پاراستنا زاڕۆكان ژ ده‌ستدرێژييان (ژ دەستدرێژيیا سێكسی وه‌ك نموونه)
رێژين ئه‌حمه‌د
گەلەك جاران ژ بەر شەرما جڤاكی، هزركرنەكا نە دروست دەربارەی هندەك بابەتان وەل تاكە كەسی دكەت خۆ ژڤان بابه‌تان بده‌ته پاش و ب گرنگی ڤه وەرنەگریت، یان ژی وەك پێدڤی گرنگییێ پێ نەدەت و خه‌مێ ژێ نه‌خۆت، ئێك ژ وان بابەتێن كو گه‌له‌ك گرنگە بهێتە ئازراندن و پتر گرنگی پێ بهێتە دان، دەستدرێژيیا سێكسیيه دگەل زاڕۆكی.
مەرەم ژ ڤی بابەتی ئه‌و دەستدرێژيیا سێكسیيه ئەوا دگەل زاڕۆكی دهێتە كرن، چ لایێ زاڕۆكان ب خۆ ڤە، یان ژی ژ لایێ كەسانێن ژ تەمەنێ وان مەزنتر ڤه، د ڤی بابەتی دا دێ ئاماژه‌يێ ب هندەك خالێن گرنگ دەم، كو دبیت ژبەر شەرما زێدە یا جڤاكی كێم جاران ئەڤ بابەتە بهێنە ئازراندن و گه‌نگه‌شه كرن، ڤێجا داكو چ كارەسات و كێشه ژ به‌ر ڤێ شەرمێ په‌يدا نه‌بن، دێ ب رۆن و ئاشكەرايی ئاماژه‌يێ پێ دەم.
| رویدانێن نه هه‌ژى يێن زاڕۆك ب ئاوايه‌كێ راستەوخۆ دبينن، كاریگەرييا خۆ لسەر مێشكێ زاڕۆكان هەيه. |
پڕانيیا جاران ئەو دەستدرێژيیا سێكسی ئەوا ژ لایێ زاڕۆكان ب خۆ ڤە دگەل زاڕۆكەكێ/ا دی دهێتە كرن ژ دەرئەنجامێ ژینگەهەكا نە ساخلەمە و بكارئینانا سۆشیال میدیایێ یان نە چاڤدێريیا دەیبابانه ل سه‌ر زاڕۆكێن وان، سه‌ربارى وێ چەندێ كو پويته‌پێنه‌كرن و گرنگیپێنه‌دانا خێزانێ ب ڤان جۆرە بابەتان كو پێدڤیيە بۆ زاڕۆكی ب شێوەكی دروست بهێنە رۆنكرن، پڕانيیا جاران ئەڤ جۆرە دەستدرێژيیە دگەل زاڕۆكان د تەمەنێ ٤ سالی دا هه‌تا تەمەنێ سنێلەييى یێ دهێته كرن و پڕانيیا وان زاڕۆكان هنده‌ك جۆرە كریاران ئەنجام ددەن یێن ب ڤیدیۆ و وێنە د سۆشیال میدیایێ دا دبينن، هەلبەت وان رویدانێن نه هه‌ژى يێن زاڕۆك ب ئاوايه‌كێ راستەوخۆ دبينن، كاریگەرييا خۆ لسەر مێشكێ زاڕۆكان هەيه.
| دەستدرێژيیێن بەردەوام يێن ل سه‌ر زاڕۆكى دهێنه كرن، دبنە ئەگەرێ وێ چه‌ندێ نەخۆشيیێن دەروونی ل نك په‌يدا ببن و هەردەم و دلته‌نگ و بێزار ببيت. |
گەر بەرێخودانه‌كێ بۆ وان رویدانا بكەین يێن ژ لایێ كەسێن تەمەنێ وان مەزنتر ژ تەمەنێ زاڕۆكی دروست دبن، وەكی ل دەستپێكێ ئاماژە پێ هاتیە دان، ژ به‌ر پويته‌پێنه‌كرن و گرنگيپێنه‌دانا خێزانێيه ب زاڕۆكى، گەلەك جاران خێزان ب بهانەیا راوستاندنا لڤینێن زێدە یێن ل نك زاڕۆكی و دویركرنا وى ژ مال داكو دەیك بشێت كارێن خۆ يێن رۆژانه‌يێن مالێ ئەنجام بدەت، دێ به‌رێ زاڕۆكێ/ا خۆ ده‌ته مالێن هنده‌ك هەڤسوى(جیران)ان، یان ژی دێ زاڕۆكی بەشدار كەت د یاريیێن هندەك زاڕۆكێن دی دا بێی كو هیچ پێزانینەك لسەر وان زاڕۆكان یان وان مالباتان هەبیت، زاڕۆك ب بهانەیا ڤیان و حەژێكرنێ ژ لایێ كەسێن مەزنتر ڤە یان ژی ب بهانەیا وێ چەندێ كو هندەك ژ وان دەستكەفان پێشكێشی زاڕۆكی بكەت داكو پێ مژویل ببیت، تووشی ڤێ دەستدرێژيیێ دبیت، ژ وان جۆرە دەستدرێژيیان (دەستكرنا زێدە ب هەمی ئەندامێن زاڕۆكی، ماچكرنا زێدە، زێدە مانا زاڕۆكی د هەمبێزان دا …هتد.).
