هيڤى به‌روارى.. ژیانه‌كا پڕی راگه‌هاندن و هیڤیێن بجهنه‌هاتی
دیدار/ دلێر زوهێر
كەسانێن زۆر هەنە هەر ژ زارۆكینیا خۆ هاتینە د راگەهاندنێ دا و ژ بەرنامێن گرێدای زارۆكان دەستپێكرینە و هەتا نۆكە بەردەوامن د كارێن خودا، هیڤی ژی ئێك ژ وان نموونایە یێن كو هەر ژ زارۆكینیێ مە دیتیە و هەتا نۆكە بەردەوامە، د ڤێ دیدارێ دا دێ چەندین زانیاریان دەبارەی هیڤیێ زانین.
-هیڤی كییە؟ و چ باوەرنامە هەیە؟
ب هیڤی بەرواری بەرنیاسم، من پەیمانگەها تەكنیكی بەشێ ئای تی بدووماهیك ئینایە.
-كەنگی هیڤیێ دەست ب كارێ ڕاگەهاندنێ كرییە؟
ل بەرنامێ زارۆكان من دەست ب كارێ راگەهاندنێ كرییە، كو دكەڤیتە سالا 2005ێ.
-ڕاگەهاندنێ چ ل هیڤیێ زێدەكرییە؟
ڕاگەهاندن جیهانەكا جودایە،پێزانینێن مرۆڤی بەرفرەهتر لێ دكەت هەروەسان سەنگ و كەسایەتییەكا باش و بهێز ددەتە مرۆڤی.
-ئاستەنگێن كەڤتینە بەرامبەر هیڤیێ ژ بۆ ڕاگەهاندنێ چ بووینە؟
ئێك ژ وان ئاستەنگان جڤاك بوویە كو ژ نیاس و مرۆڤێن مرۆڤی پێك دهێت، ژبەركو ب چاڤەكێ كێم تەماشەی ڕاگەهاندنێ دكەن، لێ پشتی ئەز بۆ دەمەكێ درێژ مایمە د ڕاگەهاندنێ دا و من ب دروستاهی بۆ وان روهنكری، نۆكە شانازیێ ب كارێ من دبەن.
-ئەرێ یا ب زەحمەتە هیڤی ژ ڕاگەهاندنێ دویركەڤیت؟
یا بزەحمەتە ئەز ژێ دویركەڤم، ژبەركو دەمێ مروڤ دچیتە د جیهانا ڕاگەهاندنێ دا مرۆڤ ئاڵۆدە دبیت، چەندین ئاستەنگ و ڕێگری هەبوون، لێ من هەمی دەربازكرینە و ڕاگەهاندن نەهێلایە، نزانم ل داهاتی دێ چ رویدەت دبیت جارەكێ بهێلم، لێ هەتا نۆكە من هزر تێدا نەكرییە.
-مە ڕاگەهاندنا ئازاد هەیە؟
مە ب چ ڕەنگان ڕاگەهاندنا ئازاد نینە، هەمی ب سەر لایەنان ڤەنە، هندەك جهـ هاتینە خۆ ب بێ لایەنی دەنە دیاركرن لێ ب سەر لایەنان ڤەنە و نەشێن پەیاما خۆ ب دروستاهی بگەهینن.
-هیڤی خێزاندارە و چەند زارۆك هەنە؟
بەلێ خێزاندارم و دوو زارۆك كچەك و كورەك من هەنە.
-ئارمانج و خەونێن هیڤیێ ل زارۆكینیێ هەین نۆكە گەهشتیێ؟
ئەو ئارمانجێن من هەین هەتا نۆكە ئه‌ز نەگەهشتیمێ، هەر ژ چوونا من ژ بەرنامێ زارۆكان من دخواست من بەرنامەكێ تایبەت ب خۆڤە هەبا و بەرنامەكێ ل دویڤ حەز و ڤیانا خۆ بۆ ڕاگەهاندنێ پێشكێش بكەم، لێ هەتا نۆكە نەگەهشتیمێ، وەكو دژی ئەو باوەرناما من ڤیای بدەستخۆڤە بینم نە ئەو بوو یا من دڤیا.
-ئاخڤتنێن خەلكی بۆ هیڤیێ گرنگن؟
ئاخڤتن یا هەی گەلەك كارتێكرنێ ل مرۆڤی دكەت، تا ڕادەیەكێ، بەلێ یا گرنگە ژبەركو ئەو كەسە هەر كەسێن نێزیكی مرۆڤینە، لێ دەمێ ب شێوەكێ توند سەرەدەریێ دگەل تە بكەن چ پێ نەڤێت دێ كارتێكرنا خۆ هەبیت، ژبەركو ئەم هەمی خودان هەستین.
-ئەرێ ژیان ب ساناهی دەرگەهێن خۆ ل مرۆڤی ڤەدكەت؟
ژیان جار ب ساناهی و جار ژی ب زەحمەت جار ژی چانسە، دەرفەت دێ بۆ تە هێن بێی كو كارەكێ ب زەحمەت ئەنجام بدەی، جار ژی هندی زەحمەتێ ببەی چ ب كەدا تەڤە ناهێت.
