د. بەدرخان سندی
برازا گیان…
خودانا كزگریۆكا بێ تاوان
كولیلكا بهارەكا پڕ كوڤان
ئەگەر سالەكا خواندنا تە فەوتا
سەد سالێن ملەتێ تە
ژ سیڤەر وه‌ره و تا ئەڤرۆ سووتا
رحا مامێ خۆ…
نەگری.. نەگری
كچا هەڵه‌پچەیا دیرۆكی
شۆخا ئەفسانەیا چیڕۆكی
ل پێش میرێ بەغدا نەگری
نە.. نە.. نەگری
من نەڤییا وەسا بلەرزی
وەكی بەرخەكا ئێك هەیڤی
د دلێ زڤستانەكا بێ كەپەن
بەر بەفرا چاخێ هەی و نەی
من نەڤيیا لێڤێن خۆ بگەزی
لەیلایا هەڤكارا تە
بەری نیڤ چەرخی
نە ئێك سال.. وەلێ
تەڤ ژیانا خۆ فەوتاند
ل سەر دەپێ سێدارێ
سێدارە هەژاند
ل پێش پاشایێ بەغدا
نەگری و نەلەرزی
وەلێ گڕنژی…
گەلی باخچەڤانان
هوین كارپیرۆزن
دەست كەسكن
خودان مافن گەڵەك هەقن
لێ بەرێ پەلاتینكێن باخچەیى
نەدن نشیڤیان
رێيێن پایتەختان نیشا نەدن
جارێ تۆلازن.. لاون بشكوژن
رێكێن بیانیيان ل بەر وان ڤەنەكن
ڤەمالن.. ڤەدن.. ڤەدن
هوین دەهمەن زەلالن
هوین هەمی خودان مافن
برسینە.. شكەستینە.. هیلاكن
لێ بۆ خاترا خودێ پایتەختێن بیانیيان
ژبیر بكن نیشا نەدن
سەرەكێن باخچەیان ل ڤێرێ نە
چارە و دەرمان
نوژدارێن دەردان
هەمی ل ڤێرێ نە
ل رحستانێ نە
برین برینا مەیە
چەقۆ ژسازا مەیە
كول كولا مەیە
نوژدار نوژدارێ مەیە
ئەرێ برازا هەڵه‌پچەیی
گریاتە بۆ من گەلەكە
هەوارە.. چەكە.. پسیارە
گریاتە.. زێمارە.. بڕیارە
ئێدی بەسە
ملەتێ پێنجی مليۆن كەسان
بێ كەسە
بەسە.. بەسە
یان پێكڤە بژین
یان پێكڤە بمرین
بلا بێتن…
خاتوینا عەشقا سەرمەدی
دەولەتا كوردی
بەسە.. بەسە زیلەتی
ئەرێ.. بەسە ئێدی
ئەرێ وەلات ئەرێ ملەت
هەتا كەنگی؟
سویالكەری.. دویڤەلانكی
ئەڤرۆ ئەو چاخە.. ئەو دەمە
بلەیزین بێ پرس و بێ ترس
سەر گۆیا ڤی عەردی
ب سەربەستی
نەبن دەستی
