكی یێن فلیپینی دا وەكو كابامبانجان، ئلوكانو و سیبوانو.
ل سالا 1968 ێ خێزانا هەڤژینی ل گەل پارێزەر و خۆدان كار (جوزێ میگویل ئارویو) پێكئینا و خۆدانا سێ زاروكانە (میكی 1969، لولی 1971 ، داتو 1974).
ل ( 1978 -1987 ) ماموستا زانكویێ بوو. پاشان بوویە بەرپرسا بەشی ئابوری ل زانكویا مانیلا.
ل سالا 1987ژ ئالیێ سەروكا فلیپینا ئەوی سەردەمی (كورازون ئەكینو) هاتیە داخاز كرن بەشداریێ د حكومەتێ دا بكەت. ل (1987- 1992) جێگرا وەزیرێ بازرگانی و پیشەسازی بوو. ل (1992 -1998) سیناتور بوو. پاشان ل 30 ێ خزیرانا 1998 ێ بوویە جێگرا سەروك (ئیسترادا). پشتی ئیسترادا ب گەندەلیێ هاتیە تومەتباركرن ، ئارویێ ل ئوكتوبەرا 2000 ێ دەست ژ پوستێ خۆ كێشا و گەهشتە بەرهنگارێن سەروكی. پشتی خۆنیشاندانێن جادێ ئیسترادا ناچار كری دەست ژ پۆستێ سەروكاتیێ بەردەت، ئارویو ل 20 ێ ینایرا 2001 ێ هەتا 2004 ێ بۆ پۆستێ سەروكاتیا فلیپین هاتە ڕاسپاردن. ل هەلبژاردنێن سەروكاتیا سالا 2004 ێ ب سەركەت و پتر ژ ملیون دەنگان ژ ركبەرێ خۆ (پۆو Poe ) ئینان. ل 30 خزیرانا 2004 ێ بۆ 2010 ێ بۆ شەش سالان سوندا سەروكاتیێ خوار. پاش سەروكاتیێ ژی بۆ چڤاتا نوینەران هاتە هەلبژاردن.
گۆلدا مائیر:
گولدا مائیر ل 3 ێ مایو سالا 1898 ێ ل كێڤ Kiev – ئێكەتیا سوڤیەتا بەرێ – پایتەختێ نها یێ ئوكرانیا Ukraine ژ بابەكێ دارتاش و دایكەكا بەرمال ژ دایكبوویە. بابێ وێ د گۆتنێ مورس و دایكا وێ بێلا. دوو خوشك هەبوون ب ناڤێ شێنا و تزیكا.
ل سالا 1906 ی ژبەر قوتبركرنا جوهیا ل روسیا بۆ ئەمەریكا مشەخت بووینە و ل دەڤەرا میلوكی و یسكونسن ئاكنجی بووینە. ل وێرێ، بابێ وێ مورسی جارەكا دی كارێ دارتاشیێ كریە و دایكا وێ ژی دوكانەك بۆ خۆ پەیدا كرو گولدا یێ ژی جاروبارا هاریكاریا وێ دكر.
هەر زوی گولدا فێرێ زمانێ ئینگلیزی بوو. چوو قوتابخانێ، پاش قوتابخانێ ژی كارێ دوكانێ و مالێ دكر. ل ژیێ 14 سالیێ دایكا وێ رژدی لێ كر كو قوتابخانێ بهێلیت و شوی بكەت. لێ ئەوێ ئەڤە رەتكر و قەستا مالا خویشكا خۆ یا شویكری ( شێنا ) یێ ل باژێرێ دنڤر كولورادو كر و بەردەوامی دا خواندنا خۆ. ل سالا 1915 ێ قۆناغا دواناڤنجی ب دوماهیك ئینا. ل ژیێ 19 سالیێ شوی ب نیگاركێشەكێ مەزنێ جوهی كر دگۆتنێ موریس میرسون.
دەمێ قوتابی ل قوناغا ناڤنجی، بۆ ئەندامەكا چەلەنگا بزاڤا گەنج و قوتابیێن زایونست، ل كومبوونێن مەزن بەحسێ فەلەستینێ دكر و پێشوازیا خەلكێ ژ فەلەستینێ دهاتن دكر.
گولدایێ ئسرائیلی هانددان بچنە فەلەستینێ. هەتا سالا 1921 ێ ئەو و هەڤژینێ خۆ و ل گەل خویشكا وێ شێنا و هەڤژینێ وێ ل ژێر ناڤێ ( كوچكرن بۆ ئاخا ئسرائیلێ) قەستا فەلەستینێ كرن. گولدا و هەڤژینێ خۆ بۆ دەمەكی جوتكاری دكرن. پاشی ل سالا 1924 ێ ژیانا گوندا هێلا و قەستا تەلئەبیب كرن و پاشی ل قودسێ ئاكنجی بوون. ل وێرێ دوو زارۆك هەبوون. كوڕ ب ناڤێ (میناچام سالا 1924) و كچ ب ناڤێ (سارا سالا 1926).
گولدایێ دەست ب كارێ جەماوەری و سیاسی كر. هاتە هەلبژاردن بۆ سكرتێرا ( چڤاتا ژنێن كرێكار). پاشان بۆ ماوەیێ دوو سالان (1932 – 1934) هاتە راسپاردن وەكو نوێنەر ل ئەمەریكا. ل سالا 1934 ێ جارەكا دی ڤەگەریا فەلەستینێ و گەلەك پۆستێن جودا د سەركردایەتیا ئیسرائیلێ دا وەرگرتن، هەتا دەولەتا ئسرائیل ل سالا 1948 ێ هاتیە دامەزراندن.
گولدا ئێك ژ 24 كەسان (دوو ژ وان ژن بوون) كو راگەهاندنا سەربەخۆیا ئیسرائیلێ ل 14 مایو 1948 ێ ئیمزا كری. ئێكەمین سەفیرا ئیسرائیلێ بوو ل موسكو بۆ دەمێ سالەكێ هەتا 1949 ێ. ل سالا 1949 – 1956 پۆستێ وەزارەتا كار و چاڤدێریا جڤاكی وەرگرت. ل سالا 1956- 1966 بۆیە وەزیرا دەرڤە. د هەڤدەمدا پلا سكرتێرا گشتیا پارتا ماپای – پارتا كار ب ەستخۆڤە ئینا. ل سالا 1969 هەتا 1974 ێ پۆستێ سەرۆكاتیا وەزیران وەرگرت.
ل 8 ێ دیسەمبەرێ سالا 1978 ێ ل ژیێ 80 سالیێ دا ل قودسێ وەغەرا ئێكجاری كریە.
