ببە ئاگر

مهاباد حه‌ميد

وەکی چەوا هەتا ئەڤرۆ
تو ئاگری ب دەستێن من ڤە
دخوازم خۆ ژ تە بڤەمرینم.. و
هەر ب تە دسۆژم
بلا تێهن تو بی
ژ من پێڤە چ نەسۆژی

ببە زڤڕین
هەمی رۆژان وەرە
ب ڕح وەرە
دگەل بای.. چیا و چیا
بلا چیا تو بی
ژ من پێڤە ل کەسێ نە زڤڕی

ببە بێهنا ئاخێ
ئااخ! ئەز ژنەکا بێ ئاخم
بەرێ کاروانێ من کەڤتە ڤێ ڕێ
ڕێیا ل دەوسا تە گول دایین
بلا ڕێ تو بی
ڕێیێن دی هەمی ل جەهنەمێ

د ناڤ کەسکاتییا چاڤێن مندا
ببە بوهارا وێ سالێ
شین ببە
ببە هیڤییا دوبارەبوونێ
بلا هیڤی تو بی
ئەگەر نە..
کێ منەت ب بوهاران هەیە!

ببە ئایەتەک
بۆ من وەرە خوار
ژ بلی من..
کەس باوەريیێ پێ نەئینیت
بلا باوەری تو بی
خودا.. تو بی
ئەگەر نە..
شاگردەیا کەسێ نابم..