ناجی تاها به‌رواری
١- کەنی:
ل بەری ژیێ چواردە سالیێ
ئەز ل پێلەکا خوڕی و
کەنیەکێ گەرم دگەریام
بارا کەنی
دبوو تلوڤە و
ئەز دهنگاڤتم
ئەز و ئەو
ژ کوربەندی دکرینە دەر
هەر بازگەها د گەهەشتینێ
درکومین و دبووینە کەڤر
هزرێن هەڤدژ
ل هەڤبەری من
زان لێ دمرن
دمانە ستەور
ڤی هرەبای
هەر پێنج تبل ژ هەڤ برن
کەپرا خوسەریێ هەژاند
تاڤیا کەنی و گرنژینێ
ما بێ عەور
٢- رڤین:
رەڤین نەبازنەکا سنگەپێ یە
نە ئالاڤێ بازارەکێ
خاڤە و بێ بهایە
بەلکو دیوانا
بازیەکێ کورە چاڤە
دەمێ دفریت
بەرەڤ نشیڤیێ دچیت
خێڤەیا دەڤێ دڕندایە
مینا مشارێ بێ ددان
هەر دوو چەنگێن خۆ دبڕیت
٣ -زڤڕۆک:
ل چەرا پایزێ
لەش دئازریت
ب بەر بایێ هاڤی دکەڤن
هەر چوار پرتێن
د سەخوەریێ دا
توخیب هەمی دمینن بێ دەر
پێڤە ناچن
ئەو ئاستەنگا کەفتن تێدا
جارەکا دی لێ ناچیت کەر
داڤەرستا پڕ زڤڕۆک
ژ بیر نەکە
بێ پەر و باڵ
نەدادە سەر
٤ :ئاقل
ئەو هەست و هزرێن
ئاقلێ پێشیێ نەبینن
بلا ل ئاقلێ پاشیێ نەگەرن
ئەو دیتنا پاشی دهێت
دبیتە کاڤل
بلا دەستێن لویلویک ڤالا
نوژەن ببن
نەمینن بێ بزاڤ و شل
کەس ب نانێ چاڤشوریێ
ل سەر جەمکی
نابیتە خوینا پڕی دل
ل گەل دەمی ژێهەل بفرە
هەمی پشکوژ دێ بنە گول
هەمی گول ژی
ل ڤەگەریانێ گەل گەهەشتن
دێ ژێ پڕ بن
هەمی سەوکێن کویڤی و
تەڤ کالێن ڤارێ و سل
