مێزا سێگۆشه
عادل حسێن
ئەڤە شەش دەمژێرە لسەر مێزەکا سێگۆشە ڕوینشتی مە و هزر د ژیانا ل پشت ڤان چار دیواران دکەم، مێشکێ من زۆر يێ ئاڵۆزە.. ئەز ئێدی نزانم د کیژ جاددێ ڕا دەرباز ببم چونکی حەزا کوشتنێ ل دەڤ من پەیدا بوویە، نەفرەت بیت؛ ئەو نانێ من دزی ژی ب داوی هات، تو تێناگەهی کو هەژاری دێ تە کوژیت یان دێ تە کەتە کوژەك، تو دزانی ئەگەر هەژاری ل مەملەکەتا خودای هەبا نۆکە فریشته‌يان کوشتن وەکو مرۆڤان کری، خودا ژی دا د جەنگێ دابیت.
لسەر عەردی نان بوویە خودا، ئەم ئێدی وێ خوارنێ دپەرێسین یا ئەم ددزین یان ب دەستڤە دئینین، خودا وەرە ئەز و تو پەیمانەکێ گرێدەین تو هەڕۆژ خوارنێ بۆ من فرێکە ئەز ژی دێ بەحسا تە بۆ خەلکی کەم داکو بهێن تە بنیاسن، ئەگەر تو بەرسڤا من نەدەی ئەز نەچارم دوبارە دزيیێ بکەم و دبیت کوشتنێ ژی بکەم، هیڤیيە تە هاى ژ من هەبیت، هەر چەوان بیت تو گوهێ خوە نەدە ئاخفتنێن من دیوارۆ چونکی ئەز یێ سەرخوەشم، ما کی دزانیت دبیت نۆکە بمرم چونكی من چ خوارن نینه، ئەز نەشێم بچم بۆ خوە بدزم ژی چونكی خەونا شڤێدی لسەر ڤێ مێزێ هشك کری مە.
من دڤێت بۆ تە بەحس بکەم کا چ ڕویدایە بەری بنڤم، ب شەڤ من د خەونێ دا دیت سێ کۆپێن ئاڤێ بەرامبەری منن؛ ئێك ڕاستی تێدا هاتيیە خەندقاندن، پرسیار نەکەن هەردوو کۆپێن دی چ تێدا بوون چونكی ل بیرا من نینە، ئەز نزانم چ ڕۆژ بۆ دەمێ ژ ماڵ دەرکەتیم ئەز بۆ لایێ چەپێ جاددێ چۆم، ئەز یێ هزرێن خوە دکەم دەستپێکا ڤێ جاددێ ماڵا من یا کرێتە ئەرێ دووماهيیا جاددێ دێ چ هەبیت، لسەر ڤان هزرا ئەز بەردەوام بووم دچۆنێ دا ئەز گەهشتم تاخەکێ تێدا چاڤێ من ل دوکانەکێ کەڤت لسەر جاما وێ ڕیکلامه‌ك هەیە و ب ڤی شێوەی نڤيسی یە ” ژیان حەزژێکرنە ” ئەز بەرەڤ دوکانێ چۆم من دڤیا بزانم ئەو کیژ گەمژەیە ئەڤە نڤيسای، من تەماشە کر زەڵامەکێ زك مەزن و خودان پرچەکێ درێژ ڕۆنیشتی یە، من ب دەنگەکێ نزم گۆت:
– ئەوا لسەر جامێ هاتی نڤيسان درەوەکا شرینە…
وى زەڵامى ب تۆڕەيی ڤە گۆت:
– تو دزانی خودانێ ڤێ دوکانێ کی یە؟
بەری ئاخڤتنا خوە تمام بکەت من گۆت:
– خودانێ ڤێ دوکانێ گه‌له‌ك يێ به‌رنياسه و هه‌مى وى دنياسن.. تو دزانی، پاشی، وی گۆتە من:
– ئەڤ مرۆڤە ژ هه‌ر ئێكێ دى مه‌زنتره، ژ به‌ر هندێ خەلکێ ڤێرە پتر ژ وی مه‌زنى دنیاسن.
ئەز ڕاوستیام و من گۆت:
– ئەز دێ پارچە زێڕەکی بەم و بێژە مەزنێ خوە ئەز گەلەک حەز ژ وی دکەم چونكی ژیان حەزژێکرنە، بەلێ وی زەڵامی بەرسڤا من نەدا، ئەز ژی ل خوە زڤڕیم و دوبارە ل جاددێ زڤڕیم داکو تشتەکێ پەیدا بکەم بۆ خوارنێ.
هێدی هێدی باران ژی یا دباریت، جلوبەرگێن من ژی تێرا هندێ دکەن وه‌كو دینەکێ نەهێم دیتن، چاڤێ من ب دادگەهێ کەڤت لسەر دیوارێ دادگەهێ نڤيسی بوو “هەتا بەرزە ژی ببی مافێ تە بەرزە نابیت”. ئەو ئێکەم جار بوو ئەز ژ دل بگڕنژم و بۆ من دیار بوو كو هەر نڤيسینەکا ڤی وەڵاتی تنێ سەردابرنە، نە چونكی نە دادوەر دزانیت و نە خودانێ دوكانێ کۆ حەزژێکرن و ماف دوو تشتێن هەبوونا خوە نینە د ژیانا هەژاريیێ دا، دیارە ئاریشەيه‌ك ل دادگەهێ هەیه، ئەز نێزیك بووم داكو بپرسم چ ڕويدایە، ئێک ژ ئامادەبویا گۆت: ئەڤە دوو ساڵە ئەو ڤی کاری دکەت.
