ئایا ولاتێن ئەورۆپی بەهەشتا سەر دنیایێ نە؟
مەتین باوەركی
دیاردا كوچكرنێ دیاردەیەكا جیهانی و بەردەوام و روژانەیە كو ئاریشەیەكا جڤاكیا جددیە بو جڤاكێ كوردەواری، لگوری راپرسیان كو د سالێن رابووریدا هاتینەكرن، ئەگەر دەلیفە پەیدا ببا ب سەدان ملیون كەس هیڤیخوازبوون كوچ بكەن. ل دەست پیكا سالئن نوتان ژی ب سەدان ملیون كەس ژ ولاتئن خو بەرەڤ ولاتئن بیانی چووینە كو ل ڤان سالئن دوماهیی ئەو ژمارەیە ب ریژەیەكا نەچاڤەرئكری زیدە بوویە، كو پتریا وان بەرەڤ ولاتئن ئەوروپا كوچ كرینە. كوچكرن ژ باشوورئ كوردستانئ ژ پیخەمەتا دابینكرنا ژیانەكا باشتردا بوویە، لئ گەلەك جاران ژیانا راستەقینە گەلەك جیاوازترە و پتریا وان ئاگەهداری وان ئالوزی و ئاریشا نینن كو دهینە بەرسینگئ وان پشتی دگەهنە ولاتئن ئەوروپی.
لدیڤ یاسایین ئیكەتیا ئەوروپا جهئ ئاكنجیبونئ و خەرجیین روژانە بو هەر كەسەكئ دهینە دابینكرن كو داخوازا ماڤئ پەنابەریی بكەت ل ئیك ژ ولاتئن ئەندام د وئ ئیكەتییدا ، لئ هیشتا روی ب ری چەند ئاریشە و ئالوزیەكین دن دبن، ژ وانا ژی داخوازكار یی ئازاد نینە د هەلبژاردنا جهئ ئاكنجیبوونئ دا، گەلەك جاران جهئ فەحەوینا پەنابەران ژ دەڤەرەكئ بو دەڤەرەكا دن دهیتە ڤەگوهازتن ، گەلەك پەنابەر ژی بو دەڤەرین دوورە دەست دهینە ڤەگوهازتن و پتریا پەنابەران هەست ب تنئ بوونئ دكەن و ئەڤ چەندە ژی دبیتە ئەگەر كو كوچبەر بریارا ڤەگەراندنئ بو ولاتئ خو بدەت ، كو لگورەی زانیاریان ب دەهان هزار وەلاتیین عیراقی ژ ئەوروپا ڤەگەریاینە كو د نافا واندا هەلگرئن ناسناما ئیك ژ ولاتئن ئەوروپی هەنە. پشتی كو ماڤئ پەنابەریی ژی ب كەسەكئ بهیتەدان ، پیدڤیە ل جهئن حكومی یان ژی رونتر بئژم ل ( كەمپین ئاكنجیبونئ ) دەركەفیت و ل شوقەیەكئ یان ژی خانیەكئ بگەریت، كو كوچبەران شەهرەزییا تەمام نینە د لیگەرینئ دا، و لڤیرە تووشی هاوزمانئن خو دبن، و دهینە ئستخلال كرن هەتاكو جهەكئ ئاكنجیبوونئ بو بهیتە دیتن د بەرامبەردا داخوازا پارەكئ زور دكەت .و ئەڤ چەندە ژ وان كەسان ناگریت كو ماڤئ پەنابەریی وان هاتبیتە رەتكرن. ژ لایەكی دی ڤە ئەو كەسئ ماڤئ پەنابەریی وەرگربیت پیدڤیە خوە فئری زمانئ وی ولاتی بكەت و پشتی قوناغین فیربوونا زمانی تەمام دكەت ، د دویڤدا پاشان ل كارەكی بگەریت، هەرچەندە هندەك كوچبەر سەركەفتی دبن د دیتنا كاری دا ، گەلەك ژ وان ژی تووشی ئاریشە و ئاستەنگا دبن بو دیتنا كاری، دامەزراندن ل كومپانیین ئەوروپی گەلەك یا فەرمیە و پیدفیە ئەوین ل دویڤ كاری دگەرن بەلگەنامئن فەرمی هەبن وەك ( پاسپورت و یان فیزە ) یان ژی مافئ پەنابەریی، هەروەسا كومپانی نەشین وان كەسان بدەنە كاری كو مولەتا كاركرنئ نینە، یان ئەزمونا كاری و باوەرنامئن خواندنئ و شەهرەزاییا وان یا كئم بیت، كو گەلەك كوچبەر د شاهرەزا نینن بو بدەستڤە ئینانا كاری ، چونكە سروشتئ كاركرنئ ل ئەوروپا جیاوازترە ژ شیوازئ ولاتئ وان، هەر ژبەر ڤئ چەندئ ژبوی كو مروڤ بشئت ل ولاتەكئ ئەوروپی جهـئ خو بكەت دڤیت ل دەست پئكئ زمانئ وی ولاتی ب باشی بزانیت و پئ باخفیت ، هەتاخو ئەو كوچبەرئن ماڤئ پەنابەری و كاركرنئ ژی هەبیت. ژ لایەكی دی فە پتریا پەنابەرئن كورد ل جهـ و خودانكارئن كورد كار دكەن ، و خودانكار ژی ب پارەیەكی كئم و دەم ژمئرئن زور یئن كاركرنئ دامەزرینیت، و نەخاسمە كو ئەگەر كەسەكئ مافئ پەنابەریی هاتبیتە رەتكرن فئ چەندئ ب دەلیفە دزانن و زئدەتر ئستخلال دكەن ئەڤ چەندە ژی پاشەروژا پەنابەرئن كورد گەلەك ب زەحمەت و ئالوز دكەت . گەلەك جاران دەستكەفئن كوچكرنئ دگەل خەرجیین وئ دهینە هەڤبەركرن دبیتە ئەگەرئ پەشیمانیئ.
