رولێ رەوشەنبیران د جڤاكی دا
غالب جەمیل
هەر ژ سەردەمێن كەڤنێن ژیانا جڤاكی، رەوشەنبیران رولەكێ مەزن هەبویە د گهورین و هشیاركرنا جڤاكاندا، بۆ هندێ جڤاك گوهورینێن بنەرەتی دبوارێن جودا جودا یێن ژیانێ دا و كارتێكرن و رەنگڤەدانێن هزری ببینیت، لێ ئەڤێ چەندێ ژی وەك رێبازك جهێ خو دناڤا بگروڤەكێشێن جڤاكیدا هێلا، تا روژا مەیا ئەڤرو.
ل وەلاتێن پێشكەفتی رەوشەنبیران دبوارێن زانستی و هزری دا ب سەركێش دهێنە دیتن. د جڤاكێ كوردی ژی دا هەر ژ كەڤندا رەوشەنبیران رول هەبویە د هشیاركرنا جڤاكاندا، لێ ڤێ هشیاریێ تێرا هندێ نەكر كو ئاستێ جڤاكی دبوارێ هزری و زانستیدا گوهورینێن مەزن بخوڤەببینیت، ئەوژی ژبەر گەلەك ئەگەران، چ ئەگەرێن جوگرافی و سیاسی و ئابوری ئەوێن كورد كەفتینە تێدا، یان ئەگەرێن زالبوونا هزرێن ئاینی و خۆ سەپاندنا هزروبیرێن كەڤن و زالبوونا نەریتنێن قالبدایێ د مەژیێ تاكێ كورد دا.
لێ وەكی ئەڤروكە ئەم دبینن دگەل پێشڤەچون و پێشكەفتنا زانستێ تەكنولوژی و هەبوون و بەرفرەهبوونا تورێن جڤاكی یێن سوشیال میدیایێ پێلەكا دی یا داگیركرن و قالبدانا مەژیێ تاكێ كورد دەستپێ كریە.
كو هزر و بیر و نەریتێن جڤاكی بەرەف ئاراستەیەكا دی برن، ئەڤەژی ئێك ژ وان ئەگەرانە جڤاك ئاراستەیا خۆ یا هشیاریێ ژ دەست بدەت و بكەڤیتە بن كارتێكرنا وان كەسێن سوشیال میدیایەكا بهێز و كاریگەر هەی، ل ڤێرێ ژی رەوشەنبیرێ كورد د ڤێ دەریایا تەكنولوژیایێ دا یێ بەرزەیە و رولێ وی وەك رەوشەنبیر ناهێتە دیتن.
ژلایەكێ دیڤە هەكە سەحكەینێ رولێ رەوشەنبیرێ كورد د هشیاركرنا جڤاكیدا، رولەكە ل ئاستێ رەوشەنبیری ناهێتە دیتن، چونكە د كاودانێن نوكەیێن ژیانێدا رەوشەنبیری ژی هندەك ژ ئەرك و ئارمانجێن خو ژ دەستداینە و كەفتیە بن هندەك كارتێكرنێن جڤاكی و پیروزیان و ئایدولوژیێن سیاسی و حزبی، ژبەر هندێ ئەڤروكە رەوشەنبیری رولێ خوە یێ سەرەكی وەك سەركێش یێ ژ دەستدای، نەشێت یان ژی یێ ئامادەنینە قوچانێ دڤێ ململانێ دا بكەت چونكە تەخا رەوشەنبیر ئەڤروكە د جڤاكێ مەدا بشێوەكێ گشتی ژ ململانێ هاتیە لادان یان رول و ئەركێ وی لاوازبوویە و كەفتیە بن فشاران ژ لایێ سیاسی و ئابوری و جڤاكی ئاینی ڤە، ئەڤە و گەلەك هوكارێن دی هەنە بوینە ئەگەرێ هندێ رەوشەنبیر وەك سەركێش د جڤاكیدا خو ژ دەست بدەن یان لاواز ب بیت و نەشێت د هەمی بارودوخەكیدا رولێ جاران ببینیت وەك سەركێشێ هشیاركرنا جڤاكی.