ئێکێ دی کۆ ڕوینشتی بوو لسەر کۆرسیەکێ و دگۆت:
– ئەو یێ ب تنێ نینە، گەلەکێن دی وه‌كو وی هەنە.
ئێکێ بەژنبلند گۆتی:
– نەخێر ئەڤی کەسی وەنەکریە و یێ بێ گونەهە.
ئەڤ گۆتنە هەمی دهێنە گۆتن بۆ ئێک ڕويدان، نەفرەت بیت ئەز بێزارم کا ڕاستی؟ هەر ئێک ژ هەوە دبێژیت ڕاستی ل نك منە، پا درەو ل کیڤەیە؟
من زویکا دادگەهــ بجهــ هێلا و ئەز دوبارە زڤڕیم جاددێ من ژنەك د ڕێیا خوە دا دیت، گۆت:
– تو کوڕۆ کا وەرە چ لسەر ڤێ ڕۆژنامێ نڤيسایە…
من سەحکرە ڕۆژنامێ لسەر لاپەرەکێ وێ نڤيسایە (دوهى ئاهنگەك هاتە سازکرن ژبەر وێ سەرکەفتنا لسەر دوژمنی)، ل ژێر نڤیسینێ چار وێنە هاتبوون دانان، دوو وێنە یێن وان هەژارێن شەهید بووین و هەردوو وێنه‌يێن دی ئەو زەنگین بوون یێن ل ئاهنگێ بەرهــەڤ بووین، ئەوان شەهید برنە بەهشتێ و ب چەکێ وان ژیان بۆ خوە کرە بەهشت، من درەو ل ژنێ کرن ب دروستی ناهێت بیرا من کا من چ گۆتبوو، لێ بەرسڤا وێ ژنێ ب ڤی شێوەی بوو:
– دیسا نڤيسینەکا درەو.
من ئەو من هێلا داکۆ چ پرسێن دی نەکەت.
ئەز یێ نێزیکی پەرستگەهێ دبم هیچ جارەکێ من نە خواستیە بچمه پەرستگەهێ، چونكی زەڵامێن ئاینی خودا د ناڤ چار دیواران دا زیندان کریە و بەهشتێ دفرۆشن مرۆڤان، ئەڤ هزرکرنە دێ من كوژیت، من خوارن ژی پەیدا نەکر، جاددە ژی هندە دێ ب دووماهی هیت هەمی تشت وه‌كو ماڵا من دکرێتن ژبلی ڕەشی چ تشت ناهێت دیتن، من هەڤالێ خوە یێ زارۆکینييێ دیت هندەك مەی د دەستی دا بوو ب سەرخۆشیی دێ بێژیت من:
– تو بێ ئاقل.. تو ل ڤێرە چ دکەی تو دزانی نۆکە من دوو دیمەنێن ب کەنی یێن دیتین ئەز دێ ئێکێ بۆ تە بێژم و ئێکێ دی بۆ هەڤژینا خوە بێژم، تە دڤێت کیشکێ بۆ تە بێژم بێ ئاقل، دیمەنەك یێ دوو کچا بوو و یێ دی کرێکارەك و ڕێڤەبەرێ خوە بوون، من یێ کچا هەلبژارت، چونكی ئەز حەز ژ ژنان دکەم، گۆتە من:
(د وێ کۆلانێ دا من دوو کچ دیتن ئێکێ دگۆت: بابێ من حەز ژ ژنەکا دی دکەت و دایکا من ڤێ چەندێ نزانیت، کچا دی ژى گۆت: (چو نینە زەڵام هەمی ب ڤی شێوەی نە، ئەو چەند بێ ئاقلن، نزانن ئێك ژن ژیانا زەڵامی وێران دکەت، کچا دی دگۆت: ئەز ژی حەز ژ دوو کوڕان دکەم)، تو دبینی کۆلانێن ڤی باژێڕی مژویلی چ تشتانە.
من پیچەکا مەی ژێ وەرگرت ل دەمێ زڤڕینێ بۆ ماڵ من پیرەژنەك دیت، ب ناڤێ هاریکاریيێ من نانێ وێ دزی، ئەز دوبارە ل ژوورا خوە ڕوینشتم د ناڤ وێ تاریاتیيێ دا.
پشتی بۆرینا دەمەکێ کورت ئەز نڤستم و من د خەونێ دا سێ کۆپ دیتن، من بۆ تە گۆت کا چ ڕويدا؛ دگەل کۆپێ ئێکێ ئەڤا من گۆتی بۆ تە دیار دکەت کا چ دگەل هەردوو کۆپێن دی ڕويدایە ئەگەر تە ب جوانی گوهێ خۆ دابیت من، بەلێ ئەز یێ پشتراستم تۆ تێناگەهی چونكی دیوار د چ تشتا ناگەهن ئەگەر تێگەهشتبان وان چ جاران هندەك کەس د ناڤ خوەدا نە دپاراستن.
