دەمێ پەیڤ دبنە جەنگ
هلبین محمد باقر
ديارييه بۆ مامۆستا د. به‌درخان سندى
بەری تیڕێژێن رۆژێ ب مزگینیا هاتنا سەهەك نوو
وەرە دا ژ چەنگێن سبەیا گولستانێ ببارین
ببم عەور دبن دەستوورا بای
بڕەقسن…
ببم بەفر ل چیایێ دلێ تە یێ تریفە
وەرە دا ژ كەزییێن رۆژا گولگولی رابمالشین
دا ژ خەونا خلماشكری نزیكی وەلاتێ بیریكرنێ ببین
ببین لاڤژەبێژێن وەلاتێ ستەمكاران
ببین قەید ل باسكێن فریشته‌يێن گرێدایی
خوە بئازرینین
ببین دار ژ قورمێ رۆژا خویایی
بهەلوەشین…
لەهییەك حەزێن ئاریایی
د سنگێ من دە خوە ڤەدژەنیت
ل پەی شۆپا هەلبەستێن تە
هند نەمابوو
ئاخینكێن خوە دگەل مەلكەموتان بهنێرم
هند نەمابوو
د خلوەتگەها خەوگەها مەلەسی دا مشەخت ببم
ببم پەلاتینك د دلێ ئاخا ئەسمەردا
گولفرۆشەكم ل بێهنا نەفەلان دگەڕم
ب رۆندكێن ئاڤا زەلال تافیل دكم
ئەز ب خوە نە ئاڤم
بەلێ دبێژنە من دجلە و فورات
نە ژی ئاخم….
ل بەر بێهنا كولیلكێن تە یێن بهاری
رەنگ ورەنگ ببم
تو ژیك د ڤالاهییێن قەراغێن بێ ناڤ و نیشان
یاریيان د وەغەرێ دا دكەی
هەر كێلی…
پەروازەكێ تە ب زمانەكێ نوو تێتە خواندن
هەر كێلی
سروودێن نڤشێ خوە د قەتلا گومانێن من دە
دشبینی
ژ رەهێن كەڤنە سنوورێن هەڕفتی
بێ تاقەت دمینن
نە بارانێن بیانی
سترانێن خوە د چاڤێن عەبدالێ زەینكێ دە
سبەیێن سپی دسترینن
نە ژی
پێنووسا بێ واتە د گوهێ دنیایێ دە درێسینە
نە نمنمكێن قەچاغان خواستەكێن مزگینيیان
بلند دكن
ئاوازان لێ بگەڕن
خەیالێن من د خوناڤا ستۆیێ دیرۆكێ دە شل دبن
ژ ئاسۆیێ وەلاتێ بێهنفرەهـ
شرینتر دبن
تە چەند بابەلیسك د هەمبێزا وەرزان دە
زڤڕاندینە…
تە چەند كولیلكێن رەنگاورەنگ د سنگێ سالا نوو ده پێشكێش كرینە
و چەند…
و چەند و چەند…
حەژێكەرێن هەلبەستێ ل خوە كوم كرینە!
زاخۆ
31/12/2012
