شانۆیا دهۆكێ بەرەڤ كیڤە؟

                                                 عادل عەبدلمەجید یوسف

ئەگەر ئەم ژ ڤێ پرسێ دەستپێ بكەین دێ بۆ مە رۆن بیت كا شانۆیا دهۆكێ بەر ب كیڤە دچیت..

ئەرێ شانۆ بوویە پیشە؟

بێ گەلەك ئالوز بكەین بەرسڤەكا ئاشكرا ب هەمی سادەیی دێ بێژین نەخێر!

نەخێر شانۆ نەبوویە پیشە ل دهۆكێ، و ئەڤێ وە كر كو شانۆ پرسێن دی ژی هەلگریت، ئەرێ شانۆیێ بینەر هەیە؟ ئەرێ رەگەزێ مێ د ناڤ شانۆیێ دا هەیە؟ نەیا بەرئاقلە تە ل باژێرەكێ وەكی دهوكێ دوو ئەكادیمی هەبن، مەرەم ژێ پەیمانگەها هونەرێن جوان، كولیژا درامایێ ل بەشێ زانستێن مروڤایەتی، شانۆ هندە یا كزبیت ؟!

هزركە خویندكارێن شانۆیێ پشتی دەرچوونێ ب كێری هەمی كاران دهێن لێ بۆ شانۆیێ بخوە ب تبلێن دەستانە، یا روونە كا بوچی؟ مەرەما من نە ئەوە ب كێر شانۆیێ ناهێن، بەلكۆ نان پێڤە ناهێت، ژ وێ فانتازیێ دویر بن كو هونەر نانی نادەتە كەسێ، ژخوە شانۆكاران ژی نەخواستییە ببنە بازرگان! بەلكو دڤێت كەدا وی ب هەروە نەچیت، هەڤالێن دهوكێ و شانۆكار ب گشتی د زانن ل هەمی دنیایێ كا شانۆ چاوا بوویە پیشە، بۆ نموونە نە گەلەك دویر باژێرەكێ وەكی ئامەدێ شانۆكار مەهانە مووچێ خوە وەردگرن و كارێ سەرەكی كاركرنە دناڤا هۆلێن شانۆیێدا لەوما دێ بینی سالانە ژ بلی نمایشكرنا شانۆگەریێن جوراوجور فیستیڤالێن شانۆیێ ژی هەنە، فیستیڤالا تێكستان فیستیڤالا نمایشكرنا شانۆگەریان ژهەمی پارچین كوردستانێ، هەم و خەما وان پێشڤەبرنا شانۆیێ یە. ژخوە ژلایێ هۆنەری ژی د ئاستەكێ پرۆفیشنال دانە.

 ئەڤ نموونا من ئینای نە هەڤبەركرنە د گەل شانۆیا دهۆكێ وەك ئاست، ئەز ڤێ ب ئاشكرا د بێژم، دهوكێ شانۆكارێن گەلەك باش هەنە، قەیرانا شانۆیێ هەیە ژ رویێ رەگەزێ مێ و هندەك ئالییەتێن دی، لێ دیسان ژی خالا سەرەكی یا كزبوونا شانۆیێ ل دهوكێ ئەوە كو نەبوویە پیشە، ستاف بۆ ماوێ دوو مەهان دێ كەڤیتە د هۆلان ڤە رۆژانە پرۆڤە، ئەڤجا یێ د ناڤ كارێ شانۆیێدا كاركری د زانیت چ خوەلیبسەرییە تا كو نمایش دكەن.

كێماسییان ژخوە هەر بەحس ناكەین، ئەوێن شانۆكار نها ل كەنالان و كۆمپانیێن هۆنەری و هتد .. كاردكەن هەمان مرۆڤ د بەرهەڤن د شانۆیێدا كاركەن ب شەڤ و رۆژ لێ هەكە مۆچەكێ هندی وی وەرگرن یێ كو ل وان جهێن كاردكەن وەردگرن،

بێگۆمان هەمی بوارێن دی یێن شانۆیێ هەر ب هەمان ئەگەرڤە د گرێداینە، نڤێسین ب تبلێن دەستانە، رەخنەگر كەمباخترە، ژخوە شانۆیا زارۆكان ئێكجاری. دێ دووبارەكەم شانۆكار هەنە لێ قەد ل وێ باوەرێ نەبن باشتر لێ بهێت بێی كو ببیتە پیشە.

 سالێ شانۆگەریەك یان دوو بهێنە نمایشكرن تێرا هندێ ناكەت ئەم بێژین شانۆ یا وەرارێ دكەت..

ئەڤ خالا من بەحسكری نەكو هیڤیا من ب تنێ یە بەلكو یان پرانیا شانۆكارانە كو دخازن ببیتە پیشە. هەردەما بۆ پیشە دێ رەنگڤەدانا وێ ب تەمامی دیاربیت ..

ل داویێ دخوازم بێژم من دخواست ڤێ گۆتارێ گەلەك سادە و ئاسان ب دارێژم بێی كو ب زمان و زاراڤێن قەلەو خوە دیارب كەم، من برین دیاركر و ژمن وەرە چارەسەری نەیا ب زەحمەتە.

٢٥ كانوینا دووێ ٢٠٢٢ێ