یا خویایە كو ئه‌ڤ جۆرە دەستدرێژيیێن بەردەوام يێن ل سه‌ر زاڕۆكى دهێنه كرن، دبنە ئەگەرێ وێ چه‌ندێ نەخۆشيیێن دەروونی ل دەف زاڕۆكی په‌يدا ببن و زاڕۆك هەردەم د ناڤ مال دا بەرەڤ تنێبوونێ ڤە دچیت، دلته‌نگ و بێزار دبیت، ژ پەیوەندیێن دروست یێن جڤاكی دوير دكه‌ڤيت، ل ڤێرێ ژ بۆ پاراستنا زاڕۆكی ژ دەستدرێژيیا سێكسی، دێ ئاماژه‌يێ ب هندەك خالێن گرنگ دەم ژ وان ژی:
١ـ د تەمەنەكێ گونجای دا ئەڤ جۆرە بابەتە ب شێوەيه‌كێ دروست ژ لایێ خێزانا زاڕۆكی ڤە بۆ زاڕۆكى(زاڕۆكێ) بهێنە شرۆڤە كرن.
٢ـ ئەگەر زاڕۆك بكارهينەرێ سۆشیال میدیایێ بیت ب شێوەيه‌كێ دروست چاڤدێری ل سۆشیالا زاڕۆكی بهێتە كرن.
٣ـ د تەمەنێ ئێك سالییێ دا زاڕۆك ل وی جهى نە هێتە نڤاندن، يێ دایباب لێ دنڤن.
٤ـ گرنگی و پارستنا هەمی ئەندامێن جەستەی بۆ زاڕۆكی بهێنە دیار كرن ب تایبەت ئەندامێن هەستیار . ٥ـ خالا هەرە گرنگ ئەوە رێز ل هەست و سۆزێن زاڕۆكی بهێتە گرتن، گەلەك جاران خێزان ب زۆری زاڕۆكی هان ددەت كو ماچ بكەتە كەسێن ژ خۆ مەزنتر یان بەرەڤ همبێزا وان بچیت، پێدڤيیە خێزان ژ ڤێ چەندێ دویر بیت.
٦ـ خێزان هەردەم زاڕۆكێ خۆ ل نێزیكی خۆ بهێلیت و زاڕۆكێ خۆ ل وى جهى نەهێلیت يێ ئەو لێ نەبیت.
| پێدڤييه خێزان هەردەم زاڕۆكێ خۆ ل نێزیكی خۆ بهێلیت و زاڕۆكێ خۆ ل وى جهى نەهێلیت يێ ئەو لێ نەبیت. |
٧ـ خێزانێ چاڤدێريیەكا باش ل سه‌ر د پەیوەنديیێن زاڕۆكی هه‌بيت چ ل قوتابخانێ و چ ژى ل ژینگەها دەرڤەی خێزانێ يا زاڕۆك تێدا دژيت.
٨ـ خێزان وان جلكان بۆ زاڕۆكێن خۆ بكار نە ئینیت یێن كو گەلەك رویساتی و دیاركرنا جەستە یێ زاڕۆكی تێدا بیت، ل ڤێرێ مەرەما من نە ب تنێ زاڕۆكا كچه بەلكو زاڕۆكێ كوڕه ژى.
٩ـ خێزانێ چاڤدێری لسەر زاڕۆكان هەبیت دەمێ یاريیان دكه‌ن، ب شێوەيه‌كێ وه‌سا كو ل ده‌مێ وێ چاڤدێريكرنێ زاڕۆك هەست ب نە ئارامی یێ نەكەت، ژبەركو پڕانیيا ڤان جۆرە دەستدرێژيیێن سێكسی د دەما ئەنجامدانا یاریيان دا په‌يدا دبن و رێ نه‌هێته دان زاڕۆك ب تنێ و بۆ دەمەكێ درێژ ژ خێزانێ يێ دوير بيت.
| فەرە لایه‌نێن شۆله‌ژێ يێن پەروەردێ و چاڤدێری و خێزانێ گرنگیيێ ب ڤان جۆرە بابەتان بدەن داكو ژینگەهەكا ساخلەمتر بۆ زاڕۆكان په‌يدا ببيت. |
١٠- خێزان ئاگه‌هدارى وان دراما و زنجێره‌يان بيت يێن ل سەر شاشه‌يان دهێنه نيشادان، پڕانیيا جاران زاڕۆك د گەل تەماشەكرنا ڤان جۆرە درامايان یان تووش دبیت .
هیڤیە ئەو خالێن د ڤی بابەتی هاتینە ئازراندن مفا ژێ بهێته وه‌رگرتن و فەرە لایه‌نێن شۆله‌ژێ يێن پەروەردێ و چاڤدێری و خێزانێ گرنگیيێ ب ڤان جۆرە بابەتان بدەن داكو پەروەردەكا باشتر و ژینگەهەكا ساخلەمتر بۆ زاڕۆكان په‌يدا ببيت.
سه‌ربارى وێ چەندێ گرنگە ئەڤ جۆرە بابەتە ب شێوەيه‌كێ ساخله‌م ل قوتابخانێ بۆ زاڕۆكى(زاڕۆكێ) بهێنە شرۆڤە كرن و ژ گرنگترین بابەتان بیت ل دەف ماموستای چونكى رۆلێ هەرە گرنگ يێ په‌روه‌ردا ساخله‌م بۆ خێزانێ و قوتابخانێ دزڤڕیت.