-تو چاوا رۆلێ ژنێ د هەرێما كوردستانێ دا دبینی؟
تا رادەیەكی باش بوویە، ژن شیایە جهێ خۆ د گەلەك بواران دا بكەت و جهێن باش بدەستخۆڤە بینیت و شوین تبلێن خۆ دیار بكەت و رۆلەكێ باش د ئەركێن خۆدا بگێریت.
-ژبلی بەهرەیا بێژەریێ ئەرێ تە بەهرەیەكا دی هەیە یان تو دخوازی تە چ بەهرە هەبا؟
ژبەركو ئه‌ز زویكا هاتیمە د جیهانا ڕاگەهاندنێ دا بتنێ د ڤی بواریدا من خۆ دیتییە و دشێم بێژم ئەز یا پەككەڤتی بوویم ژ بۆ بدەستڤەئینانا بەهرەیەكا دی، هەرچەندە من دخواست بەرەڤ تاقیكرنا بەهرەیێن دی ژی بچم، بەلێ ئەو دەرفەت بۆ من نەچێبوویە و هندەك جاران ژی دبێژم بلا من بەهرا ستران گۆتنێ هەبا یان ژەنینا ئامیرەكێ موزیكێ.
-سوشیال میدیا بوویە پێدڤییەكا رۆژانە؟
ژ بۆ هندەك كەسان بەلێ و گەلەك ب باشی خۆ پێ خودان دكەن و خودانێن خۆ و چ تشتان نەبووینە، ئەڤرۆكە ب ڕێكا سوشیالێ یێن بووینە خودان هەر تشتەك، لێ بۆ من نەخێر.
-ئەرێ ئەم ب شێویەكێ ساخلەم سوشیالێ بكاردئینین؟
هندەك كەسان بشێوەیەكێ باش بكارئینایە، ئەڤرۆكە گەلەك كەسان بخۆ مفا ژێ وەرگرتییە، لێ هندەك كەس ژی نەخێر ب شێوەیەكێ نەباش بكاردئینن و بتنێ ل سەر حسابا هندەك كەسێن دی بۆ خۆ لایك و كۆمێنتان دئینن.
ئەرێ هیڤی كیش تۆرا جڤاكی پتر بكاردئینیت و بۆچی؟
ل دەستپێكی من گەلەك ئنستاگرام بكاردئینا و ل دووڤ دا تیك تووك و نۆكە سناپ چات، ژبەركو ل دەڤەرا مە پتریا كەسان سناپی بكاردئینن و خۆشترە بۆ بكارئینانێ و هەر پۆستەك 24 دەمژمێرا دمینیت و پشتی هنگی نامینیت و تێدا رۆژانێن هەڤال و كەس و كارێن خۆ دزانیت.
-سەرەدەریكرنا هیڤیێ دگەل كەسێن كومێنتێن نەجوان دده‌ن چاوایە؟
ئەم ژی وەكو هەر كەسەكی مرۆڤین و نە رۆبۆتین مەژی هەست هەنە، سەرەدەریكرنا من ژی لادانا وێ كۆمێنتێ یە و ئەگەر گەلەك دووبارە بوو بلۆك كرنا وی كەسی یە، ژبەركو هەمی دەمان من پاراستن ل سەر سوشیالا خۆ كریە كو ئاخڤتن و كومێنتێن نەجوان نەهێنە دان، رەخنەك هەیە دروستە، و ئەگەر ئەو كومێنتە كارتێكرنێ ل من نەكەت نالادەم.
- هەڤالێ راست كییە؟
هەڤالێ راست د نۆكە دا نینە، نۆكە هەر كەسەك و بەرژەوەندیێن خۆیە، هەڤالێ راست ئەگەر هەبیت ئەوە دڤێت ل نەخۆشیێ دگەل مرۆڤی بیت و پاشی خۆشیێ، ژبەركو د خۆشیێ دا كەسێ منەت ب كەسێ نینە، لێ دەمێ مرۆڤ دكەڤیتە ڕەوشەكا نەخۆش و مرۆڤ ب بینیت هەڤالێ مرۆڤی یێ دگەل مرۆڤی كەسەكێ راست و دروستە و براستی ژی و هەست ب وێ نەخۆشیێ بكەت یا مرۆڤ تێدا، ئەز وی كەسی وەك هەڤالێ راست دبینم.
-ئەگەر تە دەرفەتا بجهـ ئینانا سێ هیڤیێن خۆ هەبیت دێ چ هیڤی بجهـ ئینی؟
هیڤیا من یا ئێكێ و یا سەرەكی ئەوە ئەز كچا خۆ ب ساخلەمییەكا باش ببینم و ژ نەخۆشیا خۆ ڕزگار بیت، هیڤیا دووێ من بەرنامەكێ گەلەك باش هەبیت و بشێم مفای بگەهینمە هەمی كەسان و هەمی كەس خۆ تێدا ببینن، هیڤیا من یا سێیێ ئەوە من شیابا هەر تشتەكێ پێدڤی بۆ نەخۆشێن پەنجەشێرێ بكەم، ل دەمێ ئەز وان دبینم ئەز خۆ ل جهێ وان دانم، ئەز گەلەك هەست ب ئێشانا وان دكەم، هەمی دەمان لاڤایان بۆ وان دكەم و دبێژم خوزی ئەز شیابام هەرچنەبیت، تشتەكێ بچویك بۆ وان بكەم.
